4 Awui akɔna wahombaso

Nɔmbaka?

DƆMBƐLƆ di’ɛnyɛlɔ mbele dɔmbɛlɔ dioleki Akristo nɔmba. Oyadi ɛtɛkɛta ɛsɔ wekɔ mɛtɛ kana bu, ekɔ mɛtɛ di’anto efula hawoshihodia dɔmbɛlɔ di’ɛnyɛlɔ diaki Yeso dielamɛ tena dimɔtshi ɔnɛ Dɔmbɛlɔ dia Nkumadiɔndjɔ kana Disambɛ dia Shɛso. Miliyɔ y’anto mbutaka ɛtɛkɛta wa dɔmbɛlɔ sɔ lushi tshɛ, ondo mbala efula oseka lushi tshɛ. Koko Yeso konongamɛ di’ampokami ande kambaka la dɔmbɛlɔ sɔ lo yoho ya ngasɔ. Ngande weyaso dikambo sɔ?

Yema tshitshɛ la ntondo ka nde mbalakanya dɔmbɛlɔ sɔ, Yeso akatɛ ambeki ande ate: “Lo nɔmba [Nzambi], tanyɔcɔbɔlake efula.” (Mateu 6:7, Dyookaneelo dy’Oyooyo) Onde Yeso akayânya lo mbetsha ambeki ande ɛtɛkɛta wakawahombe nkimɛ ndo kalolɛka mbala la mbala? Kema, koko Yeso akatolakanyaka akambo wahombaso nɔmbaka ndo nde akatɛnyaka hwe kɛnɛ kahombaso mbetshaka lo dihole dia ntondo etena kalɔmbaso. Ɛsɔ tɔsɛdingole dɔmbɛlɔ sɔ dimɛna dimɛna. Diɔ fundama lo Mateu 6:9-13.

“Shesu le l’ulungu, lukumbu laye la[kidiame].”

L’ɛtɛkɛta ɛsɔ, Yeso akohola ambeki ande dia alɔmbɛlɔ tshɛ pombaka tshɔka otsha le Jehowa She. Ko onde wɛ mbeyaka lande na kele lokombo laki Nzambi lekɔ ohomba efula ndo bonde kahombalɔ kidiama?

Oma ko etatelo k’ɔkɔndɔ w’ana w’anto, wambomamatanyiya lokombo l’ekila laki Nzambi awui wa kashi efula. Satana lele otunyi waki Nzambi akate dia Jehowa ekɔ Omboledi wa kashi ndo wa lokaki wele kema la lotshungɔ la nɔmbɔla ditongami diande. (Etatelu 3:1-6) Anto efula wambeta la Satana wedi lo mbetsha dia Nzambi ekɔ etshitshitshitshi, ngala ndo kaloyaka kɔlɔ lo kɔlɔ kana ɔnɛ nde kema Otungi. Anto akina wambokoma polo ndo lo mɔnyɔla Jehowa lo minya lokombo lande oma lo Bible yakadimolawɔ ndo lo nshimba anto dia vɔ nkamba lalɔ.

Bible mɛnyaka dia Nzambi ayonya awui wa kɔlɔ asɔ tshɛ. (Ezekiyele 39:7) Lo nsala ngasɔ, nde ayokotsha ehomba ayɛ tshɛ ndo ayokandola ekakatanu ayɛ tshɛ. Ngande wayondosala dikambo sɔ? Ɛtɛkɛta waki Yeso wayela mbishaka okadimwelo.

“Diulelu diaye diayi.”

Ɛlɔ kɛnɛ, embetsha w’ɛtɛmwɛlɔ hawoshihodia elewɔ Diolelo diaki Nzambi. Koko oko wakadieyaka ampokami waki Yeso, aprɔfɛta waki Nzambi wakatatshi edja efula la ntondo dia Mɛsiya Oshimbedi wakasɔnama oma le Nzambi ayɔlɔmbɔla Diolelo diayotshikitanya andja  ɔnɛ. (Isaya 9:6, 7; Danyele 2:44) Diɔ diayokidia lokombo laki Nzambi lo ntondja kashi yaki Satana sɛkɛ ndo lo ndanya Satana l’etsha ande tshɛ. Diolelo diaki Nzambi diayokomiya ata, hemɔ, ndjala ndo nyɔi. (Osambu 46:9; 72:12-16; Isaya 25:8; 33:24) Etena kalɔmbayɛ dia Diolelo diaki Nzambi ndja, wɛ nɔmbaka dia alaka asɔ tshɛ kotshama.

“Lulangu laye latshami la kete uku atshamalo l’ulungu.”

Ɛtɛkɛta waki Yeso ɛsɔ mɛnyaka dia lolango laki Nzambi layosalema la nkɛtɛ oko wasalemalɔ l’olongo lɛnɛ odjashi Nzambi. Ndoko onto lakakoke nshimba dia lolango laki Nzambi salema l’olongo. Ɔnaki Nzambi akalɔ ta la Satana l’andjelo ande ko akawakadja la nkɛtɛ. (Enyelo 12:9-12) Oko dui dia ntondo la dia hende, dui dia sato ka dɔmbɛlɔ di’ɛnyɛlɔ tokimanyiyaka dia sho mbidja yimba lo kɛnɛ koleki ohomba, mbuta ate lo lolango laki Nzambi, koko aha lo lolango laso shoamɛ. Lolango laki Nzambi mbatoshaka ditongami diande kɛnɛ koleki dimɛna le wɔ nshi tshɛ. Ɔnkɔnɛ, kânga Yeso onto la kokele akatɛ She ate: “Kuku aha uku alangami, keli uku alangaye.”—Luka 22:42.

“Utusha mbu ya nde ya la lushi la lushi elo.”

Oma lâsɔ, Yeso akɛnya dia sho kokaka nɔmba ndo lo dikambo di’ehomba aso hita. Bu kɔlɔ nɔmba Nzambi dia nde tokotshɛ ehomba aso wa l’emunyi wa lushi la lushi. Lo mɛtɛ, nsala ngasɔ toholaka dia Jehowa ekɔ ɔnɛ “[l]atushaka tshe lumu, luwi, la diango tshe.” (Etsha 17:25) Bible mɛnyaka dia nde ekɔ ombutshi wa ngandji watɔngɛnangɛnaka dia mbisha anande kɛnɛ kewɔ l’ohomba. L’ɛnyɛlɔ k’ombutshi wa dimɛna, nde hatoshaka anande kɛnɛ kele bu dimɛna.

“Utudimanyia kolo yasu.”

Onde wɛ ekɔ l’ohomba w’edimanyielo kaki Nzambi? Anto efula ɛlɔ kɛnɛ hawoyeya ele pɛkato ndo ɔnɛ tɔ kekɔ kɔlɔ efula. Koko Bible mbetshaka dia pɛkato kekɔ kiɔkɔ yoleki woke y’efukutanu wele la so ndo ɔnɛ tɔ mbakonya anto lo nyɔi. Lam’ele sho mbotɔka atshi wa pɛkato, sho salaka pɛkato mbala la mbala ndo dia sho nkondja lɔsɛnɔ la pondjo, tekɔ l’ohomba w’edimanyielo kaki Nzambi. (Romo 3:23; 5:12; 6:23) Ekɔ tshondo y’ekeketshelo dia sho mbeya kɛnɛ kata Bible ɔnɛ: “We Khumadiondjo keli ololo, katetawoka nyimanyia antu kolo.”—Osambu 86:5.

‘Ototshungole oma le kanga kɔlɔ.’

Onde wɛ mbeyaka dia wɛ ekɔ l’ohomba w’efula w’ekokelo ka Nzambi? Anto efula hawetawɔ dia Satana ‘kanga kɔlɔ’ ekɔ, koko Yeso aketsha ambeki ande dia Satana ekɔ onto la mɛtɛ ndo nde akawelɛ ɔnɛ “umbuledi a kete nye.” (Joani 12:31; 16:11) Satana ambonganyiya andja ɔnɛ ndo nde kombolaka dia konganyiya ndo wɛ lawɔ lo koshimba dia wɛ monga la diɔtɔnganelo dia ma ma wɛ la Jehowa Shɛso. (1 Petero 5:8) Koko Jehowa ndeka Satana wolo la fwa ndo nde ngɛnangɛnaka nkokɛ wanɛ wôlanga.

Hatɔsɛdingodi vuiwui tshɛ yele lo dɔmbɛlɔ di’ɛnyɛlɔ diaki Yeso lo sawo nɛ. Tohɔ dia 1 Joani 5:14 totɛka lo kɛnɛ kendana la Nzambi ɔnɛ: “Naka shu tayolomba engo uku lulangu landi, ndi ayutukela.” Ɔnkɔnɛ, toyakiyanyake dia wɛ hakoke mbutɛ Nzambi ekakatanu wele la yɛ l’ɔtɛ wewɔ totshitshɛ.—1 Petero 5:7.

Ko etena kakɔna ndo lende ahombaso nɔmbaka? Onde ekɔ ohomba nsɔna etena ndo dihole diahombaso nɔmbaka?