Kasi Tikwenera Kulomba Vici?
NI LUROMBO ulo ŵanthu ŵakuwerezgawerezga comene kuluska malurombo ghose gha Ŵakhristu. Kwali mbunenesko panji yayi, kweni lurombo ulo Yesu wakasambizga, ulo ŵanyake ŵakuti Lurombo lwa Fumu panji Lurombo lwa Ŵadada Ŵithu, nchimoza mwa cinthu ico ŵanthu ŵanandi ŵali kucipulikiskira mphuvya. Ŵanthu ŵanandi ŵali kusungilira waka pa mtima lurombo ulu, ndipo ŵakuluyowoya zuŵa lililose, panji kanandi waka pa zuŵa. Kweni Yesu wakakhumbanga kuti ndivyo ticitenge na lurombo ulu yayi. Kasi tikumanya wuli?
Pambere wandayowoye lurombo ulu, Yesu wakayowoyerathu kuti: “Para ukulomba, ungayowoyanga vinthu vimoza pera mwakuwerezgawerezga cara.” (Mateyu 6:7) Sono kasi Yesu wakajisuskanga yekha mwa kusambizga lurombo lwakuti ŵanthu ŵanjizgenge pa mtima na kuyowoya mwakuwerezgawerezga? Yayi. M’malo mwake, Yesu wakatisambizganga waka ivyo tingalomba, kweniso vinthu ivyo tikwenera kuviŵika pakwamba para tikulomba. Tiyeni tisande makora ivyo wakayowoya. Lurombo ulu luli pa Mateyu 6:9-13.
“Ŵadada ŵithu imwe muli kucanya, zina linu lituŵiskike.”
Apa Yesu wakakumbuskanga ŵalondezgi ŵake kuti malurombo ghose ghakwenera kupelekeka kwa Awiske, Yehova. Kweni kasi mukumanya cifukwa ico zina la Ciuta liliri lakuzirwa comene ndiposo cifukwa ico likwenera kutuŵiskikira?
Kufuma waka apo ŵanthu ŵakalengekera, zina la Ciuta labinkhiskika cifukwa ŵaliyowoyera mautesi ghanandi. Satana, uyo ni mulwani wa Ciuta, wakati Yehova ni mutesi, ni Muwusi wakujighanaghanira yekha uyo walije wenelero wa kuwuska vilengiwa Vyake. (Genesis 3:1-6) Ŵanthu ŵanandi ŵali kukolerana na Satana, ŵakusambizga kuti Ciuta wakupwelerako yayi za ise, ngwankhaza, wambura cigowokero, kweniso ŵakukana kuti ndiyo ni Mlengi. Ŵanyake ŵali kuwukira zina lake, ŵali kuwuskamo zina lakuti Yehova mu Mabaibolo agho ŵakung’anamura ndipo ŵakukanizga ŵanthu kuti ŵaleke kulizunura.
Baibolo likulongora kuti Ciuta wazamumazga vyose ivyo ŵanthu ŵakucitira zina lake. (Ezekiel 39:7) Para wazakacita nthena, wazamumazga masuzgo ghinu ghose na ivyo mukusoŵerwa. Kasi wazamucita wuli? Zgoro lili mu mazgu ghakulondezgapo agho Yesu wakayowoya mu lurombo ulu.
“Ufumu winu wize.”
Mazuŵa ghano, ŵasambizgi ŵa visopa ŵakumanya makora yayi kuti Ufumu wa Ciuta nchivici. Kweni ŵategherezgi ŵa Yesu ŵakamanyanga cifukwa nchimi za Ciuta zikaŵa kuti zayowoyerathu kuti Mesiya, uyo ni muwomboli wakusankhika na Ciuta, wazamuwusa Ufumu uwo uzamusintha caru. (Yesaya 9:6, 7; Daniel 2:44) Ufumu uwu uzamutuŵiska zina la Ciuta mwa kuvumbura mautesi gha Satana na kuwuskapo Satana na milimo yake yose. Ufumu wa Ciuta uzamuwuskapo nkhondo, ulwari, njara, nanga ni nyifwa. (Salmo 46:9; 72:12-16; Yesaya 25:8; 33:24) Para mukulomba kuti Ufumu wa Ciuta wize, mukulomba kuti malayizgo ghose agha ghafiskike.
“Khumbo linu licitike, umo kuliri kucanya, ntheura pera pa caru capasi.”
Ivyo Yesu wakayowoya vikulongora kuti khumbo la Ciuta lizamucitika nadi pa caru capasi nga umo likucitikira kucanya, uko Ciuta wakukhala. Palije ico cili kutondeskapo khumbo la Ciuta kucitika kucanya. Mwana wa Ciuta wakarwa nkhondo na Satana pamoza na viŵanda vyake na kuŵapondomoskera pa caru capasi. (Uvumbuzi 12:9-12) Fundo yacitatu iyi ya mu lurombo ulo Yesu wakasambizga yikuyana waka na fundo ziŵiri zakwambilira izo tanguwona, ndipo yikutovwira kuti timanye ivyo vikwenera kuŵa pakwamba para tikulomba. Khumbo la Ciuta ndilo likwenera kuŵa pakwamba, lithu yayi. Khumbo la Ciuta ndilo nyengo zose likupeleka vinthu viwemi ku vilengiwa vyake vyose. Lekani nanga ni Yesu, uyo ngwambura kwananga, wakaphalira Awiske kuti: “Khumbo linu licitike, lane cara.”—Luka 22:42.
“Mutipe muhanya uno cakurya cithu ca zuŵa ili.”
Pamanyuma, Yesu wakalongora kuti tingalomba vinthu ivyo tikusoŵerwa. Nchiheni yayi kulomba Ciuta vinthu ivyo tikusoŵerwa zuŵa na zuŵa. Nakuti kucita nthena kukutikumbuska kuti Yehova ndiyo “wakupeleka ku ŵanthu wose umoyo na mvuci na vinthu vyose.” (Milimo 17:25) Baibolo likulongora kuti Ciuta ni Dada wacitemwa uyo wakukhumba comene kupa ŵana ŵake ivyo ŵakusoŵerwa. Ndipouli, nga umo Dada muwemi wakucitira, Ciuta nayo wakupeleka yayi vinthu ivyo ŵanthu ŵakulomba para wawona kuti vilije candulo kwa iwo.
“Mutigowokere ngongoli yithu.”
Kasi mbunenesko kuti muli na ngongoli kwa Ciuta? Kasi mukukhumbikwira kuti wamugowokerani? Ŵanthu ŵanandi mazuŵa ghano ŵakumanya yayi kuti kwananga nchivici ndiposo kofya kwake. Kweni Baibolo likusambizga kuti kwananga ndiko kwapangiska vinthu viheni comene ivyo vikuticitikira, pakuti ndiko kuli kupangiska kuti tifwenge. Pakuti tikubabika ŵakwananga, tose tikwananga kanandi waka, ndipo tingazakasanga umoyo wamuyirayira pekha usange Ciuta wangatigowokera. (Ŵaroma 3:23; 5:12; 6:23) Nchakupembuzga kumanya kuti Baibolo likuti: “Imwe, A Yehova, ndimwe Muwemi, ndipo mukugowokera.”—Salmo 86:5.
“Mutiwombore kwa muheni.”
Kasi mukumanya kuti umoyo winu uli pangozi ndipo mukukhumbikwira kuti Ciuta wamuvikilirani? Ŵanandi ŵakukana kugomezga kuti Satana, uyo ni “muheni” waliko nadi. Kweni Yesu wakasambizga kuti Satana waliko, ndipo wakati ni “muwusi wa caru ici.” (Yohane 12:31; 16:11) Satana wananga caru ici, ico cili mu mawoko ghake, ndipo wakukhumba comene kumunangani kuti muleke kuŵa paubwezi na Awiskemwe a Yehova. (1 Petrosi 5:8) Kweni Yehova wali na nkhongono comene kuluska Satana ndipo ngwakunozgeka kuvikilira awo ŵakumutemwa.
Nkhani yifupi iyi yakulongosora fundo zikuru izo Yesu wakasambizga mu lurombo lwake, yikulongosora vyose yayi ivyo tingalomba. Pakuyowoya za Ciuta, kumbukani kuti lemba la 1 Yohane 5:14 likutiphalira kuti: “Kalikose ako tingalomba mwakuyana na khumbo lake, wakutipulika.” Ntheura, lekani kughanaghana kuti masuzgo ghinu ngambura kuzirwa mwakuti mungalomba yayi kwa Ciuta.—1 Petrosi 5:7.
Kweni kasi tingalomba nyengo wuli, ndipo tingalombera mpha? Kasi nyengo iyo tikulombera na malo agho tikulomberapo vili na kanthu?
Panji Mungatemwa Kuŵerengaso Nkhani Izi
GONGWE LA MULINDA
Kasi Tikwenera Kulomba Nyengo Wuli Ndipo Tikwenera Kulombera Nkhu?
Manyani usange Baibolo likuŵika nyengo iyo tingalombera kweniso malo.
VISAMBIZGO VYAKUZIRWA VYA MU BAIBOLO
Kasi Ufumu wa Chiuta Ni Vichi?
Pa uteŵeti wake wa pa charu chapasi, Yesu wakapharazga chomene vya Ufumu wa Chiuta. Kwa vyaka vinandi, ŵalondezgi ŵake ŵalutilira kulomba kuti Ufumu uwu wize.