VÄL Jemeenten sajen eenem, wua un wanea eena saul bäden un dee buen uk mau rajcht uzhent Hiesa toom bäden. Oba sajcht de Schreft, daut wie bloos opp jewesse Städen un bloos to eene jewesse Tiet kjennen bäden?

De Schreft lieet ons, wanea daut goot es to bäden. Aus Jesus met siene Nofolja toop wia, deed hee biejlikj verem äten bäden un Gott danken (Lukas 22:17). Un wan siene Nofolja sikj vesaumelden, dan deeden dee uk toop bäden. Dee deeden daut krakjt soo, aus de Juden daut aul fa Joaren emma en äare Judenschoolen un uk em Tempel en Jerusalem jedonen hauden. Gott säd, daut de Tempel “een Bädhus fa aule Velkja” wia (Markus 11:17, PB).

Daut kaun väl doonen, wan Gott siene Deena sikj vesaumlen un toop bäden. Wan dee de rajchte Enstalunk haben un wan daut uk met Gott sienen Wellen tooppaust, dan horcht Gott no dee Jebäda. Un daut kaun sennen, daut Gott doaderch mau rajcht waut deit, waut hee aundasch nich wudd jedonen haben (Hebräa 13:18-19). Jehova siene Zeijen, dee doonen pinkjlich bie äare Toopkomes bäden. Du wurscht wellich kjennen, wanemma du west, no een Vesaumlungshus komen un mol no een Jebäd horchen.

De Schreft sajcht oba nich, daut eena bloos to eene jewesse Tiet ooda bloos opp eene jewesse Städ bäden kaun. Wan wie de Schreft läsen, dan kjenn wie seenen, daut Gott siene Deena to veschiedne Tieden un uk irjentwua jebät haben. Jesus säd: “Wan du bäden deist, dan go en diene Stow un moak de Däa too un bäd to dienen Voda em Jeheemen. Un dien Voda, dee doa sitt waut em Jeheemen väajeit, woat die doafäa loonen” (Matäus 6:6, PB).

Du kaust to dän hechsten Gott äwa Himmel un Ieed bäden, wan du uk gaunz fa die auleen best un du kaust die secha sennen, daut dee woat no die horchen. Es daut nich scheen to weeten? Krakjt doawäajen wull Jesus uk eenjemol auleen sennen, daut hee kunn bäden. Eemol bäd hee de gaunze Nacht to Gott, wäajen hee eene sea wichtje Entscheidunk ver sikj haud (Lukas 6:12-13).

De Schreft rät noch von aundre Mana un Frues, waut bäden deeden, wan dee eene wichtje Entscheidunk moaken musten ooda Schwierichkjeiten hauden. Eenjemol deeden dee opp ludes bäden un eenjemol uk bloos opp stelles. Opp aundatsmol aus eene Grupp ooda uk auleen. Waut doa tald wia, daut dee bäden. Gott sajcht mau rajcht to siene Deena: “Hoolt aun met bäden” (1. Tessalonicha 5:17, PB). Un hee woat emma no dee horchen, waut sienen Wellen doonen, krakjt endoont woo foaken dee to am bäden. Wiest ons daut nich, daut Jehova daut well haben, daut wie sellen bäden?

Een deel Menschen en dise Welt jleewen nich, daut et wichtich es, daut eena bät. Veleicht denkjst du soo: “Woat mie daut opp iernst waut halpen to bäden?”