CHʼIXME kykyaqil okslabʼil in xi kyqʼamaʼn kye xjal alkye or tuʼn kynaʼn Dios ex jatumel tuʼn tbʼant kyuʼn. Noqtzun tuʼnj, ¿axpe jlu in bʼant tuʼn Tyol Dios?

In tzaj tqʼamaʼn Xjan Uʼj qa tbʼanel tuʼn qnaʼn Dios kyoj junjun ambʼil. Jun techel, naʼn Jesús Dios tej naʼmxtoq twaʼn (Lucas 22:17). Ax ikx kye t-xnaqʼtzbʼen kukx e naʼn Dios tej tok kychmon kyibʼ tuʼn kykʼulin te Jehová. Pero otoq tzikʼ ambʼil t-xilen tzyet tuʼn tbʼant jlu kyuʼn xjal. Jun techel, ya in che naʼntoq xjal Dios kyoj ja te kʼulbʼil kye aj Judiy ex toj templo atz Jerusalén. Tajtoq Dios tuʼn tok templo lu te «ja te nabʼl Dios kye kykyaqil xjal» (Marcos 11:17).

Tbʼanel in nela toj twitz Dios aj tok kychmon kyibʼ tmajen ex aj kynaʼn Dios junx te. Ax ikx, in tzalaj qa junx kyximbʼetz tmajen ex qa in che naʼn Dios te ik tzeʼn in tzaj tqʼamaʼn Tyol. Ex jaku tzaj qʼaqʼin tkʼuʼj kyiʼj aj ttzaj tbʼiʼn kynaʼj Dios (Hebreos 13:​18, 19). Tuʼntzunju, in che naʼn testigos de Jehová Dios aj in che ok kychmabʼil. Qa taja tuʼn tok tbʼiʼna kynaʼj Dios, jaku tzʼok tchmon tibʼa kyukʼil toj jun Ja te Chmabʼil.

Mintiʼ in tzaj tqʼamaʼn Xjan Uʼj alkye or tuʼn qnaʼn Dios ex jatumel tuʼn tbʼant quʼn. Aj tjaw quʼjin, in nel qnikʼ tiʼj qa in che naʼntoq tmajen Dios te toj alkyexku or ex toj alkyexku lugar. Tqʼama Jesús jlu: «Ok kynaʼne Dios kyokxe tuj kyjaye, ex kylmoʼmetze tlamel ja, ex che yoline tukʼil Kymane aju at tuj ewaj, ex aju Kymane in keʼyin tuj ewaj, ktzajel tqʼoʼn t-xel kyeye» (Mateo 6:6).

¿Mintiʼpe in qo tzalaj aj tel qnikʼ tiʼj qa jaku qo tzaj bʼiʼn tuʼn Dios toj alkyexku ambʼil ex toj alkyexku lugar? A jlu in tzaj tyekʼin qe tiquʼn el tpaʼn Jesús ambʼil tuʼn tyolin tjunalx tukʼil Jehová. Jun maj, ex jun qonikʼen tuʼn Jesús tuʼn tnaʼn Dios tej tkubʼ t-ximen jun tiʼ nim toklen (Lucas 6:​12, 13).

Ax ikx, ateʼ junjun xjal e naʼn Dios te Jehová tej tkubʼ kyximen tuʼn tbʼant jun tiʼ kyuʼn moqa tej kyok weʼ twitz nya bʼaʼn. Noq alkyexku tten xi kyqanin xjal lu onbʼil te Dios, qa tukʼil tqʼajqʼajel kywiʼ moqa miʼn, qa kyjunalx moqa miʼn, aju mas nim toklen aju tej t-xi kyqanin onbʼil te Dios. Ax Jehová in tzaj qʼamante jlu qe: «Miʼn che qʼajene tuʼn kynaʼne Dios» (1 Tesalonicenses 5:17). Jun tbʼanelxix txokbʼil in tzaj tqʼoʼn Jehová qe. In ttzaj tnaʼn qe qa kukx kxel tbʼiʼn qe qnaʼj Dios.

Noqtzun tuʼnj, ateʼ junjun xjal in kubʼ kyxjelin qa kukx at tajbʼen naʼj Dios toj ambʼil jaʼlo. Bʼalo ax ikx teya in kubʼ t-xjelina jlu.