YU GO mɔs dɔn notis se bɔku rilijɔn dɛn dɔn bil ples dɛn usay pipul dɛn kin go fɔ pre, ɛn dɛn dɔn sho patikyula tɛm dɛn insay di de we pipul dɛn fɔ pre. Yu tink se di Baybul tɔk bɔt patikyula tɛm dɛn ɛn ples dɛn we wi fɔ pre?

Di Baybul sho se tɛm dɛn de we fayn fɔ pre. Fɔ ɛgzampul, Jizɔs bin pre ɛn tɛl Gɔd tɛnki bifo i it wit in disaypul dɛn. (Lyuk 22:​17) Ɛn we in disaypul dɛn bin gɛda fɔ wɔship, dɛn bin pre togɛda. So dɛn bin kɔntinyu fɔ de pre jɔs lɛk aw di Ju pipul dɛn bin de pre na di sinagɔg ɛn na di tɛmpul we bin de na Jerusɛlɛm. Gɔd bin want di tɛmpul fɔ bi “prea os fɔ pipul dɛn na ɔl di neshɔn dɛn.”​—Mak 11:​17.

We Gɔd in savant dɛn gɛda ɛn pre togɛda, i kin lisin dɛn prea. If di grup gɛt wanwɔd bay aw dɛn de tink ɛn dɛn prea gri wit di prinsipul dɛn we de na di Baybul, Gɔd go gladi fɔ lisin to dɛn. Di prea go ivin mek i du wetin sɔntɛm i nɔ bin fɔ dɔn du. (Ibruz 13:​18, 19) Jiova Witnɛs dɛn kin pre ɔltɛm na dɛn mitin dɛn. Dɛn gladi fɔ invayt yu na dɛn Kiŋdɔm Ɔl we de nia yu fɔ mek yusɛf sɛf go yɛri aw dɛn de pre.

Bɔt di Baybul nɔ sho se wi fɔ pre na ɛni patikyula ples ɔ tɛm. Insay di Baybul, wi lan se Gɔd in savant dɛn bin de pre ɛnitɛm ɛn ɛnisay. Jizɔs bin se: “We yu want fɔ pre, go insay yu rum ɛn lɔk di domɔt, dɔn pre to yu Papa we pɔsin nɔ de si. Ɛn yu Papa we de si yu pan ɔl we ɔda pipul dɛn nɔ de si yu go blɛs yu.”​—Matyu 6:​6.

Yu nɔ tink se dat na fayn tin fɔ du? Yu go ebul fɔ pre to di wan we gɛt rayt fɔ rul di wan ol wɔl ɛnitɛm, usay yu wan de, ɛn i go lisin to yu. Dat na di rizin we mek sɔntɛnde Jizɔs bin de fɛn say we in wangren go de we i want fɔ pre. Wan tɛm, i bin spɛnd di wan ol nɛt fɔ pre to Gɔd, fɔ mek i go gayd am we i bin gɛt impɔtant tin fɔ disayd bɔt.​—Lyuk 6:​12, 13.

Ɔda man ɛn uman dɛn de we di Baybul tɔk bɔt we bin de pre we dɛn gɛt siriɔs tin fɔ disayd bɔt ɔ we dɛn bin gɛt siriɔs prɔblɛm dɛn. Sɔm tɛm dɛn de dɛn bin de pre lawd wan ɛn sɔm tɛm dɛn de dɛn bin de pre kwayɛt wan; dɛn bin de pre we dɛn de as grup ɛn we na dɛn nɔmɔ de. Wetin impɔtant na dat dɛn bin de pre. Gɔd ivin tɛl in savant dɛn se: “Una go de pre ɔltɛm.” (1 Tɛsalonians 5:​17) I rɛdi fɔ ansa ɔltɛm to di wan dɛn we de du wetin i want. Yu nɔ tink se na bikɔs Jiova lɛk wi na dat mek i ɛnkɔrej wi fɔ pre to am?

Bikɔs ɔf di bad tin dɛn we de apin na di wɔl tide, bɔku pipul dɛn de wɔnda if i impɔtant fɔ pre. Sɔntɛm yu go aks dis kwɛstyɔn, ‘Prea go rili ɛp mi?’