ការអធិដ្ឋាន តើទីកន្លែងនិងពេលវេលាសំខាន់ឬទេ?
ដូចអ្នកបានសង្កេតឃើញហើយ សាសនាភាគច្រើនផ្ដោតទៅលើកន្លែងធំនិងស្អាតសម្រាប់អធិដ្ឋាន ហើយពួកគេក៏បានកំណត់ពេលវេលាជាក់លាក់ដែលត្រូវអធិដ្ឋានដែរ។ តើគម្ពីរបានកំណត់អំពីកន្លែងណានិងពេលណាដែលយើងត្រូវអធិដ្ឋានទេ?
គម្ពីរប្រាប់អំពីឱកាសខ្លះដែលយើងត្រូវអធិដ្ឋាន។ ជាឧទាហរណ៍ មុនលោកយេស៊ូបរិភោគអាហារជាមួយនឹងពួកអ្នកកាន់តាម លោកអធិដ្ឋានអរគុណព្រះ។ (លូកា ២២:១៧) ពេលពួកអ្នកកាន់តាមលោកជួបជុំគ្នាដើម្បីគោរពប្រណិប័តន៍ព្រះ ពួកគេបានអធិដ្ឋានជាមួយគ្នា។ ពួកគេបានធ្វើតាមទម្លាប់ដែលមានជាយូរមកហើយក្នុងសាលាប្រជុំរបស់ជនជាតិយូដា និងក្នុងវិហារនៅក្រុងយេរូសាឡិម។ ព្រះចង់ឲ្យវិហារជា«កន្លែងសម្រាប់ឲ្យប្រជាជាតិទាំងអស់មកអធិដ្ឋាន»។—ម៉ាកុស ១១:១៧
ពេលអ្នកបម្រើរបស់ព្រះជួបជុំគ្នានិងអធិដ្ឋានជាមួយគ្នា ពាក្យអង្វរសុំរបស់ពួកគេអាចទទួលបានលទ្ធផល។ បើពួកគេមានចិត្តគំនិតតែមួយ ហើយការអធិដ្ឋានតំណាងពួកគេសមស្របតាមគោលការណ៍គម្ពីរ នោះព្រះពេញចិត្ត។ ការអធិដ្ឋាននោះអាចជំរុញចិត្តលោកឲ្យធ្វើអ្វីដែលលោកមិនមានបំណងនឹងធ្វើ។ (ហេប្រឺ ១៣:១៨, ១៩) សាក្សីព្រះយេហូវ៉ាអធិដ្ឋានជាទៀងទាត់នៅកិច្ចប្រជុំរបស់ពួកគេ។ យើងសូមស្វាគមន៍លោកអ្នកមកសាលប្រជុំដែលនៅក្នុងតំបន់របស់លោកអ្នក ដើម្បីស្ដាប់ការអធិដ្ឋានដោយខ្លួនលោកអ្នកផ្ទាល់។
ប៉ុន្តែ គម្ពីរមិនមានកំណត់អំពីពេលណានិងកន្លែងណាដែលត្រូវអធិដ្ឋានទេ។ ក្នុងគម្ពីរ យើងអានអំពីអ្នកបម្រើរបស់ព្រះបានអធិដ្ឋាននៅពេលនិងកន្លែងផ្សេងៗ។ លោកយេស៊ូបានមានប្រសាសន៍ថា៖«ពេលដែលអ្នកអធិដ្ឋាន ចូរចូលទៅក្នុងបន្ទប់ផ្ទាល់ខ្លួនហើយបិទទ្វារ សឹមអធិដ្ឋានជម្រាបបិតារបស់អ្នក ដែលស្ថិតនៅទីស្ងាត់កំបាំង។ នោះបិតារបស់អ្នក ដែលមើលពីទីស្ងាត់កំបាំងនឹងផ្ដល់រង្វាន់ឲ្យអ្នក»។—ម៉ាថាយ ៦:៦
យើងអាចអធិដ្ឋាននៅពេលណានិងកន្លែងណាក៏បាន
នេះពិតជាលើកទឹកចិត្តយើងណាស់ មែនទេ? អ្នកអាចអធិដ្ឋានទៅអ្នកគ្រប់គ្រងសកលលោកដោយផ្ទាល់ខ្លួននៅពេលណាក៏បាន ហើយសូមជឿជាក់ថាលោកនឹងស្ដាប់អ្នក។ ជាក់ស្ដែង ជារឿយៗលោកយេស៊ូអធិដ្ឋានទៅព្រះតែម្នាក់ឯង! មានពេលមួយ លោកបានអធិដ្ឋានទៅព្រះពេញមួយយប់ តាមមើលទៅដើម្បីសុំការណែនាំមុនលោកធ្វើការសម្រេចចិត្តដ៏សំខាន់បំផុត។—លូកា ៦:១២, ១៣
បុរសនិងស្ត្រីក្នុងគម្ពីរបានអធិដ្ឋានពេលត្រូវធ្វើការសម្រេចចិត្តសំខាន់ៗ ឬអំពីរឿងដែលគួរឲ្យភ័យខ្លាច។ ពេលខ្លះពួកគេអធិដ្ឋានឮៗនិងអធិដ្ឋានស្ងាត់ៗ ជួនកាលពួកគេអធិដ្ឋានជាក្រុមនិងពេលនៅម្នាក់ឯង។ អ្វីដែលសំខាន់បំផុត គឺពួកគេអធិដ្ឋាន។ ព្រះថែមទាំងអញ្ជើញអ្នកបម្រើរបស់លោកឲ្យ«អធិដ្ឋានឥតឈប់»។ (ថែស្សាឡូនិចទី១ ៥:១៧) លោកតែងតែស្ដាប់សេចក្ដីអធិដ្ឋានរបស់អស់អ្នកដែលធ្វើតាមបំណងប្រាថ្នារបស់លោក។ នេះបង្ហាញថាលោកស្រឡាញ់មនុស្ស មែនទេ?
ទោះជាយ៉ាងនោះក៏ដោយ នៅក្នុងពិភពលោកដែលគិតតែពីប្រយោជន៍ខ្លួន មនុស្សជាច្រើនប្រហែលជាឆ្ងល់ថា‹តើការអធិដ្ឋានពិតជាជួយឬទេ?›។