Rezo—Onde y Cuando Kita Debe Reza?
MANADA religion el ta habla contigo si onde y cuando tu debe reza. Ta habla ba el Biblia que debe lang kita reza na un especifico lugar y hora?
El Biblia ta dale mira que tiene maga ocasion que ta necesita kita reza. Por ejemplo, antes come si Jesus junto con el de suyu maga siguidores, ya rindi le gracias con Dios na rezo. (Lucas 22:17) Y cuando el de suyu maga dicipulo yan junto-junto para na adoranza, ya reza tambien sila. Ya sigui sila con el cosa ya hace el maga Judio por cuanto año na maga sinagoga y na templo na Jerusalem. Quierre el Dios que el templo hay queda “un casa de rezo para del maga gente.”—Marcos 11:17.
Si tan junto-junto el maga siervo del Dios y ta reza, ta oi le con el diila rezo. Si unido sila ta reza y el diila rezo uyun na querrer del Dios, ta oi le kanila. Gane, el rezo puede manda move con ele para hace el un cosa que posible gendeh le hace. (Maga Hebreo 13:18, 19) El maga Testigo de Jehova regular ta reza na diila maga miting. Alegre kame invita contigo na Kingdom Hall cerca contigo para puede tu oi con ese maga rezo.
Pero, nuay habla el Biblia que tiene lang especifico hora o lugar que debe kita reza. Na Biblia, puede kita le acerca na maga siervo del Dios quien ta reza maskin cuando y maskin onde. Si Jesus ya habla: “Si ta reza tu, entra na dituyo cuarto, tranca el puerta, y entonces reza tu con el dituyo Tata quien talli na ese lugar secreto. Y el dituyo Tata, quien ta puede mira na secreto, ay dale contigo el premio.”—Mateo 6:6.
Puede kita reza maskin cuando y maskin onde
Gendeh ba un bonito invitacion este? Puede tu reza con el Soberano del universo maskin cosa hora, maskin pa solo tu y asigurao hay oi le contigo. Amo se el razon si porque si Jesus quierre queda solo si hay reza le. Un tiempo, ya reza le entero noche antes le hace un importante decision.—Lucas 6:12, 13.
El Biblia ta menciona tambien acerca na maga hombre y mujer quien ya reza antes hace maga importante decision o cuando ya enfrenta maga grande problema. Tiene vez, ta reza sila suena y tiene vez silencio. Ta reza sila si talli sila na grupo y si solo. El importante amo que ta reza sila. Gane, ta invita el Dios con el de suyu maga siervo: “Reza firmi.” (1 Tesalonica 5:17) Preparao le oi pirmi con el de suyu maga siervo maskin pa cuanto beses kita ta reza. Gendeh ba un amable invitacion se?
Ahora, manada gente el gendeh ta creé que importante el rezo. Posible pregunta tu, ‘Puede ba gayot este ayuda conmigo?’
Baka Gusta Tambien Tu
EL TORRE DE GUARDIA
Rezo—Puede Ba Este Ayuda Kanaton?
Tiene manada beneficio si ta reza kita—na fisical, emocional y mas na todo, na espiritual.