4 Yini Lokufanele Siyithandazele?

UMTHANDAZO waJesu losibonelo kutsiwa nguwo losetjentiswa kakhulu kuyo yonkhe imithandazo yemaKhristu. Ngisho nobe loku kuliciniso nobe cha, bantfu labanyenti abawucondzi kahle lomthandazo, loye ubitwe ngekutsi nguMthandazo WeNkhosi nobe Babe Wetfu. Tigidzi tebantfu tiwusho njengesilandzelo malanga onkhe, mhlawumbe ngisho netikhatsi letinyenti emkhatsini welilanga. Jesu abengakahlosi kutsi lomthandazo usetjentiswe ngalendlela. Sikwati njani loku?

Asengakawusho nje lomthandazo, Jesu watsi: ‘Nanithandazako, ningalibali kuphindzaphindza tintfo letifananako.’ (Matewu 6:7, NW.) Jesu wabese uyatiphikisa yini ngekutsi asho emavi lokufanele akhunjulwe futsi aphindvwaphindvwe? Cha! Kunaloko, Jesu abesifundzisa ngetintfo lokufanele sitithandazele, futsi asiniketa netintfo lokufanele tite kucala nasithandaza. Asesinakisise loko lakusho. Lomthandazo utfolakala encwadzini yaMatewu 6:9-13.

“Babe wetfu losezulwini, alingcweliswe libito lakho.”

Jesu abekhumbuta balandzeli bakhe kutsi ngaso sonkhe sikhatsi kufanele bathandaze kuBabe wakhe, longuJehova. Uyati yini kutsi kungani libito laNkulunkulu libaluleke kangaka futsi lidzinga nekungcweliswa?

Kusukela ekucaleni kwemlandvo webantfu, libito laNkulunkulu lelingcwele liye lahlanjalatwa. Sitsa saNkulunkulu lesinguSathane siye sambita ngekutsi nguMbusi lonemanga, lonebugovu, kanye nalote ligunya lekubusa indalo yaKhe. (Genesisi 3:1-6) Bantfu labanyenti bayavumelana naSathane, futsi bafundzisa kutsi Nkulunkulu akanandzaba, unelunya, futsi akacoleli, nobe bavele baphike kutsi unguMdali. Labanye balihlasele libito lakhe lelitsi Jehova, bate balikhipha emahumushweni eliBhayibheli, futsi batsi akukafaneli lisetjentiswe.

LiBhayibheli litsi Nkulunkulu utawukulungisa konkhe lokungalungi. (Hezekeli 39:7) Ngekwenta njalo, utawenetisa tonkhe tidzingo takho futsi acatulule netinkinga takho. Utawukwenta njani loko? Emavi lalandzelako emthandazo waJesu asiniketa imphendvulo.

“Umbuso wakho awute.”

Lamuhla, bafundisi betinkholo badideke kakhulu mayelana neMbuso waNkulunkulu. Kodvwa njengobe tilaleli taJesu betati, baphrofethi baNkulunkulu bebavele babiketele kutsi Mesiya, longuMsindzisi lokhetfwe nguNkulunkulu, abetawubusa eMbusweni lotawugucula  umhlaba. (Isaya 9:6, 7; Danyela 2:44) Utawungcwelisa libito laNkulunkulu ngekutsi weneke emanga aSathane, futsi uncobe nayo yonkhe imisebenti yakhe. UMbuso waNkulunkulu utawucedza timphi, kugula, indlala—ngisho nekufa imbala. (Tihlabelelo 46:9; 72:12-16; Isaya 25:8; 33:24) Nawuthandazela kutsi uMbuso waNkulunkulu ute, usuke uthandazela kutsi tonkhe letetsembiso tigcwaliseke.

“Intsandvo yakho ayentiwe emhlabeni, njengobe yentiwa ezulwini.”

Lamavi aJesu asho kutsi intsandvo yaNkulunkulu itawukwenteka mbamba emhlabeni, njengobe kunjalo nasezulwini lapho Nkulunkulu ahlala khona. Intsandvo yaNkulunkulu ezulwini ayizange ivinjwe lutfo; iNdvodzana yakhe yalwa naSathane kanye nebangani bakhe, futsi yabajikijela emhlabeni. (Sembulo 12:9-12) Njengeticelo tekucala letimbili, lesicelo sesitsatfu salomthandazo losibonelo sisisita kutsi sinake intfo lebaluleke kakhulu—lokuyintsandvo yaNkulunkulu, hhayi yetfu. Intsandvo yakhe ihlale iyizuzisa yonkhe indalo. Ngako-ke, ngisho naJesu, longumuntfu lote sono watsi kuBabe wakhe: “Noko kungabi ngentsandvo yami, kodvwa akwenteke intsandvo yakho.”—Lukha 22:42.

“Siphe lamuhla kudla kwetfu.”

Jesu wase uveta nekutsi singatithandazela tidzingo tetfu. Akusikubi kuthandaza kuNkulunkulu mayelana netintfo lesitidzingako tamalanga onkhe. Ecinisweni, kwenta njalo kusikhumbuta kutsi nguJehova “loniketa imphilo nekuphefumula nako konkhe kubantfu bonkhe.” (Imisebenti 17:25) LiBhayibheli lisitjela kutsi ungumtali lonelutsandvo lokujabulelako kuniketa bantfwana bakhe tintfo labatidzingako. Nanobe kunjalo, njengemtali lomuhle, angeke atiphendvule ticelo letingeke tisizuzise.

“Sitsetselele tono tetfu.”

Uyatenta yini vele tono kuNkulunkulu? Uyayidzinga yini intsetselelo yakhe? Lamuhla, bantfu labanyenti abasacondzi kutsi sono siyini kanye nekutsi siyintfo lenkhulu kangakanani. Kodvwa liBhayibheli lifundzisa kutsi sono siyimbangela yetinkinga tetfu letinkhulu, ngobe ngiso lesenta kutsi bantfu bafe. Njengobe satalwa njengetoni, sonkhe siyona tikhatsi letinyenti, futsi kute sitfole litsemba lelikusasa lelihlala njalo sidzinga intsetselelo yaNkulunkulu. (Roma 3:23; 5:12; 6:23) Kuyasikhutsata kwati kutsi liBhayibheli litsi: “Wena, Nkhosi, ulungile futsi ulungele kutsetselela.”—Tihlabelelo 86:5.

‘Usisindzise kulomubi.’

Uyacaphela yini kutsi sivikelo saNkulunkulu usidzinga kakhulu nangekushesha kangakanani? Bantfu labanyenti abafuni kukholelwa kutsi ‘lomubi’ longuSathane ukhona. Jesu wafundzisa kutsi Sathane ukhona mbamba, wate wambita ngekutsi ‘ngumbusi walelive.’ (Johane 12:31; 16:11) Sathane wente kutsi lelive lalibusako libe libi, futsi angatsandza nekukwenta kutsi ube ngumuntfu lomubi, akuvimbele ekutseni wakhe buhlobo lobusedvute naBabe wakho longuJehova. (1 Phetro 5:8) Nanobe kunjalo, Jehova unemandla kakhulu kunaSathane futsi uyakujabulela kuvikela labo labamtsandzako.

Ngekuhlolisisa emaphuzu layinhloko emthandazo waJesu, asikatihlanganisi tonkhe tintfo lesingatithandazela. Khumbula kutsi umbhalo wa-1 Johane 5:14 usho naku ngaNkulunkulu: “Nasicela lutfo kuNkulunkulu ngekwentsandvo yakhe, uyasiva.” Ngako-ke, ungakhatsateki ngekutsi tinkinga takho atikabaluleki kangako kutsi ungathandaza ngato kuNkulunkulu.—1 Phetro 5:7.

Kutsiwani-ke, ngesikhatsi kanye nendzawo? Kunendzaba yini kutsi sithandaza nini futsi kuphi?