Orasaun

4 Kona-ba saida deʼit?

TUIR ema barak nia hanoin, orasaun Ami Aman, neʼebé Jesus hanorin, mak orasaun ida neʼebé ema kristaun iha mundu tomak repete dala barak liu. Maski nuneʼe, ema barak ladún komprende orasaun neʼe. Ema rihun ba rihun iha toman atu halo orasaun neʼe loron-loron, no karik sira repete dala barak iha loron ida nia laran. Maibé, Jesus la hanorin ema atu dekór ka repete fila-fila orasaun neʼe. Oinsá mak ita hatene ida-neʼe?

Antes Jesus hanorin ema orasaun Ami Aman, nia hatete: “Wainhira imi reza, keta koʼalia barak [“repete leet deʼit liafuan sira”, Bíblia Sagrada Para o Terceiro Milénio da Encarnação].” (Mateus 6:7) Se nuneʼe, nia hakarak ema atu dekór ninia orasaun ka lae? Lae! Tuir loloos, Jesus hanorin ita kona-ba buat neʼebé ita bele hatoʼo, no buat neʼebé importante liu atu temi iha ita-nia orasaun. Mai ita hanoin didiʼak kona-ba liafuan sira iha orasaun Ami Aman. Orasaun neʼe hakerek iha Mateus 6:9-13.

 Buat neʼebé ita aprende kona-ba Jesus nia orasaun hatudu buat neʼebé ita bele hatoʼo iha ita-nia orasaun. Maibé ita mós bele halo orasaun kona-ba buat seluk tan. Hanoin-hetan 1 Joao 5:14 neʼebé hatete: “Wainhira ita husu buat ruma tuir [Maromak] nia hakarak, nia rona ita.” Entaun, Ita bele fiar duni katak Ita bele halo orasaun ba Maromak hodi hatoʼo buat saida deʼit neʼebé halo Ita laran-susar.—1 Pedro 5:7.

Maibé, oinsá kona-ba oras no fatin atu halo orasaun? Ida-neʼe importante ka lae?

“Ami Aman iha lalehan, halo Ita naran sai santu.”

Jesus nia liafuan neʼe fó-hanoin nia dixípulu sira katak orasaun hotu tenkesér hatoʼo ba nia Aman, neʼebé naran Jeová. Maibé ita hatene tansá mak importante atu halo orasaun kona-ba Maromak nia naran? Tansá mak Maromak hakarak nia naran sai santu?

Husi tempu ulukliu, Maromak nia inimigu Satanás hafoʼer Maromak nia naran hodi hasaʼe lia-bosok oioin. Nia hatete katak Maromak Jeová mak bosok-teen, no Ukun-Naʼin aat neʼebé la iha direitu atu ukun Ninia kriatura sira. (Gênesis [Kejadian] 3:1-6) Ema barak apoia Satanás hodi hanorin katak Maromak la hanoin ema, laran-aat no gosta atu fó susar ba ema, ka sira nega katak la iha Kriadór. Ema seluk fali halakon Maromak Jeová nia naran husi sira-nia tradusaun Bíblia no bandu ema atu temi Maromak nia naran.

Bíblia hatete katak Maromak sei rezolve lia-bosok sira-neʼe hotu no hamoos ninia naran. (Ezequiel [Yehezkiel] 39:7) Hodi halo nuneʼe, nia mós sei halakon ita-nia problema hotu no sei fó buat hotu neʼebé ita presiza. Oinsá? Jesus nia liafuan tuirmai mak sei fó resposta ba pergunta neʼe.

“Halo Ita-nia reinu toʼo mai ami.”

Ohin loron, sira neʼebé hanorin relijiaun iha hanoin neʼebé la hanesan kona-ba Maromak nia Reinu, ka ukun. Maibé, ema neʼebé rona Jesus iha tempu neʼebá hatene buat neʼebé profeta sira hakerek nanis kona-ba Mesias. Neʼe mak Mesias, ka Salvadór neʼebé Maromak hili, sei ukun Maromak nia governu neʼebé sei halakon problema hotu iha mundu neʼe. (Isaías [Yesaya] 9:6, 7; Daniel 2:44) Mesias nia ukun neʼe sei halo Maromak nia naran sai santu hodi hatudu ho klaru katak lia neʼebé Satanás hasaʼe kona-ba Maromak mak bosok, no halakon Satanás no buat aat hotu neʼebé nia halo. Maromak nia Ukun neʼe sei halakon funu, moras, hamlaha, no mós mate. (Salmo [Mazmur] 46:9; 72:12-16; Isaías [Yesaya] 33:24; Apokalipse 21:4) Kuandu ita husu Maromak nia Reinu, ka ukun, atu mai, neʼe katak ita husu atu Maromak nia promete sira-neʼe sai loos iha rai.

“Halo tuir Ita-nia hakarak ba iha rai nuʼudar iha lalehan.”

Jesus nia liafuan neʼe halo ita fiar duni katak Maromak nia hakarak sei sai loos iha rai. Tanbasá? Bíblia hatudu katak Maromak halo tiha ona ninia hakarak iha lalehan, ninia hela-fatin. Maromak halo ida-neʼe hodi fó kbiit ba nia Oan atu halo funu hasoru Satanás no ninia anju aat sira, no duni tun sira ba rai. (Apokalipse 12:7-12) Jesus nia liafuan neʼe mós ajuda ita atu hatene katak Maromak nia hakarak mak importante liu ita rasik nia hakarak. Jesus hanorin ita atu harohan kona-ba Maromak nia naran, Maromak nia Ukun, no Maromak nia hakarak. Tuir loloos, Maromak nia hakarak mak sempre lori bensaun furak ba ninia kriatura hotu. Tan neʼe, maski Jesus ema sala-laek, maibé nia hatete ba ninia Aman: “Halo tuir laʼós haʼu-nia hakarak, maibé Ita-nian bá.”—Lucas 22:42.

“Haraik ai-han loroloron nian mai ami.”

Tuirmai Jesus hatudu katak ita mós bele halo orasaun kona-ba ita rasik nia presiza. Sin, la sala atu husu Maromak atu haraik ita-nia presiza loron-loron nian. Tuir loloos, hodi halo ida-neʼe ajuda ita atu la haluha katak Maromak Jeová mak Ida neʼebé “fó moris no iis no buat hotu” mai ita. (Apostolu 17:24) Bíblia hatudu katak Maromak Jeová hanesan aman ida neʼebé hadomi nia oan sira no nia kontente atu fó buat neʼebé sira presiza. Maibé, hanesan aman ida neʼebé diʼak, Maromak mós sei la hatán kuandu nia oan sira husu buat neʼebé sei la lori diʼak ba sira-nia an.

“Haraik perdua ba ami-nia tusan.”

Ita loloos iha tusan ba Maromak ka lae? Ita presiza Maromak atu fó perdua mai ita ka lae? Ohin loron ema barak la hanoin tan kona-ba sala no rezultadu aat husi sala. Maibé, Bíblia hanorin katak sala mak hun ba problema neʼebé ema hotu la bele hasees an, neʼe mak mate. Ita hotu moris mai nuʼudar ema sala-naʼin, no ita halo sala beibeik, maibé hodi hetan Maromak nia perdua, neʼe mak dalan ida deʼit atu ita bele iha esperansa ba futuru. (Roma 3:23; 5:12; 6:23) Ita bele sente kmaan duni hodi hatene buat neʼebé Bíblia hatete: “Ita, oh, Jeová, diʼak no prontu atu fó perdua.”—Salmo (Mazmur) 86:5.

“Hasai ami husi buat aat [“Aat-Naʼin”, Bíblia Sagrada].”

Ita hatene ka lae, tansá mak ita presiza duni atu Maromak proteje ita? Ema barak lakohi fiar katak “Aat-Naʼin”, Satanás, loloos iha. Maibé Jesus hatudu katak Satanás iha duni no bolu nia nuʼudar “ukun-naʼin mundu neʼe nian”. (Joao 12:30; 16:11) Loos, Satanás mak kontrola mundu no nia hamosu buat aat iha mundu neʼe. No nia mós hakarak tenta Ita atu halo buat neʼebé aat, hodi hapara Ita atu haburas relasaun besik ho Ita-nia Aman, Jeová. (1 Pedro 5:8) Maibé, Maromak Jeová iha kbiit boot liu Satanás, no Maromak hakarak duni proteje sira neʼebé hadomi nia.

[Dezeñu iha pájina 7]