МОЖЭТ, ту шутян сама, кай важ бут офицыальни религии исин шукарнэ здании, андэ савэ и мануша мангэнпэ андэ кодэя время, сави сас стоди. Ай со ԥэнэнпэ андэ лэ Дэвлэско Алав пала кода, кала и кай трэбуй тэ мангаспэ?

Андэ Библия пистромэ пала ситуацыи, андэ савэ авелоп драго тэ мангаспэ. Например, о Иисусо англа кода, сар вэчэром тэ бэшэл тэ хал пэстирэ учениконэнца, поблаӷодарисардя лэ Дэвлэс андэ молитва (Луки 22:17). Кадяжэ лэстирэ ученикоря мангэнаспэ тоди, кала стидэнаспэ, кай тэ уӷанэн пала Дэл. Кадя, вонэ терэнас, сар сас принято андэ иудейски синагоги и андо Иерусалимско храмо. О Дэл камэлас, кай пэ кадэва храмо «тэ ԥэнэн цэр важ и молитва, саво важ и всаворэ народоря» (Марка 11:17).

Кала лэ Дэвлэстирэ служытеля стидэнпэ и вмести мангэнпэ, лэндирэ молитвы о Дэл можэт тэ ашунэл. Если кай дэсавэ мануша, савэ стидэпэ вмести, ек цэль важ о Дэл и лэндирэ молитвы сжанпэ кодэлэса, со пистромэ андэ Свынто Писания, тоди када уӷодно лэ Дэвлэсти. Через и молитва о мануш можэт тэ закамэл тэ стерэл кода, со май англал на камэлас тэ терэл (Евреям 13:18, 19). Лэ Иеговастирэ свидетеля мангэнпэ пэ кажно христианско собрания. Амэ анда оди ақарас тут, тэ авэс андо Зало Царства, саво май пашэ каринг тутэ. Котэ ту ашунэса кацавэ молитвы.

Но андэ Библия нисо най пистромэ пала кода, кай амэ трэбуй тэ мангаспэ андэ варисаво ек ҭан или андэ варисави ек время. Наоборот, андэ кадэя книӷа пистромэ пала бут случаёря, кала лэ Дэвлэстирэ служытеля мангэнаспэ андэ разно время и андэ разни ҭана. О Иисусо ԥэндя: «Кала мангэспэ, зажа андэ пэстири комната, ԥандав и двэри, мангпэ пэстирэ небеснонэ Дадэсти. И тоди тиро Дад, саво диқэл вся, со терэлпэ чоралэс, дэла лашимос тути» (Матфея 6:6).

Хэба када най райканэс? Ту можэш тэ взвиспэ каринг о Владыка всаворя люмако, андэ любо время. Ту можэш када тэ стерэс котэ, кай никас нинай и точно тэ ӷанэс, кай во тут виашунэла. Най удивительно, кай о Иисусо камэлас тэ ашэлпэ екжэно, кай тэ мангэлпэ! Еқварэс, во вся и рят дя дума андэ молитва лэ Дэвлэса, кай о Дэл тэ поможый лэсти тэ прилэл фартэ важно ришэния (Луки 6:12, 13).

Разни мурша и жувля, пала савэ пистромэ андэ Библия, мангэнаспэ, кала трэбуй сас тэ прилэн важно ришэния или кала лэндэ сас варисаво ԥаримос. Дэкала вонэ мангэнаспэ вслух, ай дэкала андо гиндо. Вонэ мангэнаспэ екжэнэ или вмести варикаса. Само ӷлавно, кай вонэ мангэнаспэ. И о Дэл дажэ ԥэнэн пэстирэ служытелёнэнди: «На парашэн тэ мангэнпэ» (1 Фессалоникийцам 5:17). Во вся и время ӷотово тэ ашунэл кодэлэн, ко андярэл лэстири время. Када сыкавэл, кай во любий амэн и заботийпэ пала амэндэ!

И канешно, адес андэ кадэя люма, кай и мануша родэн пэсти выӷода, бутэнди интересно, сар поможый и молитва. Можэт, ту пушэс: «Поможыя манди и молитва чи най?»