Akam

5 Ikpọbọn̄ ke M̀mọ̀n̄ Ndien Ini Ewe?

EYỊGHE idụhe ke afo omokụt ke ata ediwak ido ukpono ẹsinyene ikpọ ufọk akam ẹnyụn̄ ẹnịm akpan ini ke usen emi ẹkpebọn̄de akam. Ndi Bible asiak akpan ebiet ye ini oro ikpesibọn̄de akam?

Edi akpanikọ ke Bible etịn̄ mme ini emi ẹkpebọn̄de akam. Ke uwụtn̄kpọ, mbemiso Jesus akadiade udia ye mme anditiene enye, enye ama esibọn̄ akam ọkọm Abasi. (Luke 22:17) Ndien ke ini mme mbet esie ẹkesisopde idem ndituak ibuot nnọ Abasi, mmọ ẹma ẹsibọn̄ akam ọtọkiet. Ke ntem, mmọ ẹkeka iso ẹnam se mme Jew ẹkesinamde ke synagogue ye ke temple ke Jerusalem. Abasi okoyom temple edi “ufọk akam kpukpru mme idụt.”—Mark 11:17.

Ke ini mme asan̄autom Abasi ẹsopde idem ẹbọn̄ akam ọtọkiet, mme eben̄e mmọ ẹkeme ndida nti utịp ndi. Edieke otu emi ẹnyenede ekikere kiet ndien akam emi ẹbọn̄de ke ibuot mmọ asan̄a ekekem ye mme edumbet Bible, Abasi esima emi. Akam emi akam ekeme ndinam Abasi anam n̄kpọ oro mîkpakanamke. (Mme Hebrew 13:18, 19) Mme Ntiense Jehovah ẹsibọn̄ akam kpukpru ini ke mme mbono esop mmọ. Imokot fi ke ofụri esịt ite edi Ufọkmbono Obio Ubọn̄ oro ekperede fi akan onyụn̄ edikop nte mmọ ẹsibọn̄de akam.

Edi Bible isiakke akpan ini m̀mê ebiet oro ẹkpesibọn̄de akam. Nnyịn imokot ke Bible iban̄a nte mme asan̄autom Abasi ẹkesibọn̄de akam ini ekededi ye ke ebiet ekededi. Jesus ọkọdọhọ ete: “Ke ini ọbọn̄de akam, dụk ke ọkpọkpọ ubet fo ndien, ke ama ekeberi usụn̄, bọn̄ akam nọ Ete fo emi odude ke ndịbe; ndien Ete fo emi esede ke ndịbe ọyọnọ fi utịp.”—Matthew 6:6.

Nso ikọ inem ntem! Afo emekeme ndinyene nneme ye Andikara ofụri ekondo ini ekededi, ke esịt ubet fo, onyụn̄ enen̄ede enịm ke enye ayakpan̄ utọn̄ ọnọ fi. Imosụk ise Jesus ekesiwakde ndidu ikpọn̄ man ọbọn̄ akam! Isan̄ kiet, enye ama ada ofụri okoneyo ọbọn̄ akam ọnọ Abasi, ndien etie nte enye okoyom ndausụn̄ ndinam ata akpan ubiere.—Luke 6:12, 13.

Iren ye iban eken ke Bible ẹma ẹbọn̄ akam ke ini mmọ ẹkenyenede akpan ubiere ndinam m̀mê ke ini ẹkesobode ọkpọsọn̄ mfịna. Ndusụk ini mmọ ẹma ẹsibọn̄ akam uyo ọwọrọ ẹnyụn̄ ẹbọn̄ ke esịt ndusụk ini; mmọ ẹma ẹsibọn̄ ke otu ẹnyụn̄ ẹbọn̄ ikpọn̄. Akpan n̄kpọ edi ke mmọ ẹma ẹsibọn̄ akam. Abasi akam ọdọhọ mme asan̄autom esie ete: “Ẹkûdop ndibọn̄ akam.” (1 Thessalonica 5:17) Enye eben̄e idem ndikpan̄ utọn̄ kpukpru ini nnọ mbon oro ẹnamde uduak esie. Ndi idịghe ima anam enye anam oro?

Edi ke ererimbot eyịghe emi, ediwak owo ẹkere m̀mê nso idi ufọn akam. Afo emekeme ndibụp ete, ‘Ndi akam ekeme ndinen̄ede n̄n̄wam mi?’

[Se ẹwetde ke ikpọ abisi ke page 9]

Imekeme ndibọn̄ akam ini ekededi ye ke ebiet ekededi