Sambela

4 Aye wa a lingbi e sambela ndali ni?

A TENE so sambela so Jésus afa na adisciple ti lo la na yâ ti akodoro mingi aChrétien kue ayeke kiri na ndo ni fani mingi. Atâa a yeke tâ tënë wala a yeke tâ tënë pëpe, tapande ti sambela so Jésus afa ni na adisciple ti lo (so mingi ni azo airi ni sambela ti adisciple wala Babâ ti e so ayeke na yayu) azo mingi agbu ndani pëpe. Lâ oko oko, azo kutu mingi ayeke kiri na ndo ti atënë ni fani mingi, peut-être mingi ni na yâ ti lango ni. Me Jésus ahunda lâ oko pëpe ti tene a sara tongaso. E hinga ni tongana nyen?

Kete kozoni si Jésus afa sambela so, lo tene: “Tongana mo yeke sambela, mo kiri gi na ndo ti tënë oko fani mingi pëpe.” (Matthieu 6:7). Jésus ake tënë so lo fa kozo so awe, ni la lo zia na sese mbeni sambela ti tene azo amanda ni na li na ala tene ni na kiringo na ndo ti atënë ni fani mingi? A yeke tongaso pëpe! Jésus ayeke fa lani na e gi aye so a lingbi e sambela ndali ni, nga lo fa polele akota ye so a lingbi e bata ni na li ti e na ngoi so e yeke sambela. Zia e kiri e bâ nzoni tënë so lo tene lani. A yeke wara sambela so na Matthieu 6:9-13.

“Babâ ti e so mo yeke na yayu, zia a sara si iri ti mo aga nzoni-kue.”

Jésus adabe ti adisciple ti lo so a lingbi ala tene asambela ti ala kue na Jéhovah, Babâ ti lo. Me mo hinga ndani so iri ti Nzapa ayeke kota mingi nga ndani so a lingbi a sara si aga nzoni-kue?

Gi na tongo nda ti mbaï ti azo, iri ti Nzapa so ayeke nzoni-kue abuba. Satan so ayeke wato ti Jéhovah atene so Jéhovah ayeke zo ti mvene, lo yeke mbeni Mokonzi so apensé gi na lo wani nga so ayeke na droit pëpe ti komande na ndo ti aye kue so Lo créé (Genèse 3:1-6). Azo mingi amû peko ti Satan, ala fa na azo so Nzapa ayeke na ndoye pëpe, lo yeke sioni, lo yeke bata zo na bê nga ala ke même so lo la lo yeke Wasarango ye kue. Ambeni azi même iri ti Jéhovah na yâ ti Bible na ala kanga lege na azo ti sara kusala na ni.

Bible afa so Nzapa ayeke leke ande atënë so kue (Ézéchiel 39:7). Na sarango tongaso, lo yeke sara si mo wara aye kue so mo yeke na bezoin ni nga lo yeke leke akpale ti mo kue. Lo yeke sara ni tongana nyen? Kiringo tënë ni ayeke na yâ ti atënë so Jésus atene na pekoni.

“Zia royaume ti mo aga.”

Laso a yeke fa aye kirikiri mingi na ndo ti Royaume ti Nzapa na yâ ti abungbi ti vorongo nzapa. Me, tongana ti so azo so amä Jésus lani ahinga, aprophète ti Nzapa afa kozoni awe so Messie, Sauveur so Nzapa asoro lo, ayeke komande na ndo ti Royaume so ayeke sara si aye achangé na yâ ti dunia (Ésaïe 9:5, 6; Daniel 2:44). Royaume ti Nzapa ayeke sara ande si iri ti  Nzapa aga nzoni-kue na sigingo na nda ti Satan nga na pekoni ayeke kinda Satan na akusala ti lo kue. Royaume ti Nzapa ayeke sara ande si bira, kobela, nzara na même kuâ aduti dä mbeni pëpe (Psaume 46:10; 72:12-16; Ésaïe 25:8; 33:24). Tongana mo sambela ti tene Royaume ti Nzapa aga, andâ mo yeke sambela ti tene azendo so kue aga tâ tënë la.

“Zia a sara ye so bê ti mo aye, na yayu legeoko nga na ndo ti sese.”

Atënë ti Jésus so afa so a yeke sara ande biani ye so bê ti Nzapa aye na ndo ti sese ge tongana ti so a sara na yayu, ndo so Nzapa ayeke dä. Mbeni ye ti kanga lege si a sara pëpe ye so bê ti Nzapa aye na yayu ayeke pëpe; kâ na yayu, Molenge ti Nzapa atiri bira na Satan nga na a-ange so amû peko ti lo na lo bi ala na sese (Apocalypse 12:9-12). Na yâ ti tapande ti sambela so Jésus afa, ota ye ni legeoko na akozo use ye ni amû maboko na e ti zia lê ti e na ndo ti ye so ayeke kota ahon tanga ni kue: ye so bê ti Nzapa aye me pëpe ye so bê ti e aye. A yeke ye so bê ti Nzapa aye la ayeke ga lakue na aye so ayeke nzoni ahon atanga ni kue na création kue. Ni la, même Jésus so alingbi kue atene na Babâ ti lo atene: “Zia a sara ye so bê ti mbi aye pëpe, me a sara ye so bê ti mo aye.”​—Luc 22:42.

“Mû na e kobe ti e ti lango ni.”

Na pekoni Jésus afa so e lingbi nga ti sambela ndali ti aye so e yeke na bezoin ni. Aye so e yeke tâ na bezoin ni lâ oko oko, a yeke sioni pëpe ti sambela ndali ni. Biani, sarango tongaso ayeke dabe ti e so Jéhovah ayeke lo so “amû na azo kue fini, mbö nga na aye kue.” (Kusala 17:25). Bible afa so lo yeke mbeni nzoni babâ so ayeke na ngia ti mû na amolenge ti lo ye so ala yeke na bezoin ni. Ye oko, tongana ti mbeni nzoni babâ, lo yeke mû na ala pëpe mbeni ye so ala hunda ni so alingbi ti sara sioni na ala.

“Pardone akuda so ayeke na li ti e.”

Kuda ti Nzapa ayeke biani na li ti mo? Mo yeke na bezoin ti tene lo pardone mo? Mingi ti azo laso ahinga pëpe ye so a iri ni siokpari nga na akpale so siokpari aga na ni. Me Bible afa so siokpari la ayeke na gunda ti akpale ti e so ayeke sioni mingi. A yeke tongaso teti so ni la ayeke na gunda ti kuâ ti azo. Teti so a dü e awasiokpari, e kue e yeke sara siokpari fani mingi nga e yeke wara fini ti lakue lakue gi tongana Nzapa apardone e (aRomain 3:23; 5:12; 6:23). Bê ti e adë ti hinga so Bible atene: “Mo, [Jéhovah, FD], Mo yeke nzoni, na Mo ye ti pardone.”​—Psaume 86:5.

“Zi e na maboko ti Zo ti sioni.”

Mo bâ so mo yeke biani na bezoin ti tene Nzapa abata mo hio, ndali ti so mbeni zo nde ti sara ni ayeke dä pëpe? Azo mingi ake ti yeda so Satan,“Zo ti sioni”, ayeke dä. Me Jésus afa so Satan ayeke dä biani, lo iri même lo “mokonzi ti dunia so”. (Jean 12:31; 16:11). Satan asara si dunia so lo komande na ndo ni aga sioni nga lo ye mingi ti tene mo nga kue mo ga sioni tongaso si mo lê kpengba songo pëpe na Jéhovah, Babâ ti mo (1 Pierre 5:8). Ye oko, Jéhovah ayeke ngangu mingi ahon Satan na Lo yeke na ngia ti bata azo so aye Lo.

E bâ na nduru tënë akota ye so ayeke na yâ ti tapande ti sambela so Jésus afa. Me tapande ti sambela so afa pëpe aye kue so e lingbi ti sambela ndali ni. Dabe ti mo so 1 Jean 5:14 atene na e tënë so na ndo ti Nzapa: “Atâa ye wa e hunda, tongana a gue oko na ye so bê ti lo aye, lo yeke mä e.” Ni la, sara mbeto pëpe na tenengo so akpale ti mo ayeke kete mingi ti tene mo fa ni na Nzapa na yâ ti sambela.​—1 Pierre 5:7.

Me ti ngoi nga na ti ndo so a lingbi e sambela dä, a yeke ti lo tongana nyen? A yeke biani kota ye?