Sambela

5 Ngoi nga na ndo ni ayeke biani kota ye?

KITE ayeke pëpe so mo bâ mingi ti abungbi ti vorongo nzapa abâ na nene ni mingi anzoni da so ala leke ndali ti sambela nga ala fa mbilimbili ngbonga ti sambela. Bible afa ambeni ndo so a lingbi e sambela dä nga na ambeni ngoi ti sambela?

Bible afa so ambeni nzoni ngoi ti sambela ayeke dä. Na tapande, kozoni si Jésus na adisciple ti lo ate kobe, lo sambela ti kiri singila na Nzapa (Luc 22:17). Nga na ngoi so adisciple ti lo abungbi ti voro Nzapa, ala sambela. A yeke mbeni sarango ye so aJuif ayeke sara ka, ala yeke sambela na yâ ti asynagogue nga na yâ ti temple ti Jérusalem. Ni la Jésus na adisciple ti lo amû nga gi pekoni. Nzapa aleke lani ti tene temple aduti “da ti sambela teti azo ti amara kue.”​—Marc 11:17.

Tongana awakua ti Nzapa abungbi oko ti sambela, aye ti nzoni alingbi ti ga na peko ti sambela ni. Tongana bibe ti azo ni kue ayeke oko nga ye so ala hunda ti tene Nzapa asara teti ala ague oko na aye so Bible afa, a yeke nzere na Nzapa. Sambela ni alingbi même ti pusu Nzapa ti sara ye so tongana ala hunda ni fade pëpe, lo yeke sara ni pëpe (aHébreu 13:18, 19). A-Témoin ti Jéhovah ayeke sambela lakue na ngoi ti abungbi ti ala. E yeke na ngia ti tisa mo ti gue na Da ti Royaume so ayeke nduru na mo ti mä asambela so mo wani.

Ye oko, Bible atene pëpe so a lingbi a sambela gi na ambeni ngoi wala na ambeni ndo. Na yâ ti Bible e wara tënë ti awakua ti Nzapa so asambela na ando nde nde nga na angoi nde nde. Jésus atene: “Tongana mo yeke sambela, mo lï na yâ ti kubu ti mo na mo kanga yanga-da na peko ti mo. Mo sambela Babâ ti mo so ayeke na ndo so ahonde, na fade Babâ ti mo so abâ ye na ndo so ahonde ayeke futa mo.”​—Matthieu 6:6.

So ayeke mbeni nzoni tisango ndo pëpe? Mo lingbi biani ti ga nduru na Gbia ti Dunia Kue na ngoi kue nga na ngoi so mo yeke gi mo oko. Nga hinga so lo yeke dengi mê ti mä mo. A yeke ye ti dongo bê pëpe so fani mingi Jésus ayeke gi ti duti lo oko ti sambela! Mbeni lâ, lo sambela Nzapa na bï ni kue ti gi fango lege na ndo ti mbeni kpengba desizion so a lingbi lo mû.​—Luc 6:12, 13.

Bible asara tënë ti akoli na awali so asambela na ngoi so ala yeke na gbele angangu desizion wala atara so aye ti hon ndo ti ala. Na ambeni ngoi ala sambela na kota go nga na ambeni ngoi ala sambela na yâ ti bê ti ala; ala sambela na ngoi so ala yeke na groupe wala na ngoi so ala yeke gi ala oko. Kota ye ni ayeke so ala sambela. Nzapa atene même na awakua ti lo, lo tene: “Ala ngbâ ti sambela lakue.” (1 aThessalonicien 5:17). Lo yeke lakue nduru ti mä asambela ti azo so ayeke sara ye so bê ti lo aye. Ye so afa ndoye ti Jéhovah na mbage ti e.

Biani, na yâ ti dunia so azo ayeke na kite na ndo ti ye kue, azo mingi ayeke hunda wala sambela alingbi ti mû maboko na zo. Mo nga kue mo lingbi ti hunda: ‘Sambela ayeke mû biani maboko na mbi?’

[Kete tënë na lembeti 9]

E lingbi ti sambela na ngoi kue nga na ndo kue