NA PUNKJꞸ religión ke bʼꞹnji kja ne xoñijomꞹ juajnꞹji natrjo lugar ñe natrjo hora ma ra tsjaji oración. Pe, ¿pje mama ne Biblia?, ¿søø ra kjaji akjanu?

Na kjuana ke bʼꞹbʼꞹ nrrajme ma na joo ra kjaji oración. E Jesús go unꞹ pøjø e Yose ma ro ñonꞹ (Lucas 22:17). Kʼo o discípulo e Jesús xo mi kjaji oración ma mi jmurꞹji ñe ma mi matrʼꞹji e Tsʼitajensʼe. Nujyo nge kʼo a mi kjaji kʼo judio kja kʼo sinagoga ñe kja kʼe templo a Jerusalén, ngeje kʼu mi nee e Tsʼitajensʼe ro ngeje kʼe “ngumꞹ kʼua ja [ro] dyøtꞹ[ji] Mizhokjimi yo ntee yo ka̱ra̱ texe kja ne xoñijomꞹ” (Marcos 11:17).

Ma yo ntee yo matrʼꞹji e Diosi jmurꞹji ñe kjaji oración, angeze ⱥrⱥ. Ma yo ntee kjaji oración kʼua ja ga jizhi ne Biblia ñe natjo ga matʼꞹjikjimi, e Tsʼitajensʼe me mⱥjⱥ ga dyⱥrⱥ. Xo ñe ma ri tsjaa oración e Mizhokjimi søø ra mbøxkʼꞹ ri tsjaa kʼo dya søø ri tsjatsjɇ (Hebreos 13:18, 19). Ngekʼua yo testigo e Jehová xo kjaji oración ma jmurꞹji. Ma ri nee ri dyⱥrⱥ yo oración ke kjaji, søø ri maa ñuu nu ja jmurꞹji angezeji.

Ne Biblia dya mama ke ngextrjo ra juajnꞹji na hora ñe natrjo lugar ngekʼua ra kjaji oración. Kʼo junsʼꞹ kja ne Biblia mama ke yo ntee ke mi matrʼꞹji e Jehová mi øtꞹji zø pje ma hora ma ngeje ñe zø ja mi bʼꞹnji. E Jesús bo mama: “Kʼꞹ ri tsjaji, ma ri dyøtkeji Mizhokjimi, ri tsjogꞹji amboo kja in nzungeji, kja rri tsotkʼeji in nzoxtjiji. Kja rri dyøtkejikʼua kʼꞹ nin Tataji kʼꞹ bʼꞹbʼꞹ nu ja dya kjo søø ra jñanda. Y angeze ra dyaʼkʼeji kʼo na joo, ngeje pa̱ʼtkʼa̱ji in mꞹnʼkʼeji” (Mateo 6:6).

Nutsʼkʼe søø ri zøpjꞹ e Yose kʼꞹ manda axesʼe ne xoñijomꞹ ñe ajensʼe, angeze ra dyⱥtkʼⱥ zø pje ma hora ñe zø ja nge ke gi bʼꞹnkʼe, ri pa̱rge ke na kjuana ke angeze ra dyⱥtkʼⱥ. Nudya ke gi pa̱rgeyo, me kjakʼꞹ ri nee ri zøpjꞹ Mizhokjimi, ¿eko ja̱a̱? Nujyo ñetse pjenga e Jesús mi jyodʼꞹ ro bʼꞹntsje ma mi zøpjꞹ nu Tata. Da nu paa o dyøtꞹ e Tsʼitajensʼe ndeze ma mi xomꞹ jesta ma o jyastjo ngekʼua ro mba̱ra̱ pje kʼo mi nee e Diosi ke ro tsjaa (Lucas 6:12, 13).

Xo o bʼꞹbʼꞹ naño ntee ke mi matrʼꞹji e Diosi ñe mi øtꞹji ro mbøsʼꞹji ma pje ro tsjaji, ñe ma mi kjogꞹji ndumꞹ kʼꞹ me ma sʼɇzhi. Zø ja ma ngeje ma mi øtꞹji, zø mi ñaji na jensʼe o jyo, ma mi jmurꞹji o ma mi bʼꞹntsjeji, kʼo me na mubi nge ke mi zøpjꞹji e Palesito ajensʼe. E Jehová xitsʼkʼøji: “Dya ri jyɇzi rgi dyøtꞹji Mizhokjimi” (1 Tesalonicenses 5:17). E Diosi me nee ra dyⱥrⱥ kʼo ⱥtⱥji angeze, dya xicha ga dyⱥtkⱥji. Nujyo nee ra mama ke angeze me sʼiyazgøji, ¿ani?

Zø nge akjanu, na punkjꞹ ntee ke dya ejmeji e Diosi ønꞹtsjeji ma na kjuana pjøxkꞹji ma ra kjaji oración. Bʼꞹma xo ñetsʼke gi onꞹtsjɇ akjanu.