O NA rairai kila ni levu na isoqosoqo lotu era dau vakabibitaka me tiko na nodra vale ni masu e taravaki vinaka, ra lewa tale ga na gauna me caka kina na masu ena dua na siga. Ia vakacava e yalana na iVolatabu na vanua kei na gauna meda masu kina?

E tukuni ena iVolatabu na gauna veiganiti meda masu kina. Kena ivakaraitaki, a masu o Jisu vua na Kalou ni bera ni kanavata kei ratou na nona imuri. (Luke 22:17) Eratou dau masu vata tale ga ni bera ni ratou sokalou. Eratou muria tiko ga e dua na ivakarau sa dau caka tu mai vakabalavu ena nodra valenilotu na Jiu kei na valenisoro e Jerusalemi. A nona inaki na Kalou me “nodra vale ni masu na veimatanitu” na valenisoro.​—Marika 11:17.

E rawa ni yaco na ka era kerea ena masu na tamata ni Kalou nira soqoni vata. Kevaka gona e duavata na ivakarau ni nodra rai qai salavata kei na ivakavuvuli vakaivolatabu na masu e cabo ena vukudra, ena marautaka dina o Jiova. De dua na masu qori ena uqeti koya me cakava na ka ena rairai sega ni cakava. (Iperiu 13:​18, 19) Era dau masu na iVakadinadina i Jiova ena nodra soqoni. Oni sureti moni lai rogoca sara ga na nodra masu ena nodra Kingdom Hall e voleka vei kemuni.

Ia na iVolatabu e sega ni yalana na gauna se vanua me caka kina na masu. Eda wilika ena iVolatabu nira dau masu na tamata ni Kalou ena gauna kei na vanua cava ga era via masu kina. A kaya o Jisu: “Ni o masu, curu ina nomu rumu, sogota na katuba, qai masu vua na Tamamu mai lomalagi, ia na Tamamu mai lomalagi e raici iko tiko mai, ena saumi iko.”​—Maciu 6:6.

Qori e dua na veisureti totoka. O rawa ni masu taudua vua na Turaga Cecere ni lomalagi kei vuravura ena gauna ga o vinakata, o qai nuidei ni na rogoci iko. Sa rauta me dau vinakata o Jisu me tiko taudua ni masu! Ena dua na gauna, a masu ena bogi taucoko me kerea na veidusimaki ni Kalou ni bera ni cakava e dua na vakatulewa bibi.​—Luke 6:​12, 13.

E tukuni tale ga ena iVolatabu na nodra masu eso na tagane kei na yalewa nira vakatulewataka eso na ka bibi, se ra sotava na veika dredre. Ena so na gauna era masu vakadomoilevu se ra masu lo ga; era masu vakailawalawa se nira tiko taudua. E duidui na kena ivakarau era cakava, ia e bibi ga nira a masu. Na Kalou e sureti ira na nona tamata: “Ni kua ni cegu ena masu.” (1 Cesalonaika 5:17) E tu vakarau o Jiova me rogoca tawamudu na nodra masu o ira era cakava na lomana. Na nona veisureti qori e ivakaraitaki ni nona loloma.

E macala nira na lomatarotarotaka e levu na yaga ni masu baleta ni dau vakatitiqataki e levu na ka ena vuravura qo. O na rairai taroga: ‘Ena yaga dina vei au?’