PANANGO mwawonako kuti wanthu wa matchetchi yazinji achamanga nyumba zikuluzikulu zopemphereramo ndipo achayika nthawe yomwe wanthu achadekana kukapemphera. Ko Baibolo ichanena va malo panango nthawe yomwe tichadekana kupemphera?

Baibolo iwonesa kuti pananthawe zinango zomwe tichadekana kupemphera. Mwakulinganiza, Yesu akanati kudya na opfunzira wake adapemphera kwa Mulungu ndawa ya chakudya chimwecho. (Luka 22:17) Ndipo pomwe opfunzira wake adasonkhana kuti atumikire Mulungu, adapemphera pabodzi. Pamwapa iwo adachita vomwe vingachitika kuyambira kalekale m’ma sunagoge ya Ayuda komasoti nkachisi ku Yerusalemu. Mulungu ambafuna kuti kachisi akhale ‘nyumba yopemphereramo makhaindi yose.’—Maliko 11:17.

Atumiki wa Mulungu akasonkhana pabodzi nkupemphera, Mulungu angadawire mapemphero mwayo. Peno iwo ni wobverana mwauzimu komasoti vomwe ankunena m’mapemphero yawo vikubverana na malemba, Mulungu achakondwa. Ndipo pemphero ingachitise kuti Mulungu achite vinthu vomwe panango adakachitalini. (Aheberi 13:18, 19) Nthawe zose Mboni za Yahova zichapemphera pa misonkhano yawo yomwe ichachitikira pa Nyumba ya Ufumu. Tinkukuchemerani ku misonkhano mwaya kuti mudzabve mapemphero mwaya.

Koma olo nteno, Baibolo ichaneneratulini nthawe na malo yomwe tichadekana kupemphererapo. M’Baibolo munankhani za atumiki wa Mulungu womwe adapemphera pa nthawe na malo yosiyanasiyana. Yesu adati: ‘Pakupemphera, ngena muchipinda chako pawekha na kufunga msuwo ndipo pemphera kwa Ababa wako womwe ali kosawoneka. Ukachita teno Ababa wako womwe achawona kuchokera kosaoneka uko adzakubwezere.’—Mateyu 6:6.

Vimwevi ni volimbikisa. Mungapemphere kwa Wolamulira Nkulu wa chilengedwe chose pa nthawe iliyose komasoti muli mwekhamwekha ndipo dziwani kuti Mulungu adzabve mapemphero yanu. Ndipomwapa Yesu nthawe zizinji angayenda kwayekha kukapemphera. Panthawe inango, iye adachezera usiku wose kupemphera kwa Mulungu kuti amuthandize kusankhula bwino vochita pa nkhani inango yodekana maninge.—Luka 6:12, 13.

Baibolo ichanena soti va amuna na akazi anango womwe adapemphera kwa Mulungu pakufuna kuti asankhule bwino vochita pa nkhani zodekana maninge panango pofuna kuti awathandize mabvuto yawo. Nthawe zinango ambapemphera mokuwa koma nthawe zinango angapemphera chamumtima. Adapemphera pagulu komasoti ali wokha. Koma chodekana maninge ni chakuti adapemphera. Ndipo Mulungu achawuza atumiki wake kuti: ‘Mumbapemphere mosalekedza.’ (1 Atesalonika 5:17) Iye ni wofunisisa kubvesera mapemphero ya wanthu womwe achachita chifuniro chake olo kuti apemphere kazinji tani. Vimwevi vikuwoneseratu kuti Mulungu achatikonda maninge.

Koma olo nteno, ndawa ya momwe vinthu viriri mu dziko iyi, wanthu anango achada kudziwa peno pemphero ni yothandizadi. Panango imwepo mungabvunze kuti ‘ko kupemphera kunganithandizedi?’