Prea

 5 ?Long Wan Spesel Ples Mo Taem?

LONG plante bigfala skul tede, ol man oli bildim ol naesfala haos blong prea, mo oli putum ol stret taem evri dei we oli talem se hemia nao stret taem blong prea. Ating yu luk samting ya finis. Be ?olsem wanem? ?Baebol i talem se yumi save prea nomo long wan spesel ples mo long sam spesel taem olsem?

Baebol i soemaot se i gat sam taem we oli stret taem blong prea. Olsem nao, bifo we Jisas i kakae wetem ol man blong hem, hem i prea long God blong talem tangkiu from kakae. (Luk 22:17) Mo taem ol disaepol blong Jisas oli kam wanples blong wosip, oli prea. Ol disaepol ya oli folem wan fasin we i gohed longtaem finis. Hemia fasin blong ol man Jiu blong prea taem oli kam wanples long ol haos prea mo long tempol long Jerusalem. God i talem se tempol i wan “haos blong prea blong olgeta man blong evri kantri long wol.”—Mak 11:17.

Taem ol man blong God oli kam wanples blong prea, ol prea blong olgeta oli save gat bigfala paoa. Sipos olgeta we oli stap long grup blong prea ya oli gat sem tingting nomo, mo sipos prea blong olgeta i laenap wetem ol tingting blong God long Baebol, ale God bambae i glad tumas blong harem prea blong olgeta. Prea blong olgeta ya i save pulum God blong mekem wan samting we maet hem i no save mekem sipos oli no prea olsem. (Hibrus 13:18, 19) Ol Witnes blong Jeova oli prea oltaem long ol miting blong olgeta. Mifala i glad blong singaot yu yu kam long ol miting ya long Haos Kingdom long ples blong yu, ale yu tu yu save harem olsem wanem oli prea.

Be Baebol i no talem se man we i prea i mas stap long wan spesel ples no i mas prea long wan spesel taem nomo. I gat plante stori long Baebol we oli soemaot se ol man blong God oli prea long eni taem mo long eni ples. Jisas i talem se: “Taem yu yu prea, i gud yu go yu wan insaed long rum blong yu, yu satem doa, nao yu prea long Papa ya blong yu we man i no save luk hem. Nao Papa ya blong yu we i save luk ol samting we yu mekem we man i no save luk, hem bambae i givim pei long yu from.”—Matiu 6:6.

?Yu glad blong save se God i wantem we yu toktok long hem? Yes, yu save kam long Hae King blong heven mo wol long eni taem nomo. Yu save talemaot ol tingting blong yu long hem stret, we i no gat narafala man i save. Mo yu save trastem hem se bambae hem i lesingud long yu. From samting ya nao, plante taem Jisas i aot long ol man blong hem, i go stap hem wan blong i save prea long God. Long wan long ol taem ya, hem i stap prea long God gogo wan fulnaet i pas. Ating long taem ya, Jisas i wantem tumas we God i givhan long hem blong i jusum gud rod we hem i mas folem.—Luk 6:12, 13.

Baebol i storebaot sam narafala man mo woman we oli prea taem oli gat sam impoten desisen blong mekem long laef, no taem sam samting i traem olgeta bigwan. Samtaem oli prea wetem bigfala voes, mo samtaem oli talem prea long tingting mo hat blong olgeta nomo. Samtaem oli prea taem oli stap wetem plante man, mo samtaem oli prea taem oli stap olgeta wanwan nomo. Samting we i impoten tumas hemia se olgeta ya oli stap prea. God i talem long ol man blong hem se: “Oltaem yufala i mas prea.” (1 Tesalonaeka 5:17) God i wantem tumas blong lesin long prea blong olgeta man we oli stap mekem ol samting we hem i wantem. Bambae hem i neva taed blong lesin. Samting ya i soemaot we God i lavem yumi tumas.

Tede yumi laef long wan wol we ol man oli no trastem ol narafala man. Taswe plante man oli ting se prea i no rili save givhan long yumi. I gud blong tingbaot kwestin ya se: ‘?I tru se prea i save mekem i gud long mi?’

[Tok blong makem poen long pej 9]

Yumi save prea long eni taem mo long eni ples