YAN i k’ak’naxtaláb in bíjchal an atiklábchik jayk’i’ tin tomnál ka oláts ani ju’táj. ¿Walám an Biblia jayej tu ólchal?

An Biblia tu ólchal jayk’i’ ti éjtowal ku oláts. Jun i t’iplab, a Jesús in ólonchalak a Dios tam ne’etsak ti k’apul (Lucas 22:17). In aykólil a Jesús jayej in ólonchalak a Dios tam u támkunalakchik abal kin k’ak’na’. Axé’ in t’ajálakits an judíos ma ti biyál, ban sinagogas ani ban templo axi ti Jerusalén. A Dios in lé’ak abal «tin k’imá’ játs ju’táj ka ólon patal an inik» (Marcos 11:17).

A Dios in kulbetnál abal in t’ojnálil ka tamkun ani ka ólonchat jant’ini’ tin tomnál. Ka olátschik junax u tolmiyáb abal kin t’aja’ yan jant’oj alwa’. (Hebreos 13:18, 19). Jaxtám, an ólchixchik k’al a Jehová in t’ajál i ólab tam u támkunalchik. Max tatá’ a lé’ ka ats’a’ axé’ xi ólab, a éjtowal kit tamkun k’al jajá’chik.

Pero an Biblia yab tu uchál jawa’ tam hora ku oláts nibal ju’táj. Jawa’ tu ólchal játs abal in t’ojnálil a Dios axi ti biyál u ólakchik ju’támakits ani jawákits tam hora. A Jesús in uluw: «Tatá’chik tam kit ólon, kit otsits altáj ta k’imá’ ani ka mapuy an wí’leb, táts ti kit ólon k’al i Tátaj ti éb tsinat; expidh Jajá’ ne’ets ti tsu’uw ani Jajá’ ne’ets ti pidha’ jawa’ a yéjenchal» (Mateo 6:6).

¿Yab aníts abal lej k’ijidh ki exla’ abal i éjtowal ki ólonchij a Jehová ju’támakits ku k’wajiy ani jawákits tam hora ki lé’na’? Axé’ in tejwamedhál jale’ ti a Jesús in kulbetnálak ka k’wajiy kwetém abal ka oláts. Jun a k’icháj, tam ti ne’etsak kin takuy jant’oj lej exbadh, k’wajiy ti ól patal akal (Lucas 6:12, 13).

Jayej wa’tsin i inik ani i uxum axi in ólonchij a Dios tam ti ne’etsak kin takuy kin t’aja’ jant’oj o tam in tamétna’ jun i k’ibataláb. Talchik in ­t’aja’ i oláb kawidh, k’e’atchik expidh tin tsalápil. Wa’ats jita’ oláts tin kwetémtal ani talchik ­tamkun abal ka oláts. Pero jawa’ exbadh játs abal in ólonchalakchik a Dios. Ma a Dios tu uchál: «Ni jayk’i’ yab ka pálk’anchij tit ól» (1 Tesalonicenses 5:17). ¿Yab aníts abal pel jun i kanixtaláb lej alwa’? A Dios in ulal abal ne’ets kin ots’ówiy in t’ojnálil, jayits i kalel ka ólonchat.

Pero bélits antsaná’ wa’atsej i atikláb axi yab in belál max an oláb chubax u tólmix. Walám ma tatá’ a tsalpayámal antsaná’.