ACHCA religioncunapimi gentecuna maipi, ima horas mañana cashcata nincuna. Pero ¿Bibliapica chaitachu yachachin?

Bibliapica Diosta sirvijcuna maipi, ima horas mañana cashcatami ricuchin. Por ejemplo, Jesusca manaraj micushpami Diosta mañashpa pagui nij carca (Lucas 22:17). Jesusta catijcunapish Diosta adorangapaj tandanacushpami mañajcuna carca. Paicunaca judiocunapaj costumbretami catijcuna carca. Judiocunaca sinagogacunapi, Jerusalenpi saquirij templopimi Diosta adorajcuna, mañajcuna carca. Jerusalenpi saquirij templomantami Diosca: “Ñuca huasica, tucui llajtapi causajcuna tandanacushpa ñucata mañana huasimi canga” nirca (Marcos 11:17).

Diosca paita sirvijcuna tandanacuipi tucui shunguhuan mañajpica paica uyanmi. Shinallataj paipaj munai maijan cashcata yachashpa mañajpica uyanmi. Mana chashna mañajpica Diosca ñucanchij mañashcataca mana uyanmanchu (Hebreos 13:18, 19). Testigo de Jehovacunaca tandanacuita callaringapaj, tucuchingapajpish Diostami mañancuna. Quiquintapish ñucanchij tandanacuiman shamuchunmi invitanchij.

Bibliapica shuj horasllapi, shuj lugarllapi Diosta mañana cashcataca mana ninchu. Diosta sirvijcunaca maipi cashpapish, ima horas cashpapish Diostaca mañajcunallami carca. Jesuspish: “Can mañashpaca, huasiman yaicushpa, punguta huichcari. Chaipi cambaj Yayataca pacallapi mañangui. Can chashna mañashcamantaca pacallatapish ricuj cambaj Yayaca, tucuicunapaj ñaupajpimi can japina cashcata cunga” nircami (Mateo 6:6).

Yaya Diosca paita mañachunmi invitan. Ñucanchijca sololla cashpapish tucuita ruraj Diostaca mañai tucunchijmi. Paica cantaca uyangatajmi. Jesuspish Yaya Diosta mañangapajca maipica pailla canatami munaj carca. Shuj cutinca importante decisionta agllagricushpami tucui tuta Yaya Diosta mañashpa pacarirca (Lucas 6:12, 13).

Bibliapica Diosta sirvijcuna shuj importante decisionta agllagrishpa o sinchi llaquicunahuan chꞌimbapurashpaca Diosta mañajcuna cashcatami parlan. Maijancunaca yuyaillapi o sinchitami Diosta mañajcuna carca. Shujtajcunaca taucacunapura cashpa o paicunalla cashpapish Diosta mañanataca manataj saquijcunachu carca. Jehová Diospish mañaraichij nishpami invitan (1 Tesalonicenses 5:17). Yaya Diosca paita sirvijcuna mashna cutin mañajpipish paica siempremi uyanata munan.

Cunan punllacunapica achca gentecunami mañanaca mana importantechu can nincuna. Quiquinpish maipica chashnachari yuyashcangui.