എപ്പോൾ, എവിടെവെച്ച് പ്രാർഥിക്കാം?
പല പ്രമുഖ മതങ്ങൾക്കും വലിയ പ്രാർഥനാമുറികളും പ്രാർഥനയ്ക്കു പ്രത്യേക സമയങ്ങളും ഉള്ള കാര്യം നിങ്ങൾക്ക് അറിയാമായിരിക്കും. ഏതെങ്കിലും ഒരു പ്രത്യേക സ്ഥലത്ത് ഒരു പ്രത്യേക സമയത്ത് പ്രാർഥിക്കണമെന്ന് ബൈബിൾ പറയുന്നുണ്ടോ?
പ്രാർഥിക്കേണ്ട ചില സമയങ്ങളെക്കുറിച്ച് ബൈബിൾ പറയുന്നുണ്ട് എന്നത് ശരിയാണ്. ഉദാഹരണത്തിന്, ശിഷ്യന്മാരോടൊപ്പം ഭക്ഷണത്തിനിരുന്നപ്പോൾ ദൈവത്തോട് നന്ദി പറഞ്ഞുകൊണ്ട് യേശു പ്രാർഥിച്ചു. (ലൂക്കോസ് 22:17) ഇനി, ശിഷ്യന്മാർ ആരാധനയ്ക്കുവേണ്ടി ഒരുമിച്ച് കൂടിവന്നപ്പോഴും അവർ പ്രാർഥിച്ചു. അവരുടെ ആ രീതിയായിരുന്നു ജൂതന്മാരുടെ സിനഗോഗുകളിലും യരുശലേമിലെ ആലയത്തിലും ഉണ്ടായിരുന്നത്. ദൈവം തന്റെ ആലയം സകല ജനതകൾക്കുമുള്ള പ്രാർഥനാലയം ആയി ഉപയോഗിക്കാൻ ആഗ്രഹിച്ചു.—മർക്കോസ് 11:17.
ദൈവത്തിന്റെ ദാസന്മാർ ഒരുമിച്ചുകൂടി പ്രാർഥിക്കുമ്പോൾ അവരുടെ അപേക്ഷകൾക്കു നല്ല ഫലം ഉണ്ടാകും. ഒത്തൊരുമയോടും ബൈബിൾ പറയുന്ന നിർദേശങ്ങൾ അനുസരിച്ചും അവർ പ്രാർഥിക്കുകയാണെങ്കിൽ തീർച്ചയായും ദൈവം അതു കേൾക്കും. ചിലപ്പോൾ താൻ ചെയ്യാൻ പോകുന്ന കാര്യങ്ങൾക്ക് മാറ്റം വരുത്താൻപോലും ദൈവം തയ്യാറായേക്കാം. (എബ്രായർ 13:18, 19) യഹോവയുടെ സാക്ഷികൾ മീറ്റിങ്ങുകൾക്കു കൂടിവരുമ്പോഴെല്ലാം പ്രാർഥിക്കും. അത് നേരിട്ട് കേൾക്കാൻ നിങ്ങൾ ആഗ്രഹിക്കുന്നെങ്കിൽ നിങ്ങളുടെ അടുത്തുള്ള ഒരു രാജ്യഹാളിലേക്കു ദയവായി ചെല്ലുക. ഞങ്ങൾ നിങ്ങളെ ക്ഷണിക്കുന്നു!
ഏതെങ്കിലും ഒരു പ്രത്യേക സ്ഥലത്തോ സമയത്തോ മാത്രമേ പ്രാർഥിക്കാൻ പാടുള്ളൂ എന്നൊന്നും ബൈബിൾ പറയുന്നില്ല. വ്യത്യസ്ത സ്ഥലങ്ങളിലും സമയങ്ങളിലും ദൈവത്തോട് പ്രാർഥിച്ച ദൈവദാസന്മാരെക്കുറിച്ച് ബൈബിൾ പറയുന്നുണ്ട്. യേശു പറഞ്ഞു: “പ്രാർഥിക്കുമ്പോൾ മുറിയിൽ കടന്ന് വാതിൽ അടച്ച് രഹസ്യത്തിലുള്ള നിന്റെ പിതാവിനോടു പ്രാർഥിക്കുക. അപ്പോൾ, രഹസ്യത്തിലുള്ളതും കാണുന്ന പിതാവ് നിങ്ങൾക്കു പ്രതിഫലം തരും.”—മത്തായി 6:6.
നമുക്ക് ഏതു സമയത്തും എവിടെവെച്ചും പ്രാർഥിക്കാം
യേശുവിന്റെ ആ ക്ഷണം എത്ര നല്ലതാണല്ലേ? ഈ പ്രപഞ്ചം ഉണ്ടാക്കിയ പരമാധികാരിയായ ദൈവത്തോട് നിങ്ങൾക്ക് സ്വകാര്യമായി ഏതു സമയത്തും പ്രാർഥിക്കാം. പ്രാർഥിക്കുമ്പോൾ ദൈവം നിങ്ങളെ പൂർണമായി ശ്രദ്ധിക്കുന്നു. യേശു മിക്കപ്പോഴും ഒറ്റയ്ക്ക് മാറിയിരുന്ന് പ്രാർഥിച്ചത് എന്തുകൊണ്ടാണെന്ന് മനസ്സിലായില്ലേ? വളരെ പ്രധാനപ്പെട്ട ഒരു തീരുമാനം എടുക്കുന്നതിനുമുമ്പ് വേണ്ട മാർഗനിർദേശം ലഭിക്കുന്നതിനുവേണ്ടി ഒരു രാത്രി മുഴുവൻ യേശു ദൈവത്തോട് പ്രാർഥിച്ചതായി ബൈബിൾ പറയുന്നു.—ലൂക്കോസ് 6:12, 13.
ധാരാളം സ്ത്രീ-പുരുഷന്മാർ, ഗൗരവമുള്ള തീരുമാനങ്ങൾ എടുക്കേണ്ട സാഹചര്യങ്ങളിലും ആശങ്കപ്പെടുത്തുന്ന സന്ദർഭങ്ങളിലും പ്രാർഥിച്ചതായി ബൈബിളിൽ എഴുതിവെച്ചിട്ടുണ്ട്. ചിലർ ഉറക്കെ പ്രാർഥിച്ചിട്ടുണ്ട്, ചിലർ മൗനമായി പ്രാർഥിച്ചിട്ടുണ്ട്. വേറെ ചിലർ ഒരു കൂട്ടത്തോടൊപ്പമായിരുന്നപ്പോൾ പ്രാർഥിച്ചിട്ടുണ്ട്, ഒറ്റയ്ക്കായിരുന്നപ്പോഴും പ്രാർഥിച്ചിട്ടുണ്ട്. പ്രധാനപ്പെട്ട കാര്യം, അവർ പ്രാർഥിച്ചു എന്നതാണ്. “ഇടവിടാതെ പ്രാർഥിക്കാൻ,” ദൈവം നമ്മളെ ക്ഷണിക്കുന്നു. (1 തെസ്സലോനിക്യർ 5:17) തന്റെ ഇഷ്ടം ചെയ്യുന്നവരുടെ പ്രാർഥന കേൾക്കാൻ ദൈവത്തിന് യാതൊരു മടുപ്പുമില്ല. ദൈവത്തിന്റെ സ്നേഹം എത്ര വലുതാണല്ലേ?
നന്ദി കാണിക്കാത്ത ഒരു ലോകമാണ് ഇന്നത്തേത്. പ്രാർഥനയിലൂടെ ദൈവത്തോട് നന്ദി പറയുന്നത് എന്തിനാണെന്ന് പലരും ചിന്തിക്കുന്നുണ്ടാകും. നിങ്ങളും ചിലപ്പോൾ ഇങ്ങനെ ചോദിച്ചേക്കാം. ‘പ്രാർഥിക്കുന്നതുകൊണ്ട് എന്തെങ്കിലും കാര്യമുണ്ടോ?’