MAYINGELEJA anji kakusakula yihela ni maola a kulemba. Shina Mbimbiliya yakulongesa ngwo, twatamba kusakula yihela ni yimwe ola ha tangwa yize twatamba kulemba?

Mbimbiliya yakusolola ngwo, kuli mashimbu alita waze twatamba kulemba. Chakutalilaho, Yesu shimbu te kanda achilia ni tumbaji twenyi, yasakwilila Zambi mu yilemba. (Luka 22:17) Muze tumbaji twenyi apwile ni kulikungulula hanga awayile Zambi, kapwile ni kulemba hamuwika. O kanungine ni kulinga yuma yize atu apwile ni kulinga chize ku mashimbu a kunyima mu masunangonga ja A-Yunda ni mu matembele mu Yerusaleme. Zambi kazangile hanga tembele yipwe “zuwo lia kulembela kuli mavungu eswe.”—Marku 11:17.

Muze tuvumbi twa Zambi akulikungulula hanga alembe hamuwika, yilemba yo muyihasa kupwa ni tachi jinji. Zambi kakwivwa kuwaha muze akumona atu malikungulula hamuwika ni kulemba kuli iye kulita ni shimbi ja mu Mbimbiliya. Kulemba muchihasa kukukwasa kulinga yuma yize te kuchi kuhasa kulinga nyi kuwalembele. (A-Hepreu 13:18, 19) Yela ja Yehova kakulemba mashimbu eswe muze akulikungulula. Tunakusanyika ukeze mu Zuwo lia Wanangana lize lili hakamwihi ni haze watwama hanga ukalivwile yena mwene kulemba chacho.

Mbimbiliya kuyishi kusolola ola yize mutu atamba kulemba ni chihela chize atamba kulembela. Mu Mbimbiliya mutuhasa kuwanamo sango jize jinasolola ngwo, tuvumbi twa Zambi kapwile ni kulemba ha maola eswawo ni yihela yeswayo. Yesu kambile ngwenyi: “Muze mulemba, njila muchipatulo che cha muchima, mba muze hiwajila pito lie, ulembe kuli Tatenu yoze uli kutenga, ni Tatenu yoze wakumona ku tenga, kumakukundulula.”—Mateu 6:6.

Chili kuyuka chinene kunyingika ngwo, mutuhasa kukundama kuli Sakatanga wa malilu ni hashi ha maola eswawo mutuzanga, muze tuli ukawetu ni kupwa ni shindakenyo ngwetu iye kumatwivwa. Chino chinasolola mumu liaka Yesu apwile ni kufupa mashimbu a kupwa ukawenyi hanga alembe. Tangwa limwe iye yanongama ufuku wamuundu ni kulemba. Chino chalingiwile mumu kota te kanafupiwa usongwelo hanga akwate chimwe chiyulo chilemu.—Luka 6:12, 13.

Malunga ni mapwo akwo waze atangola mu Mbimbiliya, kalembele shimbu te kanda akwata chimwe chiyulo hanji muze te anapalika mu ukalu. Ha mashimbu amwe kapwile ni kulemba ni liji mwilu hanji mu mbunge, kapwile ni kulemba ha mbunga hanji mutu-ni-mutu ukawenyi. Kashika chuma chilemu chili ngwo, o kapwile ni kulemba. Zambi kanasanyika tuvumbi twenyi ngwenyi: “Lembenu, kanda nulitwamina nichimwe.” (1 A-Tesalonika 5:17) Iye kakuzanga kupanjika atu waze akulinga upale wenyi. Chino chinasolola zango linene lia Zambi.

Atu anji musono keshi kutayiza ulemu wa kulemba. Hanji muhasa kulihula ngwe: ‘Shina kulemba muchihasa kungukwasa?’