4 ¿Kʼusitik xuʼ jkʼantik?
LI ORASION mas chalilanik li relijionetik xchʼunojik Cristoe jaʼ li kʼuyelan chanubtasvan Jesuse, ti ojtikinbil kʼuchaʼal padrenuestroe. Pe jech xtok, jaʼ li mas mu xaʼibeik smelolale. Ep miyon krixchanoetike chalilanik jujun kʼakʼal —bakʼintike ep ta velta chalik ta jun noʼox kʼakʼal—, pe muʼyuk tsnopik li kʼusi skʼan xale, pe li Jesuse muʼyuk laj yal mi jech skʼan pasel. ¿Kʼu yuʼun jech chkaltik taje?
Yuʼun kʼalal skʼan toʼox xal li orasion taje, xi laj yale: «Cʼalal ta xataic ta cʼoponel ti Diose, maʼuc noʼox ta xachaʼalolanic ti cʼusi laj xa avalique» (Mateo 6:7, Ti Achʼ Rextomento yuʼun ti Jesucristoe, ta skʼop Chamula). Kʼuchaʼal chkiltike muʼyuk laj yal ti jkomes ta joltik o jchaʼalilantik li kʼusi laj yale, ti jechuke la svalopatin sba stuk. Li kʼusi la skʼan laj yakʼ ta chanele, jaʼ ti jnaʼtikuk li kʼusi mas tsotsik skʼoplal skʼan jkʼantik li ta j-orasiontike. Jaʼ yuʼun, jchanbetik batel skʼoplal li orasion laj yakʼ ta chanel te ta Mateo 6:9-13.
«Jtotic Dios, te oyot ta vinajel, ichʼbiluc ta mucʼ abi.»
Li Jesuse la svulesbe ta sjol yajtsʼaklomtak ti jaʼ noʼox skʼan skʼoponik li Jeovae, ti jaʼ li sTote. Pe ¿kʼu yuʼun laj yal ta tsʼakal ti skʼan ichʼbiluk ta mukʼ o chʼultajesbel sbi li sTote?
Yuʼun kʼalal lik li kuxlejale, laj xa onoʼox yichʼ chopol kʼoptabel. Li Satanase, ti jaʼ mero yajkontrae, chal ti tsjut kʼop li Jeovae, ti tsaʼ slekilal stuke xchiʼuk ti mu sta-o spas ta mantal li spasbentake (Génesis 3:1-6). Li buchʼutik yakʼoj sbaik ta stojolal Satanase chalik ti muʼyuk xkʼuxul yoʼonton li Diose, ti simarone xchiʼuk ti chakʼ jtoj jmultike, maʼuk noʼox taje, chalik xtok ti maʼuk la spasoj skotol li kʼusitik oye. Jech xtok, li yantike stupʼojbeik li sbi Dios ta Vivliae xchiʼuk mu xakʼik ta tunesel.
Li Vivliae, chal ti Diose tslajes skotol taje (Ezequiel 39:7). Kʼalal mi la spase, ta spajesbe svokol xtok li krixchanoetike. ¿Kʼuxi chut? Li Jesuse chal kʼuxi chkʼot ta pasel.
«Acʼo sta yorail chapas mantal.»
Li avie, li jchanubtasvanejetik ta relijione mu stsak sba skʼopik ta sventa kʼusi jaʼ li Ajvalilal yuʼun Diose. Pe ta skʼakʼalil Jesuse snaʼojik lek kʼusi jaʼ. Li judioetike xojtikinik xa onoʼox lek li voʼneal albil kʼopetik ti chalbe skʼoplal jun Mesiase, ti jaʼ li Jpojvanej stʼujoj Diose. Li Mesías taje jaʼ tspas mantal sventa tsjel li kuxlejal liʼ ta balumile (Isaías 9:6, 7; Daniel 2:44). Li Ajvalilal yuʼun Dios taje, tstsal li Satanase xchiʼuk tslajesbe li yabteltake xchiʼuk chakʼ ta ilel li sjutbil kʼoptake, taje jaʼ sventa chchʼultajesbe sbi li Jeovae. Chakʼbe slajeb xtok li pas kʼope, li chameletike, li viʼnale xchiʼuk li lajelale (Salmo 46:9; 72:12-16; Isaías 25:8; 33:24). Jaʼ yuʼun, kʼalal ta jkʼanbetik Dios akʼo spas mantal li Ajvalilal yuʼune, yakalutik skʼanel ti xkʼot ta pasel li kʼusitik taje.
«Acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele.»
Taje chakʼ ta aʼyel ti chkʼot ta pasel ta Balumil li kʼusi tskʼan yoʼonton Diose. Li ta vinajel yoʼ bu oy li Diose, kʼotem xa ta pasel. Ikʼot ta pasel kʼalal li xNichʼon Dios la stsal li Satanás xchiʼuk spukujtake, xchiʼuk ti la sjip yalel tal ta Balumile (Apocalipsis 12:9-12). Li yoxtosal kʼusitik xuʼ jkʼantik ti laj xa kalbetik skʼoplale, tsvules ta joltik ti jaʼuk xbat ta koʼontontik li kʼusi tskʼan yoʼonton Diose, maʼuk li kʼusi tskʼan koʼontontike. Yuʼun mi kʼot ta pasel li kʼusi tskʼan yoʼontone ep tstabeik sbalil li spasbentake. Li Jesús eke akʼo mi tukʼil krixchano, xi laj yale: «Mu me xcʼot ta pasel cʼusi tscʼan coʼnton jtuc. Jaʼ acʼo cʼotuc ta pasel li cʼusi tscʼan avoʼntone» (Lucas 22:42).
«Acʼbun jveʼelcutic ta sventa li jun cʼacʼal liʼi.»
Li Jesuse laj yal xtok ti xuʼ jkʼantik li kʼusitik chtun kuʼuntike. Jech, mu chopoluk mi ta jkʼanbetik Dios ti xakʼbutik li kʼusitik chtun kuʼuntik jujun kʼakʼale. Kʼalal jech ta jpastike, chkakʼtik iluk ti jaʼ Jeova li buchʼu «ta xacʼ chijcuxiutic, xchiʼuc jaʼ ta xacʼ quichʼtic icʼ [xchiʼuk ti] jaʼ ta xacʼbutic scotol[e]» (Hechos 17:25). Li Vivliae tskoʼoltas ta jun totil ti xmuyubaj noʼox chakʼbe kʼusitik chkʼanbat yuʼun li xnichʼnabtake. Akʼo mi jech, muʼyuk chakʼbe mi snaʼoj ti xuʼ sta-o svokolike, akʼo mi tskʼanilanik.
«Pasbuncutic perdón yuʼun jmulcutic.»
¿Kʼusitik jmultik oy ta stojolal Dios? ¿Kʼu yuʼun skʼan xkichʼtik pasbel perton? Ep buchʼutik chalik ti chʼabal li mulile o ti mu tsotsuk skʼoplale, pe li Vivliae chal ti jaʼ ta skoj ti ep jvokoltik avie xchiʼuk jaʼ ta skoj ti chi jchamutike. Ta skoj ti jpas mulilutik chi jvokʼe, ep bu ta jsaʼ jmultik ta stojolal li Diose. Jaʼ yuʼun, mi ta jkʼan chi jkuxiutik sbatel osile, skʼan spasutik ta perton li Diose (Romanos 3:23; 5:12; 6:23). Li Vivliae chal ti toj lek yoʼonton xchiʼuk ep stsʼikemal yuʼun o toj lek xakʼ perton li Jeovae (Salmo 86:5).
«Coltauncutic loqʼuel ta scʼob li pucuje.»
Li krixchanoutike chtun xa tajek kuʼuntik ti chchabiutik li Diose. Xuʼ van oy buchʼutik chal ti chʼabal li Diabloe. Akʼo mi jech, li Jesuse snaʼoj ti kuxul li «pucuje», jech oxal laj yal ti jaʼ «banquilal jpasmantal liʼ ta banamile» (Juan 12:31; 16:11). Maʼuk noʼox tskʼan tsokes xchiʼuk tsbeiltas kʼuyelan tskʼan yoʼonton li balumile, tskʼan tsokesutik ek sventa mu xa lekuk xkil jbatik xchiʼuk li jTotik Jeovae (1 Pedro 5:8). Pe mu jxiʼtatik, yuʼun li Diose mas to ep svuʼel xchiʼuk oy ta yoʼonton chchabi li buchʼutik chkʼanate.
Maʼuk noʼox xuʼ jkʼanbetik Dios li kʼusitik laj xa kaltike, oy to yan. Li ta 1 Juan 5:14 xi chale: «Cʼalal oy cʼusi ta jcʼanbetic jech chac cʼu chaʼal tscʼan stuque, ta jnaʼtic ti ta xaʼay jcʼoptique». Jaʼ xkaltik, xuʼ xkalbetik Dios skotol li sloʼil koʼontontike, yuʼun jnaʼojtik ti tstsak ta venta li kʼusitik chkalbetike (1 Pedro 5:7).
Pe ¿kʼusi xuʼ xkaltik ta sventa ti bakʼin xchiʼuk bu ta pasel li orasione? ¿Mi tsots van tajek skʼoplal?
Xuʼ van chakʼupin skʼelel xtok liʼe
LI JKʼEL˗OSIL TA TOYOLE
5 ¿Bakʼin xchiʼuk bu ta pasel?
LI KʼUSI BAʼYEL SKʼAN JCHANTIK TA VIVLIAE
¿Kʼusi jaʼ li Ajvalilal yuʼun Diose?
Kʼalal la xchol mantal li Jesuse, jaʼ mas laj yalbe skʼoplal li Ajvalilal yuʼun Diose. Li krixchanoetike voʼne xa lik skʼanik ti xtal li ajvalilal taje.