5. ¿Kema uan kanke uelis timomaijtosej?
IPAN miak religiones kiijtouaj kanke uan tlake hora uelis momaijtosej. ¿Biblia nojkia kiampa tlamachtia?
Biblia kiijtoua kema uelis timomaijtosej. Kema Jesús nechka tlakuaskia, kitlaskamatilik toTeotsij (Lucas 22:17). Itokilijkauaj nojkia momaijtouayayaj kema mosentiliyayaj uan kiueyichiuayayaj toTeotsij. Uan amo kichijkej san ipan nopa tonali pampa ipa kiampa kichiuayayaj ipan sinagogas kampa judíos monechikouayayaj uan ipan teokali tlen Jerusalén. Nopaya yauiyayaj momaijtouaj pampa toTeotsij kiijtojtoya eliskia “kali kampa tlakamej tlen euaj nochi tlaltinij uelis momaijtosej” (Marcos 11:17).
ToTeotsij kipaktia kema itekipanojkauaj sansejko momaijtouaj uan kichiuaj kej ijkuilijtok ipan Biblia. Kema kiampa momaijtouaj uelis kinpaleuis ma kichiuakaj se keski tlamantli tlen uelis amo moiljuijtoskiaj kichiuasej (Hebreos 13:18, 19). Yeka, Jehová itlajtoltemakauaj momaijtouaj sansejko kema monechikouaj. Tlaj tijneki tijkakis kenijkatsa momaijtouaj, xia ipan se kali kampa mosentiliaj tlen eltok nechka mochaj.
Biblia amo kiijtoua ipan tlake hora uelis timomaijtosej yon kanke moneki tijchiuasej. Nopaya san kiijtoua se keskij toTeotsij itekipanojkauaj momaijtouayayaj kema inijuantij kinekiyayaj uan kampa ueli. Jesús kiijtok: “Xiakaj kampa más kalijtik uan xijtsakuakaj kuapuerta uan toTeko inmoTata tlen itstok nepa kalijtik inmouaya kiitas uan inmechtlaxtlauis tlamiakapa” (Mateo 6:6).
Uelis timomaijtosej kema tijnekisej uan kampa ueli
Tlauel tiyolpakij pampa uelis tijnojnotsasej toTeotsij katli kichijchijki nochi tlen onka, maske kampa ueli tiitstosej uan kema tojuantij tijnekisej. Yeka Jesús kichiuayaya kampeka kikixtis tonali uan kiampa ueliskia itstos iselti, uan momaijtos. Se tonali kema kitlapejpeniskia se tlamantli tlen tlauel ipati, momaijtok seyoual (Lucas 6:12, 13).
Nojkia se keskij tlakamej uan siuamej katli kitekipanouayayaj toTeotsij, momaijtojkej kema nechka kitlapejpeniskiaj se tlamantli o kema kiixnamikiskiaj se tlaouijkayotl. Maske chikauak momaijtojkej o ichtakatsi, tlamiakapa o ininselti, tlauel kuali tlen kichijkej. Jehová techiljuia: “Ximomaijtojtinemikaj [...] ajachika” (1 Tesalonicenses 5:17). Tlauel tiyolpakij pampa toTeotsij kiampa techiljuia. Nojkia kiijtoua, nochipa techtlakakilis maske miakpa timomaijtosej.
Maske toTeotsij kiampa techiljuia, miakej maseualmej amo kineltokaj tlaj nelnelia techpaleuia tlamaijtoli. Uan uelis ta nojkia timotlatsintokia ni tlamantli.