Молитва. Пала со вой трэбуй тэ авэл?
ИСИН кацаво гиндо, кай лэ Иисусостири ашунгли молитва, пэ сави дэкала ԥэнэн лэ Ӷосподостири молитва или Отче наш, и христианоря ԥэнэн со май часто. Но сар бы тэ на авэл, бут мануша полэн ла нэправильно. Милионоря мануша ӷанэн ла наизусть и ԥэнэн ла кажно дес, ай можэт и най еқварэс андо дес. Но о Иисусо на камэлас, кай кадэя молитва тэ ԥэнэн упалэ и упалэ. Катар амэ када ӷанас?
Англа кода, сар о Иисусо тэ ԥэнэн кадэя молитва, во ԥэндя: «Кала мангэнпэ, на ԥэнэн упалэ кодэла жэ алава» (Матфея 6:7). Жылоп о Иисусо против корко пэстэ тэ ԥэндоп, кай и мануша трэбуй тэ висытён наизусть кадэла алава и тэ ԥэнэн упалэ и упалэ? Канешно най! Наоборот, о Иисусо сыкадя, пала со трэбуй тэ мангаспэ. Давайте май драго подаса дума пала кадэя молитва, сави запистромэ андэ Матфея 6:9—13.
«Амаро Дад по нэбо, мэк тиро алав авэл свынто».
О Иисусо ԥэндя пэстирэ учениконэнди, кай трэбуй тэ мангэнпэ лэстирэ Дадэсти, лэ Иеговасти. Ай ӷанэн тумэ, васо лэ Дэвлэско алав кацаво дэ важно и васо во трэбуй тэ авэл свынто?
Инке тоди, кала о Дэл кати создал лэ пэрвонэ манушэн, пэ Дэвлэско свынто алав андярдэ хохаимос. О Сатана, саво жыля против о Дэл, ԥэндя по Иегова, кай во хохавно и ни пала кастэ на гиндой. Ай инке ԥэндя важ о Иегова, кай во правителё, савэстэ нинай право тэ хулаий пэ пэстирэ тварении (Бытие 3:1—6). Бут ко терделя пэ Сатанастири риг. Вонэ линэ тэ гиндон, кай о Дэл жэстоко и можэт тэ рий, если о мануш шылисайля. Ай инке и мануша гиндон, кай лэ Дэвлэс вообще нинай. Авэр мануша жылэ против лэ Дэвлэско алав Иегова, кала улинэ кадэва алав анда Библии и заԥэндэ, кай и мануша тэ на ԥэнэн лэс.
Андэ Библия ԥэнэнпэ, кай о Дэл улэла вся кадэя нэсправедливость (Иезекииль 39:7). Кала о Дэл када стерэла, во дэла лэ манушэнди вся, со лэнди трэбуй. Ай инке во улэла всаворэ проблемы. Сар во када стерэла? О атвето исин андэ кадэя жэ лэ Иисусостири молитва.
«Мэк авэл тиро царство».
Адес и барэ мануша анда веры, савэ сытярэн пала Дэл, по разному полэн, со када лэ Дэвлэско Царство. Но и мануша, савэ ашунэнас лэ Иисусос, ӷанэнас пала кода, со дэлмут росԥэнэнас лэ Дэвлэстирэ пророкоря. Вонэ ԥэнэнас, кай о Христос, савэс витидя о Дэл, правия андо Царство, саво парувэла вся, со исин андэ люма (Исаия 9:6, 7; Даниил 2:44). Кадэва Царство, стерэла, кай лэ Дэвлэско алав тэ авэл свынто, кала доԥэнэна, кай о Сатана хохадя по о Иегова. Кадяжэ кадэва Царство улэла всавори лэ Сатанастири дила и умарэла лэс. Кала лэла тэ правий лэ Дэвлэско Царство, тоди будэр на авэна войны, насвалимос, боқалимос и дажэ смэрть (Псалом 46:9; 72:12—16; Исаия 25:8; 33:24). Кала тумэ мангэнпэ пала кода, кай тэ авэл лэ Дэвлэско Царство, тумэ мангэн, кай всаворэ кадэла обещянии тэ исполняца.
«Мэк тири воля авэла и пэ ԥув, сар по нэбо».
Па лэ Иисусостирэ алава дицол, кай лэ Дэвлэстири воля трэбуй тэ авэл пэ ԥув кадя жэ, сар вой исин по нэбо, кай жувэл о Дэл. Нисо нэ можэт тэ мишыий, кай по нэбо тэ на авэл лэ Дэвлэстири воля. Котэ лэ Дэвлэско Шаво воевал против о Сатана и лэстирэ бэнга и во сшутя лэн пэ ԥув (Откровение 12:9—12). Кадэя трито просьба, сар и дуй авэр, анда лэ Иисусостири ашунгли молитва, поможый амэнди тэ шас сама по само важно. Када пэ Дэвлэстири воля, ай най пэ кода, со амэ камас. Кала терас кадя, сар камэл о Дэл, када анэн лашимос всаворэнди. Дажэ о Иисусо, о совершэно мануш, ԥэндя пэстирэ Дадэсти: «Мэк вся авэл най кадя, сар мэ камав, ай сар камэс ту» (Луки 22:42).
«Дэ амэнди адес марно».
Потом о Иисусо ԥэндя, кай андэ молитва, амэ трэбуй тэ на бистрас и пала пэстэ. Када нармально тэ мангас лэ Дэвлэс пала кода, со амэнди трэбуй по кажно дес. Кацавэ молитвы дэн амэнди тэ на бистрас, кай о Иегова «дэл всаворэнди и жызня, и кай тэ ԥурдэн, и вся со трэбуй» (Деяния 17:25). Андэ Библия росԥэнэнпэ, кай о Дэл, сар любящё дад, савэсти чалёл тэ дэл кода, со фартэ трэбуй лэстирэ бэятонэнди. Но во, сар лашо дад, на лэла тэ дэл пэстирэ бэятонэнди кода, со вонэ мангэн, если диқэл, кай лэнди када на анэна лашимос.
«Простисар амэнди амарэ ӷрехоря».
Па чачимастэ амэ дошалэ англа Дэл? Трэбуй амэнди, кай о Дэл амэн тэ простий? Бут мануша адес на полэн, со када ӷрехо и пэ скати во дэ серьёзно. Но андэ Библия ԥэнэнпэ, кай через о ӷрехо амэндэ всаворэ проблемы, и кай во андярэл каринг и смэрть. Через кода, кай амэнди пэрэжыля о ӷрехо, амэ часто терас нэправильно. Ай кай амэндэ тэ авэл и вечно жызня, пала сави о Дэл дя алав, трэбуй кай о Дэл амэн тэ простий (Римлянам 3:23; 5:12; 6:23). Сар жэ амэн лэн лэ одестар и алава, савэ запистромэ андэ Библия. Котэ ԥэнэнпэ, кай о Иегова добро и ӷотово тэ простий (Псалом 86:5).
«Фэрисар лэ Найлашэстар».
Полэн тумэ, пэ скати трэбуй, кай о Дэл тумэн тэ фэрий? Бут мануша на камэн тэ патян, кай исин о «Найлашо», о Сатана. Но о Иисусо ԥэндя, кай о Сатана па чачимастэ исин и кай во «хулаий всаворя люмаса» (Иоанна 12:31; 16:11). О Сатана фартэ найдраго влияет пэ мануша, савэнца правий. Во фартэ камэл тэ на домэкэл и тут, тэ пашос каринг тиро Дад, Иегова (1 Петра 5:8). Но о Иегова пэ бутэстэ май зорало, чем о Сатана. О Иегова радуийпэ, кала фэрий кодэлэс, ко лэс любий.
Амэ роздиқлям дэсавэ маменторя анда ашунгли лэ Иисусостири молитва. И канешно, када най вся, пала со амэ можэм тэ мангаспэ. Вспомним кода, со ԥэнэнпэ пала Дэл андэ 1 Иоанна 5:14: «Со бы амэ тэ на мангас лэ Дэвлэстар, во ашунэл амэн». Важ када, на трэбуй тэ гиндон, кай тумаро ԥаримос най пэ скати дэ важно, кай тэ мангэн лэ Дэвлэс пала када (1 Петра 5:7).
Ай кала и кай трэбуй тэ мангаспэ?
Тути кадяжэ можэт тэ авэл интересно
СТОРОЖЭВО БАШНЯ
Молитва. Кала и кай ла тэ ԥэнас?
Уӷан, со андэ Библия пистромэ пала кода, кала и кай трэбуй тэ мангаспэ.
ESSENTIAL BIBLE TEACHINGS
Со када лэ Дэвлэско Царство?
Кала о Иисусо росԥэнэнас важ о Дэл, май бут всаворэстар во дэлас дума пала лэ Дэвлэско Царство. Ужэ най ек шэл бэрш и христианоря мангэнпэ, кай тэ авэл кадэва Царство.