KUA kapikiia te reira ko te pure rongonui roa atu i roto i te Akonoanga Kerititiano. Me e mea tika te reira e me kare, ko te pure a Iesu​—tei kapikiia e ko te Pure a te Atu me kore E to Matou Metua​—kare te manganui e mārama i tona aiteanga. E mirioni ua atu tangata tei tuatua taokioki i te reira i te au rā ravarai, penei e maata te taime i te rā okotai. Inara kare a Iesu i akakoro ana kia pera tatou me pure. Akapeea tatou i kite ei?

I mua ake ka apii ei a Iesu i tana au pipi kia pure, karanga aia: “E kia pure kotou, auraka e maata te tuatua rikiriki puapinga kore.” (Mataio 6:7) Kua akakoro ainei a Iesu kia taokioki te tuatua mou ngakau na roto i teia pure? E mea papu kare! Mari ra, te apii ra a Iesu eaa ta tatou ka pure, e te oronga ra i te au mea puapinga kia akamanako tatou me pure. Ka akara meitaki tatou i tana tuatua. Kua tataia teia pure ia Mataio 6:​9-​13.

Akamaara a Iesu ki tana au pipi kia pure ua rai ratou ki tona Metua ko Iehova. Kua kite ainei koe eaa te ingoa o te Atua i puapinga roa ai e te tumu ka anoanoia kia tapu te reira, me kore kia akatapuia?

Mei muatangana mai, kua akakinoia te ingoa tapu o te Atua no te au pikikaa. Kua kapiki te enemi o te Atua ko Satani ia Iehova ei Tutara noinoi e te pikipikikaa e kare ona tika kia akaaere i Tana au mea i anga. (Genese 3:​1-6) E manganui tei turu ia Satani, ma te apii e e Atua aroa kore, kino e e viviki aia i te akaapa me kore kare Nana i anga i te au mea ravarai. E tetai pae, kua akaatea ratou i tona ingoa ko Iehova ki vao i te au urianga Pipiria e kua karanga e auraka e taangaanga i te reira.

Akaari mai te Pipiria e ka akatikatika te Atua i teia au manamanata. (Ezekiela 39:7) Me rave aia i te reira, ka akatupu aia i toou au anoano e ka akatikatika i toou au manamanata. Akapeea ra? Pau a Iesu i te reira i roto i tana i tuatua i muri mai.

I teia tuatau, e tukeke te manako o te au orometua akonoanga no runga i te Patireia o te Atua. Inara mei ta te au pipi a Iesu i kite, kua totou ke ana te au peroveta a te Atua no runga i te Mesia, te Akaora ta te Atua i iki ei tutara i te Patireia te ka taui i teianei ao. (Isaia 9:6, 7; Daniela 2:​44) Ka akatapu te reira i te ingoa o te Atua na te akakite atea anga i ta Satani au pikikaa e ka takore ia Satani e tana au angaanga. Ka akakore te Patireia o te Atua i te tamaki, te maki, te onge e te mate. (Salamo 46:9; 72:12-​16; Isaia 25:8; 33:24) Me pure koe kia tae mai te Patireia o te Atua, te pure ra koe kia akatupu pouroaia teia au taputou.

Te akaari maira ta Iesu tuatua e e mea papu ka tupu to te Atua anoano i te enua nei mei tei tupu i te rangi, te ngai e noo ra te Atua. Kare e apinga tei tāpu i to te Atua anoano mei te tupu anga i te rangi; kua tamaki te Tamaiti a te Atua ia Satani e tana au angera e kua uriia ratou ki raro i te enua nei. (Apokalupo 12:​9-​12) Ko teia te toru o te patianga i roto i te pure a te Atu, tei aite ki te nga patianga mua e rua, ka tauturu ia tatou kia akamanako i te mea puapinga maata​—te anoano o te Atua, kare to tatou uaorai. No te Atua te anoano te ka apai mai i te au akameitakianga maata ki tana au mea i anga. No reira a Iesu, e tangata apa kore, i karanga ai ki tona Metua: “Kia tupu ra toou anoano, auraka toku.”​—Luka 22:42.

Akaari mai ta Iesu tuatua e ka rauka ia tatou te pure no to tatou au anoano. Kare i te mea tarevake kia pure ki te Atua no to tatou au anoano o te oraanga i te au rā. Te tika me akapera tatou, ka akamaara tatou e ko Iehova “tei oronga mai i te ora, e te aʼo, e te au mea katoa, ki te au mea ravarai.” (Angaanga 17:25) Akaari mai te Pipiria e mei te metua aroa aia tei rekareka i te oronga ki tana tamariki te au mea ta ratou e anoano ra. Inara mei te metua meitaki, kare aia e akatika i te au patianga me kare te reira i te mea meitaki no ratou.

Ka anoanoia ainei kia akakore te Atua i ta tatou ara? Kare te manganui i teia tuatau e mārama eaa te ara e e mea kino tikai te reira. Inara akamārama mai te Pipiria e ko te ara te tumu tikai o te au manamanata kino, na te reira e akatupu i te mate. I te mea kua anauia tatou ma te ara, ka ara putuputu tatou katoatoa, e ko to tatou manakonakoanga anake e rauka ai te ora mutu kore koia oki me akakore te Atua i ta tatou ara. (Roma 3:​23; 5:​12; 6:​23) E mea pumaana te kite e te karanga ra te Pipiria: “Te meitaki ra oki koe, e [Iehova], e kua tika ia koe i te akakore mai i te ara nei.”​—Salamo 86:5.

Kua kite ainei koe e ka anoano vivikiia te paruruanga a te Atua? Kare te manganui e irinaki e te vai ua ra a Satani, te vaerua “kino.” Inara kua apii a Iesu e e tika tikai a Satani e kua kapiki iaia “te ariki o teianei ao.” (Ioane 12:31; 16:11) Kua akavare a Satani i to teianei ao e nana e akaaere i te reira, e ka inangaro katoa aia i te akavare ia koe kia kore koe e akatupu i tetai pirianga vaitata ki toou Metua ko Iehova. (1 Petero 5:8) Inara, e ririnui atu a Iehova ia Satani e te rekareka ra aia i te paruru i te aronga i inangaro Iaia.

Kare teia akamāramaanga poto no te au manako maata i roto i ta Iesu pure i akakite mai i te au mea ravarai ka pure tatou. E akamaara, akakite mai a 1 Ioane 5:​14 no runga i te Atua: “Kia pati ua atu tatou i te au mea ravarai i tau iaia ra, te akarongo maira aia ia tatou.” No reira auraka e manako e e mea puapinga kore ua toou au manamanata no te akakite i te reira ki te Atua.​—1 Petero 5:7.

Akapeea ra te ora e te ngai? E puapinga ainei te reira me pure tatou?