ӔВӔЦЦӔГӔН, бафиппайдтай, сӕйраг динтыл хӕст чи у, уыцы адӕмӕн кӕй ис рӕсугъд агъуыстытӕ, ӕмӕ уырдӕм кувынмӕ кӕй фӕцӕуынц цавӕрдӕр бӕлвырд рӕстӕг. Фӕлӕ цымӕ Хуыцауы Ныхасы та цы фыст ис, кувын кӕд ӕмӕ кӕм хъӕуы, уый фӕдыл?

Библийы фыст ис, Хуыцаумӕ цавӕр уавӕрты ис кувӕн, уый. Зӕгъӕм, цалынмӕ Йесо йӕ ахуыргӕнинӕгтимӕ ӕхсӕвӕр нӕ бахордта, уӕдмӕ уал Хуыцаумӕ скуывта ӕмӕ йын бузныг загъта (Лукайы 22:17). Стӕй-иу йӕ ахуыргӕнинӕгтӕ Хуыцауӕн балӕггад кӕнынӕн куы ӕрӕмбырд сты, уӕд дӕр-иу Хуыцаумӕ скуывтой. Ӕмӕ афтӕмӕй ӕххӕст кодтой, дзуттӕгты ӕмбырдгӕнӕнты ӕмӕ Иерусалимы кувӕндоны цы ’гъдау уыд, уый. Хуыцауы фӕндыд, цӕмӕй уыцы кувӕндон уыдаид «кувӕн хӕдзар ӕппӕт адӕмтӕн дӕр» (Марчы 11:17).

Хуыцауы лӕггадгӕнджытӕ иумӕ куы ӕрӕмбырд вӕййынц ӕмӕ куы фӕкувынц, уӕд сын Хуыцау сӕ куывдтытӕ фехъусы. Хуыцауӕн лӕггад кӕнын куыд хъӕуы, уый фӕдыл иу хъуыдыйыл хӕст чи вӕййы ӕмӕ сӕ куывд Хуыцауы Ныхасмӕ гӕсгӕ кӕмӕн вӕййы, ахӕм адӕм иумӕ куы фӕкувынц, уӕд уый Хуыцауы зӕрдӕмӕ фӕцӕуы. Сӕ куывд ма, гӕнӕн ис, Хуыцауы баразӕнгард кӕна, цы нӕ хъавыд, уый саразынмӕ дӕр (Дзуттӕгтӕм 13:18, 19). Йегъовӕйы Ӕвдисӕнтӕ алы ӕмбырды дӕр фӕкувынц. Зӕрдиагӕй дӕ хонӕм, ӕввахсдӕр дӕм чи у, уыцы Паддзахады залмӕ. Уым дӕхи бон уыдзӕн фехъусын, куыд кувынц, уый.

Фӕлӕ Библийы афтӕ фыст нӕй, кувын цавӕрдӕр бӕлвырд рӕстӕг кӕнӕ бӕлвырд бынаты кӕй хъӕуы. Библийы фыст ис, Хуыцауы лӕггадгӕнджытӕ-иу кӕй куывтой кӕдфӕнды дӕр ӕмӕ кӕмфӕнды дӕр. Йесо загъта: «Ды та куы кувай, уӕд бацу дӕ уатмӕ, дӕ дуар бахгӕн ӕмӕ скув дӕ уӕларвон Фыдмӕ – цӕстӕй фенӕн кӕмӕн нӕй, уымӕ. Ӕмӕ дын уӕд хорзӕх уыдзӕни дӕ уӕларвон Фыдӕй – алцыдӕр чи уыны, уымӕй» (Матфейы 6:6).

Уый дын ӕхсызгон нӕу? Дӕ бон у Дунедарӕг Хуыцаумӕ кӕдфӕнды дӕр кувын, стӕй иунӕгӕй куы уай, уӕд дӕр, ӕмӕ дӕ кӕй фехъусдзӕн, ууыл ма дызӕрдыг кӕн. Уӕдӕ диссаг нӕу, Йесо-иу кӕй архайдта, цӕмӕй-иу хибар ран скуывтаид. Иухатт ӕй ахсджиаг уынаффӕ рахӕссын куы хъуыд, уӕд ӕнӕхъӕн ӕхсӕв Хуыцаумӕ кувгӕйӕ арвыста, цӕмӕй йын разамынд радтаид (Лукайы 6:12, 13).

Библийы кӕй кой ис, уыцы нӕлгоймӕгтӕ ӕмӕ-иу сылгоймӕгтӕ куывтой, ахсджиаг уынаффӕ рахӕссын-иу сӕ куы хъуыд кӕнӕ-иу зындзинӕдтыл куы сӕмбӕлдысты, уӕд. Хатт-иу хъӕрӕй куывтой, хатт та – сӕхинымӕр. Куывтой-иу къордтӕй дӕр ӕмӕ иунӕгӕй дӕр. Ӕппӕты ахсджиагдӕр у, кувгӕ кӕй кодтой, уый. Хуыцау йӕ лӕггадгӕнджыты разӕнгард кӕны: «Ӕппынӕдзух кувут» (1 Фессалоникӕгтӕм 5:17). Хуыцау алкӕддӕр цӕттӕ вӕййы, йӕ фӕндон ын чи ӕххӕст кӕны, уыдонмӕ байхъусынмӕ. Ӕмӕ уый йӕ уарзондзинадыл дзурӕг у.

Нӕ рӕстӕджы адӕм Хуыцаумӕ арӕхдӕр уый тыххӕй фӕкувынц, цӕмӕй сын сӕ хиуарзон фӕндтӕ сӕххӕст кӕна. Чи зоны, ахъуыды кӕнай: «Хуыцаумӕ куы кувон, уӕд мын уый куыд баххуыс кӕндзӕн?»