Samba

5 Keti Kisika mpi Ntangu ya Beto Fwete Kele Mfunu?

KUKONDA ntembe, nge memonaka nde mabundu mingi ketulaka dikebi na kutunga banzo ya bisambu ya kitoko mpi ketulaka bantangu ya sikisiki ya kilumbu yina bantu fwete samba. Keti Biblia kemonisaka nde beto fwete samba kaka na bisika mpi na bantangu mosi buna ya sikisiki?

Biblia kemonisa nde kele ti mabaku ya mefwana sambu na kusamba. Mu mbandu, na ntwala ya kudya ti balongoki na yandi, Yezu kupesaka Nzambi mersi na kisambu. (Luka 22:17) Mpi ntangu balongoki na yandi kuvukanaka sambu na lusambu, bo sambaka kumosi. Na kusalaka mutindu yina, bo vandaka kulanda kikalulu yina vandaka kusalama banda ntama na basinagoga ya Bayuda mpi na tempelo na Yeruzalemi. Nzambi kusalaka tempelo ti lukanu nde yo vanda “nzo ya bisambu sambu na makanda yonso ya bantu.”​—Marko 11:17.

Ntangu bansadi ya Nzambi kevukanaka mpi kesambaka kumosi, Yandi lenda wa balombilu na bo. Nzambi kevandaka na kyese kana kimvuka mosi mevukana ti dibanza mosi mpi kana bisambu ya bo kesala sambu na mambote na bo kele na kuwakana ti minsiku ya Masonuku. Nkutu kisambu lenda pusa yandi na kusala mambu yina yandi lendaka kusala ve bantangu yankaka. (Baebreo 13:18, 19) Bambangi ya Yehowa kesambaka mbala na mbala na balukutakanu na bo. Beto kebinga nge na kyese yonso na kukwenda na Nzo ya Kimfumu yina kele penepene ya nzo na nge sambu na kuwa bisambu ya mutindu yina nge mosi.

Kansi, Biblia ketuba ve nde beto fwete samba kaka na ntangu to na kisika mosi buna ya sikisiki. Na Biblia, beto kekuta masolo ya bansadi ya Nzambi yina vandaka kusamba konso ntangu mpi konso kisika. Yezu kutubaka nde: “Kana nge ke zola kusamba, kota na suku na nge, kanga kielo, ebuna samba Tata na nge yina ke monikaka ve. Ebuna Tata na nge yina ke monaka mambu yina ya nge ke salaka na kinsweki, yandi ta pesa nge matabisi.”​—Matayo 6:6.

Keti yai kele ve emvitasio mosi ya kepesa kyese? Na kutuba ya kyeleka, nge lenda kwenda penepene na Mfumu ya luyalanganu konso ntangu, na kinsweki mpenza, mpi kundima nde yandi tatudila nge dikebi. Yo yina, mpila ya kuyituka kele ve na kumona nde mbala mingi Yezu vandaka kusosa na kuvanda yandi mosi sambu na kusamba! Kilumbu mosi, yandi lutisaka mpimpa ya mvimba na kusamba Nzambi, ziku sambu na kusosa lutwadisu na desizio mosi ya mfunu.​—Luka 6:12, 13.

Babakala ti bankento yankaka yina Biblia ketubilaka kusambaka ntangu yo lombaka nde bo baka badesizio ya mfunu to ntangu bo kutanaka ti mambu ya mpasi. Bantangu yankaka, bo sambaka na ndinga ya ngolo to na nsi ya ntima; bo sambaka ntangu bo vandaka na kimvuka to ntangu bo vandaka bo mosi. Kima ya mfunu kele nde bo sambaka. Nkutu, Nzambi kelomba bansadi na yandi nde: “Beno samba Nzambi ntangu yonso.” (1 Tesalonika 5:17) Yandi kele ti luzolo ya kuwidikila ntangu yonso bantu yina kesalaka luzolo na yandi. Yai kele emvitasio mosi ya zola mpenza!

Ya kyeleka, na nsi-ntoto ya bubu yai ya bantu kezolaka ve kuwa mambu ya Nzambi, bantu mingi kekudiyulaka kana kisambu kele mfunu. Nge lenda kudiyula nde, ‘Keti yo tasadisa munu mpenza?’

[Bangogo sambu na kubenda dikebi ya kele na lutiti 9]

Beto lenda samba konso ntangu mpi konso kisika