4 O ā Mea e Tatalo Atu Ai?

E IAI se tatalo ua taʻua e sili ona lauiloa i tatalo uma a Kerisiano. Pe moni pe lē moni, ae e toʻatele tagata e lē malamalama i le tatalo faaaʻoaʻo a Iesu, lea e taʻua o le Tatalo a le Alii po o Lo Matou Tamā. Ua tauloto e le faitau miliona o tagata i aso taʻitasi upu o lenā tatalo, ma e masalo pe faafia ona fai i le aso. Ae e lē o le auala lenā na finagalo Iesu e fai ai lenā tatalo. E faapefea ona tatou iloa?

A o leʻi faia lenā tatalo, na fetalai Iesu: “Pe a e tatalo, aua le tautū i upu masani.” (Mataio 6:7) Pe na feteenaʻi manatu o Iesu, auā na mulimuli ane ia taʻua upu e ao ona manatua ma taʻua i tatalo? E leai! Ae na aʻoaʻo mai e Iesu i tatou i mea e ao ona tatalo atu ai, ma faamanino mai mea e ao ona faatāua pe a tatalo. Seʻi o tatou iloiloina totoʻa upu o lana tatalo. O loo faamauina i le Mataio 6:9-13.

Ae faapefea le taimi ma le nofoaga? Pe e tāua le taimi ma le nofoaga e tatalo ai?

“Lo matou Tamā e o i le lagi, ia faapaiaina lou suafa.”

Na faamanatu atu e Iesu i ona soo, o tatalo uma e tatau ona tuusaʻo atu i lona Tamā, o Ieova. Ae pe e te iloa le māfuaaga e tāua tele ai le suafa o le Atua, ma le pogai e ao ai ona faapaiaina?

Ua taʻupepeloina le suafa paia o le Atua talu mai le amataga o le tagata. Ua taʻua e le fili o le Atua, o Satani, Ieova o se Pule e pepelo, manatu faapito, ma e leai sana aiā moni e pulea ai Ana foafoaga. (Kenese 3:1-6) E toʻatele tagata ua ʻau atu iā Satani, i le aʻoaʻoina e faapea e lē alofa le Atua, e sauā ma taui ma sui, pe aʻoaʻo foʻi e leai se Atua. Ua teena e isi le suafa o Ieova, i le aveesea lea mai i faaliliuga o le Tusi Paia ma faasā ona faaaogā lenā suafa.

Ua taʻua i le Tusi Paia o le a faasaʻo e le Atua nei mea lē tonu uma. (Esekielu 39:7) O le faia faapea, o le a ia faamalie ai ou manaʻoga uma ma foʻia ou faafitauli uma. E faapefea? E maua le tali i upu e sosoo ai o le tatalo a Iesu.

“Ia oo mai lou malo.”

Ua matuā fenuminumiaʻi faifeʻau o lotu i aso nei e uiga i le Malo o le Atua. Ae na iloa e tagata na aʻoaʻo e Iesu, ua leva ona valoia e perofeta a le Atua o le a pulea e le Mesia, o le Faaola na filifilia e le Atua, se Malo o le a suia le tulaga o mea i le lalolagi. (Isaia 9:6, 7;  Tanielu 2:44) O le a faapaiaina ai le suafa o le Atua i le faaalialia lea o pepelo a Satani, ona faatoʻilaloina ai lea o ia ma ana galuega uma. O le a faamuta e le Malo o le Atua ia taua, maʻi, oge faapea foʻi le oti. (Salamo 46:9; 72:12-16; Isaia 25:8; 33:24) Pe a e tatalo ia oo mai le Malo o le Atua, o lenā ua e tatalo ia faataunuuina na folafolaga uma.

“Ia faia lou finagalo i le lalolagi, e pei ona faia i le lagi.”

O nei upu a Iesu ua taʻu mai ai, e pei ona faia le finagalo o le Atua i le lagi, le mea e afio ai o Ia, o le a faia foʻi la i le lalolagi. Sa leʻi taofia le faia o le finagalo o le Atua i le lagi, lea na tau ai le taua a le Alo o le Atua ma Satani ma ana ʻau, ma lafo mai ai i latou i le lalolagi. (Faaaliga 12:9-12) Ua fesoasoani lenei talosaga lona tolu o le tatalo faaaʻoaʻo, e pei foʻi o uluaʻi talosaga e lua, e tatou te taulaʻi atu ai i mea e sili ona tāua, o le finagalo lea o le Atua, ae e lē o o tatou lava loto. O lona finagalo e faia ai pea mea e sili ona lelei mo ana foafoaga uma. Na faapea atu foʻi Iesu i lona Tamā: “E lē o loʻu loto, ae ia faia lou finagalo.”—Luka 22:42.

“Ia e foaʻi mai i le aso nei a matou meaʻai.”

Ua faaalia ai e Iesu, e mafai foʻi ona tatalo atu mo o tatou manaʻoga. E lē leaga pe a tatalo atu i le Atua mo mea e tatou te manaʻomia e faaaogā i aso taʻitasi. O le faia faapea ua tatou manatua ai o Ieova o lē e “foaʻi mai lava i tagata uma le ola, ma le mānava, ma mea uma lava.” (Galuega 17:25) Ua taʻua i le Tusi Paia o ia o se matua alofa e finagalo e foaʻi atu i lana fanau mea e latou te manaʻomia. Ae i le pei foʻi o se matua alofa, e na te lē taliaina ni talosaga mo mea e lē lelei iā i latou.

“Faamagalo mai i a matou agasala.”

Pe e te manaʻomia le faamagaloga a le Atua? E toʻatele tagata i aso nei ua manatu māmā i le matuiā o le agasala. Ae ua taʻua i le Tusi Paia, o le agasala o le pogai lea o o tatou faafitauli, auā o le māfuaaga lea o le maliliu o tagata. Talu ai ua fananau mai ma le agasala, o lea e tatou te agasala ai pea, ae o le faamagaloga a le Atua e tatou te maua ai le ola e faavavau. (Roma 3:23; 5:12; 6:23) O se faamāfanafanaga le iloaina ua taʻua i le Tusi Paia: “Ieova e, o oe e lelei ma ua e nofosauni e faamagalo.”—Salamo 86:5.

“Ia laveaʻi iā i matou mai i lē o loo leaga.”

Po o e iloa o loo e matuā manaʻomia le puipuiga a le Atua? O le toʻatele o tagata e lē talitonu o loo iai “lē o loo leaga,” o Satani. Ae na aʻoaʻo e Iesu e iai moni lava Satani, ma ua taʻua o ia o “le pule o lenei lalolagi.” (Ioane 12:31; 16:11) Ua faaleagaina e Satani lenei lalolagi o loo ia pulea, ma e matuā manaʻo e faasesēina oe, ia aua neʻi iai sa oulua mafutaga vavalalata ma lou Tamā o Ieova. (1 Peteru 5:8) Peitaʻi, e sili atu ona malosi Ieova nai lo o Satani, ma e finagalo e puipui i latou o ē e alolofa iā te Ia.

O lenā aotelega puupuu o manatu tāua o le tatalo faaaʻoaʻo a Iesu, e lē o aofia ai mataupu uma e mafai ona tatalo atu ai. Ia manatua, ua taʻua i le 1 Ioane 5:14 e uiga i le Atua: “Po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou.” Aua la e te manatu e lē fia faafofoga le Atua i ou faafitauli.—1 Peteru 5:7.