ORACIÓN

4 ¿Tuku naskinaw kkiʼoracionkan?

XLIPUTUM oraciones nema tlawakgo tiku wankgo pi kstalaninanin Cristo, lhuwa wankgo pi oración nema tlakg wankan wa nema masiyalh Jesús: wanikan padrenuestro. Pero na wa uma oración nema ni akgatekgskgo. Lhuwa millón latamanin chali chali tlawakgo uma oración, tantaku chu makglhuwa tlawakgo maski ni katsikgo tuku wamputun, pero Jesús ni xlakpuwan pi chuna xtlawaka. ¿Tuku xlakata liwana katsiyaw?

Xlakata, akxni nina xmasiya uma oración, xla wa: «Akxni ntlawayatit mioracionkan, ni makglhuwa ntiwana tu watiya ntachuwin» (Mateo 6:7). Jesús ni atanu tuku xʼama kamasiyani, ni xkawanilh kstalaninanin watiya watiya tachuwin xwankgolh akxni xtlawakgolh oración. Jesús xmasiyaputun tuku tlakg xlakaskinka naʼakxilhaw akxni natlawayaw oración. Wa xlakata, kaʼakxilhwi tuku kilhchanima uma oración nema wi kMateo 6:9-13.

«KinTlatikan nti wilapi nkakgapun, katamasantujlilh mintukuwini.»

Jesús pulana kamalakapastakalh kstalaninanin pi kajwatiya xTlat, Jehová, natlawanikgo oración. Pero ¿tuku xlakata alistalh wan pi natamasantujli xtukuwani?

Xlakata makgasa asta uku xtukuwani Dios nitlan lichuwinankanit. Xapuxku xtalamakgasitsin, Satanás, wan pi Jehová xaʼakgsanina chu xakstu paxkikan chu ni lakgchan namapakgsinan (Génesis 3:1-6). Tiku tatayakgo Satanás masiyakgo pi Dios nitu makgkatsi, nitlan likatsi chu kinkamalakgaxokgeyan, chu tuku tlakg nitlan, wankgo pi ni malakatsukinit tuku anan. Makgapitsi asta nialh wilikgo xtukuwani Dios kBiblia chu wankgo pi ni namaklakaskinaw.

Pero, Biblia wan pi Dios namasputu putum uma (Ezequiel 39:7). Chu akxni natlawa, na nalakkaxtlawa xtaʼakglhuwitkan latamanin. ¿La natlawa? Jesús kinkawaniyan.

«Kamilh milimapakgsin.»

Uku, tiku pulalinkgo takanajla tanu tanu tuku wankgo xlakata xTamapakgsin Dios. Kxkilhtamaku Jesús nachuna xwanit. Judíos liwana xkatsikgo tuku xwankanit xlakata Mesías, chatum lakgmaxtuna nema xlaksaknit Dios, tiku xʼama pulalin akgtum tamapakgsin nema xʼama lakgpali kakilhtamaku (Isaías 9:6, 7; Daniel 2:44). Wa uma xtamapakgsin Dios nema nalimasiya pi Satanás xaʼakgsanina, namasputu Akgskgawini chu putum tuku tlawanit, xlakata tlan namasantujli xtukuwani Jehová. Na namasputu guerra, tajatat, tatsinksni chu linin (Salmo 46:9; 72:12-16; Isaías 25:8; 33:24). Wa xlakata, akxni skinaw pi kamilh xTamapakgsin Dios, skimaw pi kakgantaxtulh tuku wanit natlawa.

«Wa nkatatlawalh ntu mintalakaskin, xtachuna lantla nkʼakgapun, nachuna kawa nkatiyatna.»

Uma tachuwin liwana kinkamasiyaniyan pi xtalakaskin Dios nakgantaxtu kKatiyatni chuna la kgantaxtucha kʼakgapun, akxni xKgawasa tlajalh Satanás chu xdemonios chu kamakamilh kKatiyatni (Apocalipsis [Revelación] 12:9-12). Uma pulaktiy nema akxilhwi, kinkamalakapastakayan pi pulana nawiliyaw xtalakaskin Dios chu ni wa tuku akinin lakaskinaw. Kajwatiya akxni natatlawa xtalakaskin Dios tlan nakakitaxtuni putum xtamalakatsukin. Asta Jesús maski ni xkgalhi talakgalhin, wa: «Wampi ni wa nkintalakaskin nkatatlawalh, wampi wa ntu mila» (Lucas 22:42).

«Kakinkamaxki nkinchujkan ntu xala chali chali.»

Jesús na wa pi na tlan naskinaw tuku maklakaskinaw. Tlan naskiniyaw Dios pi kakinkamaxkin tuku maklakaskinaw chali chali. Akxni chuna tlawayaw, limasiyayaw pi wa Jehová «maxkiy latamat nkaxatikawaj, chu ntajaxan, cha xlipaks nkatuwaj» (Hechos 17:25). Biblia tamalakxtumi la chatum tlat xapaxkina, xatapaxuwan kamaxki xkamanan tuku maklakaskinkgo. Xlikana, maski naskinikgo, nikxni katikamaxkilh tuku nakatlawani tuku nitlan.

«Kakinkamatsankganani» kintalakgalhinkan.

¿Tuku lakliniyaw Jehová? ¿Chu tuku xlakata maklakaskinaw nakinkamatsankgananiyan o nakinkatapatiyan? Maski lhuwa wankgo pi ni anan talakgalhin o ni lu nakuentajtlawaniyaw, wa malakatsuki laklanka taʼakglhuwit chu linin chuna la wan Biblia. Chu komo kgalhiyaw talakgalhin akxni lakachinaw, tlawayaw tuku makgalipuwan Dios. Wa xlakata, komo putum kilhtamaku latamaputunaw, lu xlakaskinka nakinkatapatiyan Dios (Romanos 3:23; 5:12; 6:23). Pero Biblia na kinkamalakapastakayan pi Jehová tlan likatsi chu kinkatapatiputunan (Salmo 86:5).

“Kakinkalakgmaxtu ktuku nitlan.”

Lu talakaskin pi kakinkamakgtayan Dios. Max lhuwa ni kanajlakgo pi lama “tuku nitlan”, wa Satanás. Pero Jesús xkatsi pi lama, asta limapakuwilh «xapuxku yunu nkatuxawat» (Juan 12:31; 16:11). Maski laktlawama chu pulalima kakilhtamaku la lakaskin, Akgskgawini na kinkalaktlawaputunan chu ni lakaskin pi tlan natalalinaw kinTlatkan, Jehová (1 Pedro 5:8). Pero ni pekuaniyaw, Dios tlakg tliwakga chu kamakgtayaputun tiku paxkikgo.

 Xlikana, anan lhuwa tuku tlan naskiniyaw Dios. Anta 1 Juan 5:14 limasiya pi tlan lhuwa tuku naskinaw, xlakata wan: «Lapi wi mpala tu kskiniw, wa lantlata xtalakaskin, wa nakinkakgaxmatniyan». Wamputun pi tlan nawaniyaw Dios tuku lilakgaputsayaw, xlakata katsiyaw pi xlakaskinka akxilha tuku nawaniyaw (1 Pedro 5:7).

¿Chu tuku nawanaw xlakata niku chu tukuya kilhtamaku natlawayaw oración? ¿Lichuwinan xTachuwin Dios xlakata uma? Nakakgalhtiyaw umakgolh takgalhskinin kʼatanu artículo.