Mpaabɔ—Aso Ber Na Beebi A Yɛbɔ Mpaa No Hia?
EKYINGYE biara nnyi ho dɛ ehu dɛ nyamesom kuw ahorow pii kyerɛ bea na ber pɔtsee wɔ da no mu a ɔsɛ dɛ wɔbɔ mpaa. Aso Bible no so kyerɛ bea na ber pɔtsee a ɔsɛ dɛ yɛbɔ mpaa?
Ɔwɔ mu dɛ Bible no kyerɛ tsebea ahorow a ɔfata a yebotum abɔ mpaa wɔ mu. Dɛ nhwɛdo no, ansaana Jesus nye n’ekyirdzifo no ribedzidzi no, ɔbɔɔ mpaa daa Nyankopɔn ase. (Luke 22:17) N’esuafo no so, sɛ nna wohyia mu som a wɔbɔ mu bɔ mpaa. Wodzii biribi a nna nkorɔfo dze ber tsentsen ayɛ wɔ Jewfo nhyiamudan nye Jerusalem asɔrfie no mu no do. Nna Nyankopɔn pɛ dɛ asɔrfie no yɛ “asɔrbea ama amanaman nyinara.”—Mark 11:17.
Sɛ Nyankopɔn n’asomfo hyia mu na wɔbɔ mpaa a, hɔn adzeserɛ no tum yɛ edwuma paa. Sɛ kuw no nyina adwen hyia, na mpaa a wɔbɔ ma hɔnho no nye Kyerɛwnsɛm no mu ngyinadonsɛm hyia a, Nyankopɔn n’enyi sɔ. Mpaabɔ no botum aka no ma ɔayɛ dza ɔmmbɔɔ ne tsirmu dɛ ɔbɛyɛ mpo. (Hebrewfo 13:18, 19) Jehovah Adasefo bɔ mpaa daa wɔ hɔn nhyiamu ahorow ase. Wɔdze enyigye to nsa frɛ wo dɛ bra hɔn Ahendzi Asa a ɔbɛn wo no do na wankasa betsie mpaabɔ a ɔtse dɛm.
Naaso, Bible nnkyerɛ bea anaa ber pɔtsee a ɔsɛ dɛ yɛbɔ mpaa. Wɔ Bible mu no, yehu dɛ Nyankopɔn n’asomfo bɔɔ mpaa wɔ beebiara a wɔpɛ nye mber ahorow mu. Jesus kãa dɛ: “Ɔwodze, sɛ erosɔr a, hɛn wo pia mu, na atow w’abow mu no, sɔr ma w’Egya a ɔwɔ nsumaa mu no, na w’Egya a ohu nsumaa mu no obotua wo kaw.”—Matthew 6:6.
Yebotum abɔ mpaa wɔ beebiara nye aber biara
Ana iyi nyɛ enyigyesɛm? Ibotum abɛn amansan Hen no aber biara wɔ kukua mu, na nya awerɛhyɛmu dɛ obetsie wo. Ntsi ɔnnyɛ nwanwa dɛ nna Jesus taa tsew no ho kɔbɔ mpaa no! Ber bi a nna ɔda edzi dɛ ɔrohwehwɛ akwankyerɛ wɔ gyinaesi bi a no ho hia ho no, ɔbɔɔ Nyankopɔn mpaa anafua no nyina .—Luke 6:12, 13.
Mbarimba na mbaa a hɔnho asɛm wɔ Bible mu no bɔɔ mpaa ber a wohyiaa nsɛndzendzen anaa ber a nna ohia dɛ wosisi gyinae a enyiber wɔ mu no. Nna ɔtɔfabi a wɔbɔ mpaa dzendzenndzen, na ɔtɔfabi so a nna wɔbɔ no wɔ hɔn tsirmu. Nna sɛ wohyia mu dɛ kuw a wɔbɔ mpaa, na sɛ nna ɔka hɔn nkotsee so a wɔbɔ mpaa. Dza ohia ara nye dɛ nna wɔbɔ mpaa. Nyankopɔn nankasa mpo kã kyerɛ n’asomfo dɛ: “Hom mfua asɔryɛ mu.” (1 Thessalonicafo 5:17) Ɔwɔ ɔpɛ dɛ obetsie hɔn a wɔyɛ n’apɛdze no aber biara. Aso iyi nyɛ enyigyesɛm a?
Wɔ ndɛ wiadze yi a nkorɔfo gye kyim wɔ biribiara ho no, nyimpa pii nnhu mfaso a ɔwɔ mpaabɔ do. Bi a ibebisa dɛ, ‘Aso mpaabɔ botum aboa me ankasa?’
Bi A W'enyi Bɛgye Iyi So Ho
ƆWEƆN-ABAN
Mpaabɔ—Aso Obotum Aboa Hɛn?
Mfaso pii wɔ mpaabɔ do—ɔboa hɛn wɔ honam afamu, nkãtse afamu na dza ɔkyɛn ne nyina no, ɔma yɛnye Nyankopɔn nya ebusuabɔ pa.