Mañakuy

4 ¿Imastá mañakuna?

CRISTIANOSPA mañakuyninkumantaqa, Jesuspa yachachisqan, padrenuestro mañakuy aswan riqsisqa. Chaywanpis mana chay mañakuytaqa entiendenkuchu. May chhika runas sapa pʼunchay, kutin kutita mañakunku. Nitaq imatachus mañakuchkasqankuta entiendenkuchu, Jesusqa mana jinata mañakunankutachu yachachirqa, ¿imaraykutaq?

Imaraykuchus, manaraq yachachichkaspa Jesús nirqa: “Diosmanta mañakuspaqa, ama kutipakuspa ashkhata parlaychejchu”, nispa (Mateo 6:7). Jesús kayta yachachispaqa, mana nichkarqachu, kutin kutita kikillantapuni mañakunata. Astawanpis, imasmantachus ñawpaqta mañakunanchikta yachachirqa. Mateo 6:9-13 pʼitista astawan ukhuncharina.

“Janaj pachapi kashaj Tatayku, sutiyki jatunchasqa kachun.”

Jesusqa, discipulosninman Jehová Tatallanmanta mañakunankuta yuyarichirqa chantá, ¿imaraykutaq sutiyki jatunchasqa kachun nirqa?

Imaraykuchus qallariymantapacha, Diospa sutinmantaqa llullakuykunata parlakun. Diospa, kuraq enemigon Satanasqa, Jehová llulla kasqanta, munayninmanjina imatapis ruwasqanta, mana kamachiyta atisqanta ima, nin (Génesis 3:1-6). Satanaswan kaqkunaqa, Dios rumi sunqu, saqra, vengakuq kasqanta ninku. Chantapis, Jehová ruwawaqninchik kasqanta qhisachanku. Wakinkunataq Bibliamanta Diospa sutinta qhichunku, sutinta mana uqharinankuta ima, kamachinku.

Bibliaqa, Dios chay imasta tukuchinanta nin (Ezequiel 39:7). Chayta ruwaptin runaspa chʼampayninkuta allinchanqa. ¿Imaynatá ruwanqa? Jesús sutʼinchawanchik.

“Reinoyki jamuchun.”

Religionesta yachachiqkunaqa, imachus Diospa Reinon, kasqanta mana kikintachu yachachinku. Jesuspa tiemponpi mana jinachu karqa. Judiosqa, Mesías kacharichiq, Diospa akllasqan, kay pachata kamachispa tukuy imata allinchaq ima, kananta yachaq kanku (Isaías 9:6, 7; Daniel 2:44). Diospa Reinonqa, Satanaspa llullakusqasninta sutʼinchaspa, Supayta atipaspa, ruwasqasninta pampachaspa ima, Jehovap sutinta llimphuchanqa. Chantapis maqanakuyta, unquyta, yarqhayta, wañuyta ima tukuchinqa (Salmo 46:9; 72:12-16; Isaías 25:8; 33:24). Chayrayku, Diospa Reinon jamunanta mañakuspaqa, kay tukuy ima, juntʼakunanta mañakuchkanchik.

“Munayniykitaj ruwasqa kachun, imaynachus janaj pachapi, ajinallatataj kay pachapipis.”

Diospa churin, Satanasta, supaykunasnintawan atipaspa kay jallpʼaman qharqumuchkaptin, kay rimaykunaqa juntʼakurqa. Kaytaq Jallpʼapaq Diospa munaynin juntʼakunantapuni rikuchiwanchik (Apocalipsis 12:9-12). Kay mañakuypis, ñawpaq mañakuykunajina, munayninchikpi yuyanamantaqa, Diospa munaynin juntʼakunanpi yuyananchikta niwanchik. Imaraykuchus Diospa munaynin juntʼakuptin allin kawsay kanqa. Jesús mana juchayuq kaspapis nirqa: “Ama munaynillayqa kachunchu, manachayqa qampa munayniyki ruwasqa kachun”, nispa (Lucas 22:42).

“Tʼantaykuta kunan qowayku.”

Jesusqa, sapa juk imatachus necesitasqanchikmanjina mañakunanchikta niwanchik. Qhawarinchikjina sapa pʼunchaypaq, imatachus necesitasqanchikta, Diosmanta mañakuyqa mana juchachu. Jinata nispaqa, Jehovalla “tukuyman kawsayta qo[q], samayta, tukuy imastawan” quq kasqanta nichkanchik (Hechos 17:25). Bibliaqa, Diosta juk kʼacha tatawan kikinchan, pichus wawasninman munakuywan tukuy imata qun. Chaywanpis, mañakusqanchik mana allinninchikpaq kaptinqa, mana uyariwasunchu.

“Juchasniykuta pampachapuwayku.”

¿Imaraykutaq juchasninchikta pampachananta necesitanchik? Wakinqa, mana jucha kasqanta ninku, chayri pisipaq qhawanku. Chaywanpis, Bibliap nisqanmanjina juchaqa tukuy chʼampaykunata, wañuyta ima, rikhurichimun. Paqarikusqanchikmantapacha, juchasapas kasqanchikrayku, Diospa contranta juchallikunchik. Chayrayku, wiñaypaq kawsayta munaspaqa, juchanchik pampachasqa kananta necesitanchik (Romanos 3:23; 5:12; 6:23). Bibliaqa, Jehová kʼacha kasqanta, juchasninchikta pampachayta munasqanta ima yuyarichiwanchik (Salmo 86:5).

“Jarkʼawayku sajramanta.”

Runasqa, Diospa jarkʼayninta usqhayllata necesitanchik. Wakinkunaqa “saqra” kaq Supayqa mana kasqanta ninku. Chaywanpis, Jesusqa chiqamantapuni Satanás kasqanta yacharqa, chayrayku payta ‘kay pachata kamachiq’ nispa suticharqa (Juan 12:31; 16:11). Satanasqa mana kay pachallatachu, munayninmanjina apaykachan, manaqa ñuqanchiktapis munayninmanjina apaykachayta munawanchik. Jinamanta Diosmanta karunchanawanchikpaq (1 Pedro 5:8). Chaywanpis, mana manchachikunachu, imaraykuchus Diosqa may atiyniyuq, jarkʼaytataq munawanchik.

Mana kay padrenuestro nisqanmanjinallachu Diosmanta mañakusunman. Kay 1 Juan 5:14 imasmantawanchus, mañakuyta atisqanchikta niwanchik. Chaypi nin: “Chayrayku munayninman jinachus imallatapis mañakunchej chayqa, yachanchej pay uyarinawanch/ejta”, nispa. Kayqa ima llakiymantapis Diosman willakuyta atisqanchikta niyta munan, imaraykuchus payqa willakusqanchikta mana pisipaqchu qhawan (1 Pedro 5:7).

Chantá, maykʼaqchus, maypichus mañakunamanta, ¿imatá nisunman? ¿Imallatapis Biblia kaymanta niwanchikchu? Kay tapuymanqa qhipan yachaqanapi kutichikunqa.