ШУКО религийыште кумалашлан мотор зданий-влак улыт. Тушто еҥ-влак лӱмын ойырымо жапыште гына кумалыт. А кунам да кушто чынжымак кумалаш кӱлеш? Мом тидын нерген Юмын Мутшо ойла?

Библий ситуаций-влакым палемда, кунам кумалаш кӱлеш. Мутлан, Иисус тунемшыж-влак дене пырля кочкаш шичме деч ончыч Юмым кумалтыш мутышто тауштен (Лукан 22:17). Тыгак тудын тунемшыж-влак Юмо нерген шинчымашым налашлан пырля погынен кумалыныт. Тыгела нуно йӱлам кученыт, кудыжым иудейысе синагоглаште да Иерусалим храмыште шуктеныт. Юмын шонымыжо почеш тиде храм «чыла калык-влакын кумалме пӧртышт» лийшаш ыле (Маркын 11:17).

Кунам Юмын служитлышыже-влак пырля погынен кумалыт, тунам нунын йодмышт колмо лийын кертеш. Пырля погынышо еҥ-влакын духовный цельышт икгай улыт гын да нунын кумалмышт Священный Возымашлан келшен толеш гын, тиде Юмылан йӧрышӧ лиеш. Кумалтыш мут Юмым ышташ таратен кертеш тудым, мом тудо ышташ шоненат огыл (Еврей-влаклан 13:18, 19). Иегован Таныкше-влак кажне христиан вашлиймашыштышт кумалыт. Ме тендам Вашлиймаш залыш пагален ӱжына! Тушто те тыгай кумалтыш мут-влакым колын кертыда.

Но Библий огеш палемде, могай верыште да могай жапыште кумалаш кӱлеш. Библийыште шуко случайым возымо, кунам Юмын служитлышыже-влак тӱрлӧ жапыште да тӱрлӧ верыште кумалыныт. Иисус каласен: «Кунам кумалат, пӧлемышкет пуро, омсатым петыре, пеленет улшо ужаш лийдыме Ачатлан кумал. Еҥлан койдымым ужшо Ачат тылат шинчаш койшын пӧртылта» (Матфейын 6:6).

Тиде пешак куандара! Те Сандалыкын Озажлан кеч-могай жапыште да кеч-могай верыште — шкетын улмыда годымат — кумалын кертыда да, тудо тендам колыштеш манын, пеҥгыдын ӱшанен кертыда. Теве молан Иисус кумалашлан шкетын лияш тыршен. Икана тудо чот кӱлешан решенийым лукташлан Юмылан йӱдвошт кумалын (Лукан 6:12, 13).

Библийыште тӱрлӧ пӧръеҥ ден ӱдырамаш нерген возымо, кудышт решенийым лукмо деч ончыч але нелылык дене тӱкнымӧ годым кумалыныт. Южгунам нуно йӱкын кумалыныт, а южгунам — йӱкым лукде. Нуно шкетын лийме годым але иктаж-кӧ дене пырля кумалыныт. Нуно чыланат кумалыныт — лач тиде эн тӱҥжӧ лийын. Юмо шке служитлышыже-влаклан ойла: «Чарныде кумалза» (1 Фессалоникысе-влаклан 5:17). Юмо тудын эрыкшым шуктышо-влакым эре колышташ ямде. Тиде чынжымак Юмын кугу йӧратымыжым ончыкта!

Мутат уке, тиде тӱняште илыше еҥ-влак чыла дечынат шкаланышт пайдам гына налаш тыршат, ты шотыштак кумалтыш мут дечынат пайдам налнешт. Очыни, те йодыда: «Кумалтыш мут мыланем полшен кертеш мо?»