Sambu

5 Nga Tufwete Sola Fulu ye Ntangwa Muna Samba?

KA LUKATIKISU ko vo ozeye esi mabundu mayingi besianga e sungididi kiasaka muna vienga kwa nzo za nzambi yo sikidisa e ntangwa ina bafwete kwenda samba. Nga Nkand’a Nzambi usikidisanga e fulu ye ntangwa ina tufwete samba?

Dialudi, Nkand’a Nzambi usonganga vo vena ye ntangwa ina tufwete samba. Muna bong’e nona, Yesu wavutula matondo kwa Nzambi muna sambu vitila kadia kumosi y’alongoki andi. (Luka 22:17) Vava alongoki andi bakutakana mu sambila, basamba kumosi. Muna mpila yayi, bakwamanana landa e fu kiasadilwanga tuka kolo muna masambilu m’Ayuda ye muna tempelo kuna Yerusaleme. Nzambi wazola vo e tempelo yakala se “nzo a sambila kwa zula yawonso.”—Maku 11:17.

Vava selo ya Nzambi belungananga yo samba kumosi, e ndomba zau diambu diamfunu kikilu zivanganga. Nzambi oyangalalanga vava awana bekutakananga bekalanga ye nyindu umosi yo vanga sambu ina ngwizani ye nkanikinu mia Nkand’a Nzambi. E sambu kilenda fila Nzambi mu vanga e diambu dina kadi vanga nkutu ko. (Ayibere 13:18, 19) Mbangi za Yave, besambanga ntangwa zawonso muna tukutakanu twau. Muna kuma kiaki, obokelo kuna ngemba zawonso wiza lungana yau mun’Eseka dia Kintinu dina lukufi ye nzo aku, muna wá e sambu yayi.

Kansi kadi, Nkand’a Nzambi ke uyikanga fulu kiasikididi ko ye ntangwa ina tufwete samba. Muna Nkand’a Nzambi tutanganga lusansu lwa selo ya Nzambi ana basambanga konso ntangwa ye konso fulu. Yesu wavova vo: “Ovo se’samba, kota muna ngudi aku a nzo, wazik’e kielo, wasambila S’aku wina kuna sweki, o S’aku, on’omonanga kuna sweki, okusenda.”—Matai 6:6.

Nga mvovo miami ke miakiese ko? Kieleka, olenda kwaku finama Mfumu a Nsema konso ntangwa ozolele kuna nzo aku yo kala ye vuvu vo okuwá. Nkumbu miayingi, Yesu wavavanga kala va fulu kia yandi mosi mu samba. Lumbu kimosi, Yesu wasamba fuku wamvimba kwa Nzambi mu lomba luludiku kimana kabaka e nzengo mu diambu diamfunu.—Luka 6:12, 13.

Selo yakaka ya Nzambi akala y’akento beyikwanga muna Nkand’a Nzambi, basambanga vava babakanga nzengo yovo vava bawanananga ye mambu mampasi. Ezak’e ntangwa basambanga mu nding’angolo yovo muna nsi a ntima; basambanga mpe vana fulu kia ndonga ye vana fulu kia yau mosi. Diambu disundidi mfunu bavanga i samba. Nzambi ovovesanga selo yandi vo: ‘Bakwaminin’o samba.’ (1 Tesalonika 5:17) Yandi una y’etima dia wá e sambu y’awana bevanganga luzolo lwandi. Nga diadi ke disonganga ko zola kwandi kuna kwa yeto?

Kieleka vo omu nza yayi yazala ye wantu ke bekwikilanga mu Nzambi ko, ndonga bekatikisanga o mfunu wa sambu. Olenda kiyuvula: ‘Nga sambu kilenda kunsadisa?’

[Mvovo mia Sina muna lukaya lwa 9]

Tulenda samba konso ntangwa ye konso fulu