Pikakasi

5 Importante Kasi no Iner tan Kapigan Manpikasi?

SEGURADON naiimanom a say importante ed maslak a relihyon et say pampaalagey na angkakabaleg tan marakdakep iran panagpikasian tan ididikta da no anton oras so nepeg a pampikasi. Talaga ta’n walara labat so espisipikon oras na pampikasi tan walara met labat so lugar a nepeg a pampikasian?

Ipapanengneng na Biblia a walaray matukoy a panaon na pampikasi. Singa bilang, si Jesus et akisalamat ni ed Dios antis ya angan kaiba ray patumbok to. (Lucas 22:17) Tan sano mantitipon iray disipulo to pian dayewen so Dios, manpipikasi ira bilang grupo. Sayan gagawaen da et abayag lan niyugali diad sinagoga na saray Judio tan ed templo diad Jerusalem. Ipapasen na Dios itan a templo bilang “abung a pampikasian na amin a nasyones.”​—Marcos 11:17.

Sano mantitipon tan saniiban manpikasi iray lingkor na Dios, nayarin maabig so resulta. Tan no samay manpipikasi parad interon grupo et akabase so pikakasi to ed prinsipyoy Kasulatan tan amin da et nankakasakey, naliliketan so Dios. Lapud satan et nayarin napakiwas ni ingen so Dios a gawaen so bengatlan agto komon gawaen. (Hebreos 13:18, 19) Saray Tasi nen Jehova et lanang a saniiban manpipikasi ed saray pantitipon da. Maliket da kan imbitaan ya onla’d Kingdom Hall ya asingger ed sikayo tan ditan et narengel mon mismo iray pikakasi da.

Balet, ag-ibabaga na Biblia a nepeg tayoy manpikasi ed espisipiko labat ya oras tan diad sakey labat a pasen. Diad Biblia, nabasa tayon saray lingkor na Dios et nampikasi diad nanduruman oras tan pasen. Oniay inkuan nen Jesus: “Sano manpikasi ka, loob ka ed kuartom, tan kayarim ya ikapot so puerta, manpikasi ka ed Amam a walad amot. Diad ontan et tumangan ka na Amam ya onnenengneng diad maamot.”​—Mateo 6:6.

Agta makapaliket iyan impaseguro nen Jesus? Anggan anton oras et makaasingger ka ed Soberano na uniberso, anggan bukbukor mo, tan makapanmatalek kan dengelen to ka. Kampegan mabetbet a nilabay nen Jesus so manbukbukor pian manpikasi! Aminsan et sikatoy sanlabin nampikasi, ya kinerew toy panangigiya na Dios ed importantin maong a desisyon a gawaen to.​—Lucas 6:12, 13.

Diad rekord na Biblia et walaray lalaki tan bibii ya nampikasi sanen walay importantin dedesisyonan da odino walay sasagmaken dan mairap iran subok. Walaray pankanawnawan maksil so impanpikasi ra tan wala met iramay makalna labat. Nampikasi ira bilang grupo tan anggan no bukbukor da. Say importante et nampikasi ira. Diad tua et oniay imbitasyon na Dios ed saray lingkor to: “Mantultuloy kayon manpikasi.” (1 Tesalonica 5:17) Sikatoy naynay ya akaparaan ya ondengel ed saramay manggagawa na linawa to. Agta ipapanengneng labat na saya ya inaro itayo nen Jehova?

Balet natan et mataltalag la ’tay manisia ya walay nagawaan na pikakasi. Kanian nayarin nitepet mon, ‘Talaga kasin natulongan ak na pikakasi?’

[Blurb ed pahina 9]

Anggan iner tan anggan kapigan et makapanpikasi itayo