ИИСУСЛЭН вӧсяськонэз, кудӥз «Инмысь Атаймы» вӧсяськон шуыса тодмо луэ, тужгес но вӧлмем вӧсяськон. Озьы ке но сое тросэз шонертэм валало. Трос миллион адямиос та вӧсяськонэз тодо но нуналлы быдэ олокӧня пол но верало. Нош Иисуслэн уг поты вал солэн дышетскисьёсыз та вӧсяськонэз мед дышетозы но нуналаз трос пол мед вералозы шуыса. Кытысь ми сое тодӥськомы?

Та вӧсяськонэз верамезлэсь азьло Иисус вераз: «Вӧсяськыкуды... мултэссэ [«одӥг мае ке ик выльысь но выльысь», ВД] эн вералэ» (Матфей 6:7). Малпалэ ай, Иисуслэн потысал ке, солэн дышетскисьёсыз та вӧсяськонэз мед дышетозы но сое нуналлы быдэ трос пол мед вералозы шуыса, верасал-а со та кылъёсты? Ӧй, ӧй верасал! Аслаз вӧсяськонэныз Иисус возьматӥз, кызьы но мар сярысь вӧсяськыны луоз. Ойдолэ пыр-почгес эскеромы солэсь вӧсяськонзэ. Со гожтэмын Матфейлэсь 6:9—13.

Иисус дышетскисьёсызлы тодазы вайытӥз, вӧсяськыны кулэ шуыса солэн Атаезлы гинэ, Иеговалы. Нош тодӥськоды-а тӥ, малы туж кулэ Инмарлэсь нимзэ тодыны но сое данъяны?

Нырысетӥ адямиосты кылдытэм бере ик Инмарлэн нимыз саптамын вал. Инмарлэн тушмонэз, Шайтан, вераз, Иегова пӧяськись, ассэ гинэ яратӥсь кивалтӥсь шуыса но солэн кивалтыны правоез ӧвӧл шуыса (Улон-вылон 3:1—6). Тросэз Шайтан пала кариськизы. Одӥгъёсыз малпало, Инмар лек, сюлэмтэм яке со воксё но ӧвӧл шуыса. Нош мукетъёсыз Инмарлэсь нимзэ Библиысь куштӥзы но солэсь нимзэ вераны ӧз лэзе ни.

Библиын верамын, Инмар ваньзэ сое тупатоз шуыса (Иезекииль 39:7). Со сюлмаськоз ми сярысь но вань курадӟонъёсты быдтоз. Кызьы? Та юанлы валэктон сёто Иисуслэн вӧсяськонысьтыз мукет кылъёс.

Туннэ религиозной кивалтӥсьёс пӧртэм сямен валэкто, мар со сыӵе Инмарлэн Эксэйлыкез. Нош Иисуслэн дышетскисьёсыз умой тодо вал Инмарлэн Эксэйлыкез сярысь азьпалзэ ивортонъёсты. Соос тодо вал, лыктоз шуыса Инмарен быръем Мессия, кудӥз Инмарлэн Эксэйлыказ кивалтоз но улонэз умой пала воштоз (Исаия 9:6, 7; Даниил 2:44). Озьы ик соос тодо вал, Инмарлэн Эксэйлыкез Шайтанлэсь пӧяськемзэ шараялоз, солэсь ужъёссэ куашкатоз, Шайтанэз быдтоз но Инмарлэсь нимзэ чылкытатоз шуыса. Со сяна, азьпалзэ ивортонъёсын верамын вал, Инмарлэн Эксэйлыкез пум поноз шуыса ожъёслы, висёнъёслы, сютэм улонлы но кулонлы (Псалтирь 45:10; 71:12—16; Исаия 25:8; 33:24). Куке ми вӧсяськиськомы, Инмарлэн Эксэйлыкез мед лыктоз шуыса, озьы ми куриськомы, вань та азьпалзэ ивортонъёс мед быдэсмозы шуыса.

Иисуслэн вӧсяськонысьтыз адӟиське, Инмарлэн эрикез музъем вылын быдэсмыны кулэ шуыса озьы ик, кызьы со быдэсме инмын, кытын улэ Инмар. Номыр но ӧз быгаты люкетыны Инмарлы аслэсьтыз эриксэ быдэстыны инмын. Отын Инмарлэн Пиез Шайтанлы но солэн периосызлы пумит нюръяськиз но соосты музъем вылэ сэрпалтӥз (Усьтӥськон 12:9—12). Вӧсяськонысь та куинетӥез курон юрттэ милемлы нырысь ик малпаськыны Инмарлэн эрикез сярысь. Инмарлэн эрикез котькинлы пайда гинэ вае. Соин ик сьӧлыктэм адями но, Иисус, вераз аслаз Атаезлы: «Мынам эрикея медаз лу, Тынад эрикедъя мед луоз» (Лука 22:42).

Собере Иисус возьматӥз, вӧсяськыкумы асьме сярысь но вунэтоно ӧвӧл шуыса. Номыр уродэз ӧвӧл, ми вӧсяськимы ке Инмарлы милям шуг-секытъёсмы но сюлмаськонъёсмы сярысь. Озьы ми тодамы возёмы, ваньзэ Иегова сётэ шуыса: «улон но, шокан но — ваньзэ, мар кулэ» (Апостолъёслэн ужъёссы 17:25). Библиын верамын, Инмар яратӥсь Атай кадь шуыса. Со аслаз нылпиосыз сярысь сюлмаське но сётэ соослы ваньзэ кулэзэ. Но умой атай уз быдэсты нылпиосызлэсь со куронъёссэс, кудъёсыз соослы изъян вайыны быгатозы. Озьы ик Инмар но уз быдэсты милесьтым куронмес, ми куриськомы ке со сярысь, мар милемлы изъян вайыны быгатоз.

Зэмзэ ик-а милям Инмарлы пунэм тыронмы вань? Кулэ-а милемлы, со милемыз простить мед кароз шуыса? Тросэз адямиос уг валало, мар со сыӵе сьӧлык но кытчы со вуттэ. Нош Библия валэктэ, сьӧлыкен сэрен адямиос ӵемгес шонертэм лэсьто, курадӟо но куло шуыса. Но милям осконмы вань азьланяз пумтэм вапумъёс ӵоже шумпотыса улыны. Со понна милемлы кулэ, Инмар милемыз простить мед кароз шуыса (Римъёслы 3:23; 5:12; 6:23). Инмар сярысь Библиын верамын: «Кузё-Инмаре, ваньмызлы, Тыныд вазиськисьёслы, Тон ӟечлыко, туж гажась, жалясь луиськод» (Псалтирь 85:5). Макем шумпотто милемыз та кылъёс!

Милемлы туж кулэ Инмарлэн юрттэтэз, милемлы Утись кулэ. Тросэзлэн адямиослэн оскемзы уг поты, «урод», Шайтан, вань шуыса. Нош Иисус вераз, Шайтан зэмзэ ик вань шуыса. Со сое «та дуннелэн эксэез» шуыса нимаз (Иоанн 12:31; 16:11). Шайтан та дуннеен кивалтэ. Со сое Инмар дорысь палэнтэ. Со сяна, Шайтанлэн тӥледлы но люкетэмез потэ Иегова Атайды доры матэ кариськыны (1 Пётр 5:8). Но Иегова Шайтанлэсь трослы кужмогес. Со котьку дась утьыны соосты, кинъёс сое ярато.

Иисуслэсь вӧсяськонзэ вакчияк эскерыса, асьмеос тодӥмы, мар сярысь вӧсяськыны луоз. Но та ваньмыз ӧвӧл на: вань на трос мукетыз, мар сярысь вӧсяськыны луоз. Тодамы ваёмы, мар верамын Инмар сярысь 1 Иоаннлэн 5:14: «Солэн эрикезлы тэрытскыса, мае гинэ ум куриське, Со асьмеды кылзэ». Соин ик кышкано ӧвӧл вань шуг-секытъёсмес Инмарлы вераны, соос милемлы пичиесь пото ке но (1 Пётр 5:7).

Нош кытын но ку вӧсяськоно?