CHUʼNCHEL taqeh ajnimaneel, kʼih pech inkibʼan i tiij reʼ xukʼuhtaaj i Jesú: reʼ padrenuestro. Xa reʼ laʼ, maʼ kʼih ta taqeh inkireq chi riij i kʼahchi’ kipahqaam. Kʼihaal chi kʼachareel inkikaʼpecheej iqal iqal eh inkib’an k’ih pech chuwach i qʼiij, atoobʼ ta maʼ inkireq ta chi riij i kʼahchiʼ kipahqaam. Xa reʼ laʼ, reʼ Jesús maʼ nikʼ ta xraaj chi jeʼ wilih nakibʼanam. ¿Chaaj woʼ reet jeʼ reʼ inqaqʼor?

Noq ko majaaʼ naq irukʼuhtaaj i tiij, reʼ reh xuqʼor: «Noq naa aʼnam atiij, makʼihpechej taqe qʼorik i xamaʼ xta rubʼehel» (Mateo 6:7). Reʼ Jesús maʼ kʼahchiʼ ta naq rujotʼom riibʼ noq xuk’uhtaaj jenaj tiij i na naq kitijem eh na naq kiq’orom eqal eqal, kʼahchiʼ la’ naq rukʼuhtaam chajariik i aajwaal wach chi ne inkipahqaaj pan qatiij. Ruum ajreʼ, qatz’ir riij i tiij xukʼuhtaaj i Jesús, reʼ inkan pan Mateo 6:9-13.

Ayuʼ reʼ Jesús iruqʼor keh taqeh rajtahqaneel chi xa re’ wo’ chuwach i Qajaaw Jehová nakib’anam kitiij. Xa reʼ laʼ, ¿chaaj woʼ reet iruqʼor loqʼimaj ta naq abʼihnaal?

Ruum chi pan toqʼombʼal cho reh i kʼacharik, xkiq’or i chukuj q’orik chi riij i rubʼihnaal i Dios. Reʼ inixowanik reh, reʼ Ajyahm iruqʼor chi reʼ Jehová iruchuk qʼorik, chi xa reʼ reh irukʼax riibʼ eh chi maʼxta qʼabʼ reh, reh chi ne intaqʼanik chi kinaah taqeh i xutzʼuhkrisaj (Génesis 3:​1-6). Eh reʼ taqeh inkimaj i wilih, inkikʼuhtaaj chi reʼ Dios maʼ qojraaj ta, chi qojrupaj eh chi iraaj rubʼanam qeh i tiʼ. Eh inkikapaaj woʼ chi maʼ ajwach ta xtzʼuhkrisanik reh chuʼnchel i wilik. Juʼjun xkisaj i rubʼihnaal i Dios pan Santo Laj Huuj eh maʼ inkaaj ta chi ne inkojarik.

Xa reʼ laʼ, reʼ Santo Laj Huuj iruqʼor chi reʼ Dios narusaqbʼisam wach i rubʼihnaal (Ezequiel 39:7). Eh noq rubʼanam i wilih, na woʼ rusacham wach i qakʼaxkilal. ¿Nikʼwach narubʼanam? Reʼ Jesús xq’orik chi riij i wilih.

Yuʼnaak qʼiij, reʼ taqeh kikʼamwik b’eeh pan taq nimanik maʼ jenaj ta wach inkikapaaj chi riij chajariik i runimaal Rajaawriik i Dios. Maʼ jeʼ ta naq reʼ inkʼularik pan ruqʼijil i Jesús. Reʼ taqeh judío kehtʼal naq wach taqeh i q’orooj cho rub’iral najtir chi riij i sik’ooj wach — re’ ajkoʼloom chihooj wach ruum i Dios — reʼ i na naq rutaqʼaniik eh na naq rujalam wach i wach akʼal (Isaías 9:​6, 7; Daniel 2:44). Reʼ ajawriik wilih narusaqbʼisam wach i rubʼihnaal i Jehová, narukʼuhtaam taqeh chukuj qʼorik ruqʼorom i Ajyahm, narusacham wach i Ajyahm eh jeʼ woʼ chu’nchel i rubʼanooj. Na woʼ rusacham wach i qʼaqʼinik, i yabʼilaal, i wiʼjaleel eh jeʼ woʼ i kimik (Salmo 46:9; 72:​12-16; Isaías 25:8; 33:24). Noq inqapahqaaj reh i Dios chi ne inchalik i runimaal rajaawriik, kʼahchiʼ qapahqaam reh chi ne inooj eloq wach taqeh irubʼehsaj qeh.

Reʼ taqeh qʼorik wilih inkikʼuhtaaj qeh chi narubʼanariik i rajwaam i Dios ayuʼ wach akʼal, jeʼ rukabʼ inbʼanarik chik ar pan taxaaj, noq reʼ Jesús xrisaj cho ar pan taxaaj i Ajyahm eh taqeh i maʼ atoobʼ laj uxlabʼal, eh xukut taqeh cho ayuʼ wach akʼal (Apocalipsis 12:​9-12). Reʼ wilih, eh re’ xqil chik, inkik’uhtaaj qeh chi aajwaal wach chi ne inqakoj qakʼux chi riij imponik chuwach i Dios eh maʼ reʼ ta chi riij inqaaj i hoj. Chi qunchelaal ne inqareq rusuqkiil noq ne inbʼanarik chajariik imponik chuwach i Dios. Re’ Jesús, atoobʼ ta manlik naq wach i rukʼachariik, xuqʼor: «Maʼ ta naq neenbʼaan inwaaj i hin reʼ ta laʼ naq neenbʼaan inawaaj i hat» (Lucas 22:42).

Reʼ Jesús xuqʼor chi wilik i ne irub’an chi ne inqapahqaaj, reʼ taqeh ko ruman pan qakʼachariik. Jeʼ rukabʼ inqakoj rehtaal, maʼ mahk ta chi ne inqapahqaaj pan qatiij reh i Dios chi ne iruyeew qeh i aajwaal wach chi qeh iqal iqal. Wilaʼ jeʼ reʼ xqabʼan, k’ahchi’ qak’uhtaam chi ch’iklik qak’ux chi reʼ Jehová «inyeʼwik qeh chi qunchelaal i qakʼachariik, i quxlabʼal, jeʼ woʼ chuʼnchel i xa chibʼih jariik» (Hechos 17:25). Reʼ Santo Laj Huuj iruqʼor chi reʼ Dios jenaj ajabʼees chaqʼlaam eh iruyeew keh taqeh ruhalakʼuun i aajwaal wach chi keh. Reʼ reh maʼ jaruuj ne iruyeew keh taqeh ruhalakʼuun reʼ i ne iruyeew pan kʼaxkilal i kikʼachariik.

¿Chajariik qakʼaas ruukʼ i Jehová? ¿Chaaj woʼ reet ko ruman chi qeh chi ne irukuy qamahk? Atoobʼ ta kʼih i maʼ inkikoj ta chi wilik i mahk oon ma’ keht’al ta chajariik i mahk, re’ Santo Laj Huuj iruq’or chi reʼreʼ i raaʼ riʼsil chuʼnchel taqeh qakʼaxkilal eh je’ wo’ i kimik. Ruum chi qoj’asjik pan mahk, kʼih taqeh mahk inqabʼan irutiʼbʼisaj rukʼux i Dios. Ruum ajreʼ, mi inqaaj kʼacharik chi junelik, ko ruman chi reʼ Dios ne irukuy qamahk (Romanos 3:23; 5:12; 6:23). Reʼ Santo Laj Huuj iruqʼor woʼ qeh chi reʼ Jehová qʼeʼ atoobʼ eh iraaj rukuyum qamahk (Salmo 86:5).

Reʼ hoj kʼachareel ko ruman chi qeh chi ne qojrukoʼleej i Dios. Kʼih maʼ inkikoj ta wach chi wilik i Ajyahm. Xa reʼ laʼ, re’ Jesús reht’al naq chi wilik i Ajyahm, ruum aj reʼ xuqʼor chi reʼ Ajyahm: «reʼ intaqʼanik chinaah i wach akʼal» (Juan 12:31; 16:11, RLLH). Reʼ Ajyahm maʼ insuqbʼik ta rukʼux xa ruuk’ rujotʼariik i wach akʼal, iraaj laʼ qooj rujotʼom i hoj, eh maʼ iraaj ta chi ne qojwihʼik chi ramigo i Qajaaw Jehová. (1 Pedro 5:8). Maʼ ne ta irubʼan chi ne qojyoʼjik ruum, ruum chi reʼ Dios wilik rajaawriik eh iraaj ruko’leem taqeh i kiʼajwanik reh.

Ko wilik i ne inqapahqaaj reh i Dios pan qatiij, jeʼ rukabʼ iruqʼor qeh pan 1 Juan 5:14: «Chibʼih jariik neenqapahqaaj reh pan qatiij ruukʼ rubʼehel jeʼ rukabʼ iraaj i reh, qehtʼal chi nee qoh ribʼiraj». Reʼ wilih iraaj ruqʼorom chi ne inqaqʼor reh i Dios chuʼnchel i qojqajik wiiʼ kapeew, eh qeht’al chi maʼ ne ta iruqʼor chi xa memil laj qʼorik i k’ahchi’ qaq’orom reh (1 Pedro 5:7).

¿Eh chajariik iruqʼor i Santo Laj Huuj chi riij i yeʼaabʼ eh nikʼ naqabʼanam qatiij? Naqaqʼoriik chi riij i pahqanik wilih pan jenaj chik naʼojbʼal.