MIYEKEJ religiones kijtoua kanon niman tlen hora noneki nochiuas teoyotl. ¿Biblia noijki ijkon kijtoua?

Biblia kema techijlia kemanon kuajli yeskia tikchiuaskej teoyotl. Jesús kitlasojkamachiliaya toTajtsin achto ika tlakuas (Lucas 22:17). Niman inomachtijkauan kichiuayaj teoyotl nochipa ijkuak nosentlaliayaj para kiueyichiuaskej toTajtsin. San ika, xsan yejuamej ijkon kichiuayaj, desde yeuejkaui ijkon iuajnochiujtiaya. Ipan sinagogas judías niman iteopan Jerusalén ijkon nochiuaya, pampa toTajtsin yokijtojka yejuin: “Nochan itoka yes kajli kampa nochiua oración para nochi tlakatl de nochi países” (Marcos 11:17).

ToTajtsin kuelita ijkuak itekipanojkauan san sekan nosentlaliaj niman kichiuaj teoyotl ijkon ken yejua kineki. Niman Ijkuak kita ika miyekej san sekan kichiuiliaj teoyotl, Jehová uelis kinnankilis ken nion xkinemiliaya kichiuas (Hebreos 13:18, 19). Ika yejon, iteixpantijkauan Jehová nochipa kichiuaj teoyotl ijkuak kinpiyaj intlanechikoluan. Tla tejua tikuelitaskia tikinkakis yejon teoyomej, xuiya ipan Kajli kampa nosentlaliaj iTeixpantijkauan Jehová.

Biblia xkijtoua tla san onka kanon noneki tiknotsaskej toTajtsin noso tla onka se hora ijkuak yejua techkaki. Biblia kijtoua ika itekipanojkauan okinotskej maski san tlen hora niman noijki maski san kanon yejuamej nemiyaj. Jesús okijto: “Pero ijkuak nemejuamej nenkichiuaskej oración, xkalakikan nemokaliltik, xtsakuakan nemotsakuijlou, niman ompa xkichtakachiuakan nemooración itech nemoTajtsin. Niman nemoTajtsin, yejuan kita tlinon nenkichtakachiuaj, mechmakas nemotlayokolil yejuan nochimej kimatiskej” (Mateo 6:6).

Techyolpaktia tikmatiskej ika toTajtsin techkakis maski san kanon niman maski san kemanon tiknotsaskej. Yejuin kuajli techititia, tleka Jesús kinekiya san iselti nemis niman ijkon kinotsas toTajtsin. Se tonajli, ijkuak nonekiya kitlapejpenis itlaj tlen melak ueyi kijtosnekiya, okinots toTajtsin nochi yeuajli (Lucas 6:12, 13).

Yeuejkaui noijki onenkej itekipanojkauan toTajtsin akin okinotskej ijkuak itlaj kitlapejpeniskiaj noso ijkuak kixnamiktoyaj tlen ouijtika. Oksekimej san inselti okinotskej toTajtsin niman oksekimej okichiujkej kampa tojlan. Jehová techijlia: “Nochipa xchiuakan oración” (1 Tesalonicenses 5:17). Melak kualtsin ika toTajtsin nochipa kinektika kinkakis itekipanojkauan.

Ipan yejuin tonaltin miyekej notlajtoltiaj tla tepaleui tikchiuas teoyotl, kanaj tejua noijki ijkon timotlajtoltia.