Kapakap

4 Dahme Kitail Pahn Kapakapki?

KAPAKAP en Sises me pil adaneki kapakap en Kaun-o de Samat iei me pali laud en Kristian kan kin doadoahngki. Mehnda ma met mehlel de soh, pali laud en aramas sohte kin wehwehki duwen kapakap wet. Aramas tohto kin pwurepwurehng ndinda lokaiahn kapakap wet rahn koaros. Ahpw kaidehn ih me Sises ketin koasoanehdi en met. Ia duwen atail ese?

Mwohnte Sises ketin koasoia duwen kapakap wet, e mahsanih: “Ni amwail kin kapakap,dehr kin pwurepwurehng nda soangen lokaiaohte.” (Madiu 6:7, NW) Eri ia duwe, Sises kin uhwong pein eh mahsen ni eh ketikihda lepin mahsen kan en kapakapo pwe aramas en wadlikihla oh kin kapwukapwurehiong? Uhdahn soh! E kin ketin padahkihong kitail dahme kitail en kin kapakapki oh e ketin padahkihong kitail en tamataman mehkan me keieu kesempwal ni atail kin kapakap. Kitail tehk mwahu dahme e mahsanih. Kapakapo kileldi nan Madiu 6:9-13.

“Samat me ketiket nanleng: Mwaromwi en sarawihla.”

Eri, Sises kin ketin katamankihong sapwellime tohnpadahk ko me kapakap koaros pahn kohwong Seme, Siohwa. Ahpw ke ese ia kahrepen mwaren Koht eh inenen kesempwal oh dahme kahrehda e anahne kasarawihala?

Sangete tepin poadopoad en aramas, mwar sarawi en Koht wet ohkihla likamw. Sapwellimen Koht imwintihti me iei Sehdan nda me Siohwa likamw, Kaun roporop men ih me sohte ahneki pwuhng en kaunda Sapwellime kapikipikda kan. (Senesis 3:1-6) Me tohto kin iangala Sehdan. Irail padahngki me Koht me sempoak, lemei, mwersuwed de re kin kahmahmki me iei ih Sounkapikada. Ekei kin uhwong mwaren Koht. Irail kihsang nan Paipel mware me iei Siohwa oh keinapwihdi aramas en doadoahngki mware.

Paipel kasalehda me Koht pahn ketin kapwungala sapwung pwukat koaros. (Esekiel 39:7) Ni eh pahn ketin wia met, e pahn kaitarala omw anahn koaros oh kamwahwihala omw kahpwal koaros. Ia duwe? Sapwellimen Sises mahsen kan en mwuri nan kapakapo kin kihda pasapeng.

“Mweimwi [‘Wehiomwi,’ NW] en pweida wasa koaros.”

Rahnwet, mie sawehwe laud nanpwungen sounpadahk en pelien lamalam akan duwen Wehin Koht. Ahpw irail ako me kin rong Sises, ese me sapwellimen Koht soukohp akan kohpada sangete mahs duwen Mesaiao, Sounkomour men me Koht ketin pilada pwehn kaunda Wehi ehu me pahn wekidala irair en sampah. (Aiseia 9:6, 7; Daniel 2:44) Wehi wet pahn kasarawihla mwaren Koht ni eh pahn kasalehda likamw koaros me Sehdan wiadahr oh eri  powehdi Sehdan oh eh doadoahk kan koaros. Wehin Koht pahn kihsang mahwen, soumwahu, duhpek oh pil mehla. (Melkahka 46:9; 72:12-16; Aiseia 25:8; 33:24) Ni ahnsou me ke kin kapakapki Wehin Koht en pweida, ke kin kapakapki inou pwukat koaros en pweida.

“Kupwuromwi en kin wiawi nin sampah duwen eh kin wiawi nanleng.”

Mahsen en Sises pwukat kin kasalehda me kupwuren Koht uhdahn pahn pweida nin sampah duwehte eh wiawi nanleng, wasa me Koht kin ketiket ie. Sohte mehkot kak kauhdi kupwuren Koht en pweida nanleng. Sapwellimen Koht Ohl mahweniong Sehdan oh ienge kan nanleng oh keseiraildihdo nin sampah. (Kaudiahl 12:9-12) Duwehte tepin pekipek riauo nan sapwellimen Sises kapakapo, pekipek kesiluh wet kin sewese kitail en tamataman dahme keieu kesempwal. Oh me keieu kesempwal iei kupwuren Koht a kaidehn dahme kitail kin men en wiawi. Kupwuren Koht me kin ahnsou koaros imwihla mwahu ong kapikipikda kan koaros. Ihme kahrehda pil lel Sises me unsek, eh mahsanih duwen Semeo: “Kaidehkin nsenei, pwe kupwuromwihte en pweida.”​—Luk 22:42.

“Ketikihdo rahnwet at tungoal.”

Mwuri, Sises pil kasalehda me kitail kak kapakapki pein atail anahn akan. Sohte mehkot sapwung en peki dahme kitail anahne pwehn apwalih kitail ehuehu rahn. Ni atail kin wia met, e kin katamankihong kitail me Siohwa me kin “ketikihong mour oh esingek oh soahng teikan ong aramas akan koaros.” (Wiewia 17:25) Paipel kin kasalehda me e kin wia pahpa limpoak men me kin kupwurki ketikihong anahn en sapwellime seri kan. Ahpw duwehte pahpa mwahu men, e sohte pahn ketin kapwaiada pekipek kan me sohte pahn wia kamwahu ong irail.

“Mahkikihong kiht dipat akan.”

Ia duwe, ke anahne sapwellimen Koht mahk? Me tohto rahnwet solahr kin wehwehki dahkot dihp oh uwen laud en kahpwal me kohsang dihp. Ahpw Paipel padahkihong kitail me dihp iei utupen atail kahpwal kan me keieu suwed, pwe ih me kahrehiong aramas en kin mehla. Pwehki kitail neitikidi nan dihp, kitail koaros kin wiahda dihp pak tohto. Ihte atail koapworopwor pwehn ahneki mour mwahu kohkohlahte iei sapwellimen Koht mahk. (Rom 3:23; 5:12; 6:23) Ia uwen kansenamwahu en ese me Paipel mahsanih me Siohwa “me kupwur mwahu oh diren mahk.”​—Melkahka 86:5.

“Nekid kiht sang ni me suwed en Sehdan.”

Ke kin tehk ia uwen omw anahne mehlel Koht en ketin pere iuk ni ahnsou mwadang? Me tohto sohte men pwungki me ‘me suwedo,’ Sehdan, uhdahn mie. Ahpw Sises ketin padahngki me Sehdan uhdahn mie. E pil likwerikin ih “kaunen sampah wet.” (Sohn 12:31; 16:11) Sehdan kauwelahr sampah wet me mi pahn eh kaunda. E pil kin nantihong en kauwehla omw mour pwe ken dehr kakairada omw nanpwungmwahu rehn Semomw Siohwa. (1 Piter 5:8) Ahpw Siohwa uhdahn kehlail sang Sehdan oh e kin kupwurki mehlel en pere irail akan me poakohng Ih.

Kawehwe mwotomwot wet duwen ire kesempwal kan nan sapwellimen Sises kapakapo sohte kawehwehda ire kan koaros me kitail kak kapakapki. Tamataman dahme 1 Sohn 5:14 padahkihong kitail duwen Koht: “Pein ih pahn karonge atail pekipek kan, ma kitail pahn peki mehkot nin duwen kupwure.” Eri ke dehr leme me omw kahpwal akan sohte katepe oh ke sohte anahne kapakapkiong Koht.​—1 Piter 5:7.

Ahpw rahnwet, me tohto kin medewe ma mie katepen kapakap. Ele ke kakete idek, ‘Koht pahn ketin karonge oh sapeng ei kapakap?’