Runakunaqa yayayku mañakuytan astawanqa mañakunku. Ichaqa chay mañakuypi imatachus mañakusqankutaqa wakillanmi entiendenku. Waranqanpi runakunan chayta sapa kutilla mañakunku, manaña entiendenkuchu imachus mañakushasqankuta chaypas. Jesusqa manan chay pasanantaqa munarqanchu. ¿Imaynapin chayta yachanchis?

Manaraq mañakuyta yachachishaspan pay kikin nirqan: “Mañakushaspaqa aman kaq simikunallatachu yapa-yapamanta rimanki”, nispa (Mateo 6:7). Chhaynaqa Jesusqa manan umallanchismanta kuti-kutirispa kaq simikunawan mañakunanchispaqchu yachachirqan. Jesusqa yachachirqan imakunamantachus mañakusunman chaytan. Chayraykun Mateo 6:9-13 textopi Jesuspa yachachisqan mañakuymanta t’aqwirisunchis.

Jesusqa discipulonkunatan yuyarichirqan imatapas Taytanchis Jehová Diosmanta mañakunankuta. Ichaqa, imanaqtinmi chaymanta nin: ¿“Sutiyki ch’uyapaq jap’isqa kachun”, nispa?

Qallariymantapachan Diospa sutinqa llullakuykunawan tumpasqa calumniasqa ima karqan. Enemigon Satanasmi paymanta nirqan: “Diosqa llullan, manan jujkunaq allinninta munanchu, manataqmi derechonpichu kamasqankunata kamachinanpaq”, nispa (Génesis 3:1-6). Satanaspa ladonmanta kaqkunaqa yachachinkun: “Diosqa rumi sonqon, vengakuq millay Diosmi”, nispa. Wakintaq astawanraq ninku: “Manan Dioschu imatapas kamarqan”, nispa. Wakinqa Diospa sutintan Bibliamanta orqopurqanku, prohibirqankutaq rimanankutapas.

Biblian willan Diosqa tukuy mana chanin ruwaykunata tukuchipunanta (Ezequiel 39:7). Chayta ruwaspaqa runakunaq tukuy problemantan allichapunqa. ¿Imaynatan chayta ruwanqa? Qatimuqpi Jesuspa mañakusqanta t’aqwirisun.

Kay tiempopiqa religionkunapi umallikunan imaymanata Diospa gobiernonmanta yachachinku. Jesuspa tiemponpiqa manan chhaynachu karqan. Ñaupa tiempopi judío runakunaqa allintan yacharqanku Bibliapi profeciakunaq nisqanta. Chaypin nirqan juj ajllasqa Salvaq, Diospa gobiernonpi kamachikunanta, jinaspa chay gobierno mundontinpi runakunaq allinninpaq kananta (Isaías 9:6, 7; Daniel 2:44). Diospa gobiernonmi Saqraq llullakuspa rimasqankunata sut’iman orqonqa, Saqratapas wijch’unqa, tukuy ruwasqankunatapas chinkachinqa. Ejemplopaq, chinkachipunqan guerrakunata, onqoykunata, wañuytapas (Salmo 46:9; 72:12-16; Isaías 25:8; 33:24). Chhaynaqa Diospa gobiernon jamunanpaq sapa kutilla mañakuspaqa, chay promesankuna cumplikunanpaqmi mañakushanchis.

Chay simikunan sut’ita rikuchin Diospa munaynin kay pachapi ruwakunanta, imaynan janaq pachapipas ruwakunña jinata. Chayqa karqan churin Jesús Satanasta ejercitontawan atipaspa kay pachaman wijch’uykamuqtinmi (Apocalipsis 12:9-12). Chay jinata mañakuyqa yuyarichiwanchismi Diospa munayninta noqanchispamantaqa aswan importantepaq qhawarinanchista. Diospa munaynin ruwakullaqtinmi tukuy kamasqakunaq allinninpaq kanqa. Jesuspunin ch’uya mana juchayoq runaña kashaspapas nirqan: “Ama munasqaychu kachun, aswanpas qanpa munasqayki”, nispa (Lucas 22:42).

Jesusqa rimallarqantaqmi mañakuyninchispi imachus necesitasqanchista mañakuy atisqanchista. Manan juchachu sapa p’unchay necesitasqanchista qowananchispaq mañakuyqa. Chayta ruwaspaqa reconocenchismi Dios “runakunaman “kausayta, samayta, tukuy imaymanatawan” qosqanta (Hechos 17:25). Bibliaqa Diostan rijch’anachin juj munakuq taytawan, chay taytaqa imachus necesitasqankuta wawakunaman qospan kusikun. Manataqmi jayk’aqpas wawankunataqa ima mana allintapas ruwanmanchu.

¿Imamantan perdonasqa kayta necesitanchis? Askha runakunaña ninku: “Juchaqa manan kanchu” nispa chaypas, Bibliaq willasqanman jinaqa jucha kaqtinmi imaymana problemakuna kan, wañuypas. Juchayoqñataq nacenchis chayqa, imaymanapin pantanchis, jinaspa chaywan Diosta phiñachinchis. Chhaynaqa wiñaypaq kausayta munanchis chayqa, Dios perdonawananchistan necesitanchis (Romanos 3:23; 5:12; 6:23). Biblian nin Jehová Diosqa sumaq sonqo kasqanta, perdonaykuwananchispaqpas makilla kashasqanta (Salmo 86:5).

Runakunaqa necesitashanchispunin Dios yanapaykuwananchista pakaykuwananchistapas. Yaqapaschá askha runakuna mana creenkuchu cheqaqta “Saqra” kananpaq. Ichaqa, Jesuspaqqa Saqraqa cheqaqpaqpunin karqan, chaymi Saqrata suticharqan “kay pachata kamachiq” nispa (Juan 12:31; 16:11). Kay pachantinta wajllichispa munayninta ruwasqanmantapas, Saqraqa cristianokunatapas wajllichiytan munawanchis. Chhaynapi Jehová Dioswan ama amistadta ruwananchispaq (1 Pedro 5:8). Ichaqa manan chayraykuchu mancharikunanchis Diosqa aswan kallpayoqmi cuidawasuntaqmi amigonkunataqa.

Diosmantaqa imaymanakunatan mañakusunman. 1 Juan 5:14 chaykunamanta nishan: “Imataña Diospa munayninman jina mañakusunchis chaypas, Diosqa uyariwasunmi”, nispa. Chhaynaqa Jehová Diosmanqa imatapas willasunmanmi llakichiwasqanchista, payqa manan mana valeqta jinachu chaykunataqa qhawarinqa (1 Pedro 5:7).

¿Ima nisunmantaq maypi ima ratopi mañakuymantari? ¿Willashanchu Diospa Palabran chaykunata? Qatimuqpin chayta yachasun.