5. Хаҷан паза хайда пазырарға?
СИЗІНГЕЗЕР, арса, официальнай религияларның кӧбізінде кізілер пазырчатхан сіліг туралар пар паза анда пазырарға хайдағ-да тус пирілче. Худай Сӧзінде хаҷан паза хайда пазырарынаңар ниме чоохталча?
Библияда пазырарға килістіре тус полчатханнаңар чоохталча. Кӧзідімге, Иисус ӱгренҷілерінең хада азыранар алнында Худайны алғыстаан (Лука 22:17). Ідӧк Иисустың ӱгренҷілері, чыылызып, Худайға пазырҷаңнар. Іди олар иудейскай синагогалардағы паза Иерусалимдегі храмдағы кибірлернің хоостыра тудынғаннар. Худай ол храмны «прай чоннар пазырҷаң тура» ползын тіп хынған (Марк 11:17).
Худайның нымысчылары, чыылызып, пазырчатсалар, оларның сурыныстарын ол истер. Кізілерні пір духовнай кӧстеглер піріктірчетсе паза оларның пазырыстары Ызых Пічікке килістіре полза, Худайның кӧңніне кірче. Пазырыста сурынзабыс, Худай идерге сағынмаан даа нимені ит пирерге айабас (Еврейлерге 13:18, 19). Иегованың киречілері полған на христианскай чыылығда пазырчалар. Иегованың киречілерінің иң чағын залынзар килерге сірерні прай чӱреебіснең хығырчабыс, анда оларның пазырыстарын истіп аларға оңдай пар.
Че Библияда хайдағ-да орында паза хайдағ-да туста пазырарға кирек полчатханнаңар пір дее ниме пазылбинча. Сынында анда Худайның нымысчылары аймах-пасха туста, пасха-пасха орында пазырғаннаңар чоохталча. Иисус теен: «Син, тізең, пазырчатсаң, тураңа кіріп, ізииң чаап салып, кӧрінминчеткен, че синнең хада полчатхан Пабаңа пазырып ал. Пабаң, тізең, пілдіртпес иде иткеніңні кӧріп, прайзының кӧзіне сағаа сыйых пирер» (Матфей 6:6).
Піске хайдағ даа туста, хайдағ даа орында пазырарға чарир
Анзы уғаа чахсы нимес пе? Хайдағ даа туста, хайда даа, пірдеезі кӧрбес орында даа, ол сірерні истерінде ікінҷілебин, Тилекейнің Ээзінзер айланарға оңдай пар. Аннаңар Иисустың чалғысхан пазырып аларға кӱстенгені хайхастығ нимес! Пірсінде Иисус хараа тооза пазырған, андада ол аарлығ пӧгін алар алнында устағ сурынған полар (Лука 6:12, 13).
Библияда пазылчатхан иреннер паза ипчілер, аарлығ пӧгін алар алнында алай хайдағ-да сидіктерге урунзалар, Худайға пазырҷаңнар. Пірееде олар истілдіре, пірееде пос алынҷа, пірееде чалғысхан, пірееде кемнең-де хада пазырҷаңнар. Худай нымысчыларын «сыбыра пазырарға» кӧӧктірче (1 Фессалониктегілерге 5:17). Аның кӧңнін толдырчатханнарны истерге ол хаҷан даа тимде. Хайдағ илбек хыныс!
Амғы постыңар ла сағынчатхан чир-чалбахта кӧп кізі пазырыстың тузазы пар ба тіп сағынча. Арса, сірер сурарзар: «Пазырыс мағаа полызар ба?»
Сірерге хынығ полар, арса
СТОРОЖЕВОЙ БАШНЯ