Mañakuy: ¿Imëtan y mëchötan Diosman mañakushwan?
MËTSIKAQ religionkunam, mëchö y imë höra Diosman mañakuyänampaq patsätsiyan. Peru ¿imatan nin Bibliachöqa?
Bibliachöqa imë höra mas alli mañakunapaq kaqtam nin. Awmi, Jesusqa Diosta agradecikurmi manaraq mikur mañakurqan (Lücas 22:17). Qateqninkunapis Diosta adorayänampaq juntakäyanqanchömi Diosman mañakuyaq. Manam tsëllaraqtsu nunakunaqa Diosman mañakuyaq. Unëpitanam, judïukunapa sinagögankunachö y Jerusalen templuchö Diosman mañakuyaq. Diosqa munarqan Jerusalen templu “llapan nacionpita nunakuna mañakuyänan wayi” kanantam (Marcus 11:17).
Diosqa munan sirweqninkuna juntakëkur Bibliachö ninqannö pëman mañakuyänantam. Mañakuyanqanta wiyanqëkiqa, Diosman imanö mañakunëkipaqmi yanapashunki (Hebrëus 13:18, 19). Tsëmi Jehoväpa testïgunkunaqa, juntakäyanqan reunionkunachö Diosman mañakuyan. Diospita yachatsikuyänan mas amänu wayiman ëwë, tsëchömi Testïgukuna imanö mañakuyanqanta wiyanki.
Tsënö kaptimpis, Bibliachöqa manam nintsu juk sitiullachö o nimanqantsik höralla mañakunapaq. Bibliachöqa, Diospa sirweqninkuna mëchö këkar o imë hörapis mañakuyanqantam nin. Jesusmi kënö nirqan: “Teyta Diosman mañakurqa, cuartuykiman yëkur punkuta wichqarkamur, ciëluchö këkaq Teytëkiman mañakuy. Tsënam, mana pï rikänampita rikëkämoq Teytëki bendicishunki” (Mateu 6:6).
Diosman mañakuytaqa imë höra y mëchö këkarpis puëdintsikmi
Llapanta Gobernaq Diosman mañakuyta puëdinqantsikqa kushikuypaqmi, pëqa imë höra y mëchö këkar mañakushqapis wiyamäshunmi. Tsëmi Jesusqa höra höraqa japallanlla Teytanman mañakoq. Juk kutichöpis allita decidinampaqmi patsa waranqanyaq Diosman mañakurqan (Lücas 6:12, 13).
Tsënöllam warmipis ollqupis Diospa sirweqninkunaqa, imatapis alli decidiyänampaq y mana allipa pasëkarpis Diosman mañakuyaq. Capaz pëkunaqa fuertipa parlar o shonqunkunallachö mañakuyarqan,capaz atskaq juntakëkur o japallankuna mañakuyarqan. Imanö kaptimpis, Diosman mañakuyanqanmi mas alliqa karqan. Kikin Jehovämi nimantsik pëman imëpis mañakunapaq (1 Tesalonicensis 5:17). Diosnintsik tsënö nimanqantsikqa, ¿manaku kuyakoq kanqanta rikätsimantsik? Diosqa munan sirweqninkuna imëpis mañakuyänantam, mañakuyaptinqa pëqa imëpis wiyëkanqam.
Tsënö kaptimpis, Diosman mana creeqkunaqa kënömi tapukuyan, Diosman mañakunqantsik ¿välintsuraq o manatsuraq? Capaz qampis tsënö tapukurqunki.