YAQA llapa religionkunan ninku maypi ima horakunata mañakunata. ¿Ichaqa chaytachu Biblia nin?

Bibliaqa willanmi ima ratokunapi mañakuy allin kasqanta. Jesuspas Diosmanmi graciasta qorqan mijunanpaq (Lucas 22:17). Discipulonkunapas mañakurqankun Diosta adoranankupaq sapa juñukuspa. Ichaqa manan chay kutillapiraqchu chaytaqa ruwasharqanku. Judío runakunaq juñunakunanku sinagogakunapipas templopipas mañakullaqkupunin. Diosmi munarqan templo “llapa nacionmanta runakunaq mañakunan wasi” kananta (Marcos 11:17).

Diosqa munanmi serviqninkuna juñunakuspa juj sonqolla mañakunankuta, Bibliaq yachachisqanman jina. Juñunakuspa juj sonqolla mañakusqanchisraykun mayninpiqa imatapas Diosqa ruwanman, mana jinaqa manapaschá ruwanmanchu (Hebreos 13:18, 19). Jehová Diospa testigonkunaqa mañakunkun juñunakuykuna aparisqankupi. Qanqa mink’asqan kashanki chay juñunakuykunaman rinaykipaq, chaypin Diosmanta mañakuy ruwasqankutapas uyarimuwaq.

Bibliaqa manan ninchu: “Kay horapi otaq kay cheqaspin mañakuna”, nispaqa. Ichaqa willashanmi ñaupa tiempopi Diosta serviqkunaqa ima ratopas maypipas mañakusqankuta. Jesusmi nirqan: “Mañakuyta munaspaqa cuartoykiman jaykuy, jinaspa punkuykita wisq’akamuspa mana rikuna Yayaykimanta mañakuy. Jinan pakallamanta qhawamuq Yayaykiqa pagapusunki”, nispa (Mateo 6:6).

Chaypi nisqanqa may sumaq invitacionmi. Qanqa atiwaqmi tukuy atiyniyoq munayniyoq Diosman asuykuyta, ima ratopipas maypiña tarikuspaykipas, payqa makillan kashanqa uyariykunasuykipaq. Jesuspas sapallan Diosmanta mañakunanpaqmi tiempota qokuq. Juj kutinmi tutantin Diosmanta mañakurqan, chhaynapi Diospa yanapayninwan discipulonkunata allinta ajllananpaq (Lucas 6:12, 13).

Bibliaq willasqan ñaupa tiempopi qharikunapas warmikunapas, Diosmantan mañakurqanku ima sasachakuypipas tarikuspaqa. Mayninpiqa alto kunkawanmi mañakurqanku mayninpitaq ch’inlla. Wakinqa askha runapin mañakurqanku otaq sapallankupas. Imaynaña kaqtinpas Diosmantan mañakurqanku. Dios kikinmi serviqninkunata nin: “Tukuy tiempo Diosmantaqa mañakushallaychispuni”, nispa (1 Tesalonicenses 5:17). ¿Chayqa may sumaq invitacionmi riki? Munayninman jina mañakuqtinchisqa, payqa makillan kashanqa uyariwananchispaq.

Ichaqa yaqapaschá mana creeq runakuna tapukunku kay tiemponchispi allinchu mañakuy kanman chayta. Qanpas niwaqpaschá: “¿Cheqaqtapunichu yanapawanman?”, nispa.