DE GUIRÁ oración cristianas ni noʼ, xidal buñ rony oración ni bisuidy Jesús ni laa, padrenuestro. Oración reʼ casi diti guirá buñ diti rien láani. Xidalguixo buñ raniʼ ngúca ngúca guirá dzú, né diti nanyibu xi radudyni diitz. Per Jesús dipa goniʼ que ñony buñ láani de memory. ¿Xigony nandxichno que scú nacni?

Portín antes de nasuidybu láani, láacabu goniʼbu ndeʼ: «Órni gonylo oración, diti guiniʼlo ngúca ngúca xidal buelt» (Mateo 6:7). Xomod ma bienno, Jesús diti bisuidy xpiin ñony oración de memory. Ni bisuidy Jesús láani ngú, de xi cós labúu guinino ló oración. Nigoreʼ nanoy guisuidyno oración ni bisuidy Jesús ni sieed ló Mateo 6:​9-13.

Jesús bisuidy xpiin que guirá oración ni ñonyibu, non ñonyibu láani nosi par Bixiosbu, Jehová. Per ¿xigony náni que laabu non gac nayaani?

Desde dzú gosaló goyoʼ buñ ló Gudxlio, buñ gosaló goniʼ mal de laa Dios. Xi enemigbu, Buñdzab raniʼ que Jehová rascú né rioʼ galrrasaʼ por láasibu né que diti napbu derech gony mandarybu buñ (Génesis 3:​1-6). Ni noʼ xilad Buñdzab rasuidyibu que Dios naguʼdx xcalnabany, né náyibu que Dios nac ni nigolú mal, né dada raniʼyibu que Dios diti bisaʼ guirá cós ni noʼ. Tipnésyibu dada ma goleʼyibu laa Dios ló la Biblia né diti radudyibu lagary buñ guiquiin láani.

Per la Biblia raniʼ que Dios sanitló guirá ndeʼ (Ezequiel 39:7). Né órni sonybu láani sabeʼbu guirá galnagan ni racaló buñgudxlio. ¿Ximod sonybu láani? Jesús rabexa láani modreʼ.

Ló naareʼ, buñ ni rasanir ló religión diti rioʼyibu de acuerdo xi láani ngú Gobierno xtuny Dios. Diti scúca góc ló xtzú Jesús. Buñ judíos bimbuyibu xidal profecías ro bisetlaa de Mesías, ni nasanir ló toib Gobierno ni gony copy ló Gudxlio (Isaías 9:​6, 7; Daniel 2:44). Gobierno sony nayaa laa Jehová, sabeʼ xilatbu guirá xcalrrascú Buñdzab, sanitlóbu Buñdzab né guirá ni cayonybu. Sanitlóbu guerr, galguitz, galrralán né dada galgoity (Salmo 46:9; 72:​12-16; Isaías 25:8; 33:24). Guirá ór ni ranabno guieed Gobierno xtunybu, canabno láabu gac cumplir guirá ndeʼ.

Guirá ndeʼ radudy confianz lóono que guirá ni ma goniʼ Dios sac cumplirni ló Gudxlio, xomod ma góc cumplirni lainy guibá ronoʼ Dios, órni xiimbu Jesús buny gan Buñdzab né guirá xidemony órni bisalbu guirá biinreʼ ló Gudxlio (Apocalipsis 12:​9-12). Guionca cós reʼ ni ma bisetlano ló oración ronyni que coʼno guicno gonyno xchiin Dios, né diti ni nainy lóono. Nosi ni ná Jehová racnéni guiráxadit buñ. Jesús, ná diti gócbu buñ galkié, goniʼbu ndeʼ: «Diti gac ni nainy naʼ, xalagary ngú gac ni nálo» (Lucas 22:42).

Jesús láaca goniʼ que labúu guinino guirá ni rasacno o ni nag lainy xcalnabanyno. Mod ma bisuidyno diti mal láani ngú gaibyno Dios gacné lóono tudyno dzú. Órni ronyno láani scú, caslooyno que por «láabu nabanyno né racaʼno buu né napno guiráxadit cós» (Hechos 17:25). La Biblia raslooy láabu xomod toib buñ ni ronladx xiin, ni radudy guirá ni caquiin xiin, ná xiimbu guinab xidal cós láabu diti sadudybu toib cós ni labúu coʼ riesga xiimbu.

¿Xí diʼin napno né Jehová? ¿Né xigony raquiinno que guitudybu scásiʼ ni ma bunyno? Ná xidal buñ raniʼ que diti nap galkié o que diti nirodanni. Xomod rabexa la Biblia láani, racalóno galnagan dada galgoity portín nacno buñ galkié. Rasioʼobno xcalnabany Dios portín nacno buñ galkié. Pal nainy lóono guibanyno tipzó, rasac que guitudy Dios scásiʼ diʼin ni noʼno ló (Romanos 3:23; 5:12; 6:23). Per la Biblia láaca rasetlaa que Jehová natzaaybu né puextca noʼbu par guitudybu scásiʼ xcalkiéno (Salmo 86:5).

Lóono ni nacno buñgudxlio raquiinpano que guilaa Dios lóono. Xidal buñ diti raluladx que noʼ Buñdzab. Per Jesús buñ crer que noʼ Buñdzab; por ngú, dada goleʼbu laa Buñdzab «ni rony mandary gudxliogoxreʼ» (Juan 12:31; 16:11). Buñdzab diti rioʼbu conforme né ni ronybu né gudxliogoxreʼ, láaca nábu guiximbu xpensaryno, né modcu ma diti labúu guidzakno Bixiosno, Jehová (1 Pedro 5:8). Per diti napno razón par guidzuibyno láabu, portín Dios nap más galnadip né nainy guilaabu buñ ni nadxiʼ láabu.

Noʼ xidal cós ni labúu gaibyno Dios órni gonyno oración. Ló 1 Juan 5:14 ritlaa que labúu guinabno stipnés cós: «Labúu guinabno nitisi cós ni noʼ de acuerdo mod ni nábu né láabu racadiagbu lóono». Ndeʼ radudy diitz que labúu gaibyno Dios guirá galrrasaʼ ni noʼno ló, nandxichno que láabu sacadiagbu lóono (1 Pedro 5:7).

¿Né xí ná la Biblia pu ór né pu lagary gonyno oración? Ló artículo ni sieed sacapyno galrranabdiitz reʼ.