MUŨTCHI i tupaucagü guü̃ i naanewa, rü nüü̃ niu na nanawaꞌe iyumüẽ i wüi i natchicawa rü ta nhure i ngoragu. Rüeꞌna Tupanaarü Ore nüü̃ nanguéẽẽ i ngema?

Rü aicuma niĩ na Tupanaarü Ore nüü̃ nawe na name niĩ nayumüẽ i nhure ngoragu. Wüi cuaꞌãtchiruü̃, yeguma ga Ngetchutchu norü ngueü̃gümaã natchibüe, rü naũpa Tupanana moẽ naãü̃ i yumüẽwa. (Luca 22:17) Rü yeguma ga Ngetchutchuarü ngueü̃gü nangutaqueꞌegügu, wüigu Tupanacaꞌ nayumüẽgü. Notürü, yema nacüma tama ngewacaü̃ yiĩ. Rü duü̃ü̃güarü ngutaqueꞌepataü̃wa nayumüẽgü rü ta Tupanapatawa i Yerutchareü̃wa. Rü Tupana nanawaꞌe na ‘Napata rü guü̃ma i natchiü̃ãnecü̃ãꞌgüarü yumuẽpataü̃gu tá naãẽ́ga.’ — Marcu 11:17.

Ngẽguma Tupanaarü duü̃ü̃gü nangutaqueꞌegü na nayumüẽgüü̃caꞌ, norü yumüẽ poraü̃tchicü niĩ. Rü Tupanaü̃ nataãẽẽẽ ngẽguma nayumüẽgu ngẽgumarüü̃ i Tupanaarü ngútchaü̃. Ngẽma yumüẽgü tüü̃ narüngü̃ẽẽ na mea Tupanapeꞌewa tamaẽ. Rü ta tüü̃ naporaẽẽ na meü̃ tanaügüü̃caꞌ. (Ebréugü 13:18, 19) Rü Yeuwaarü Orearü Uruü̃gü guü̃guma nayumüẽgü i norü ngutaqueꞌegüwa. Rü cuna tau na nüü̃ cuĩnüü̃ i ngema yumüẽgü i tórü Ngutaqueꞌepataü̃wa na cupatawa nangaicama ngemaü̃.

Notürü, Tupanaarü Ore tama nüü̃ yauü̃ na inawaꞌe iyumüẽrica i nhure i ngoragu urü i nhure i natchicawa. Nawa, nüü̃ tadaugü na Tupanaarü duü̃ü̃gü nayumüẽgü i guü̃ i nguneü̃gu rü ta muũtchi i natchicawa. Rü Ngetchutchu nhanagürü: “Notürü ngẽguma cuyumüẽgu, rü name niĩ i curü ucapugu cuücu, rü cunawãta i curü ĩãꞌ, rü ngẽ́ma cuyumüẽ namaã ya Cunatü ya bema cumaãĩcatama ngẽ́ma ngẽmacü. Rü ngẽguma ya yima Cunatü ya Tupana ya nüü̃ daucü i ngẽma cúãcü cuüü̃, rü nüma tá cuna nanaã i curü ãmare.” — Mateu 6:6.

Ngema nameetchima niĩ, aicaꞌ? Rü aicuma niĩ na cuma cungaicama i yumüẽwa na Tupanamaã quideaü̃caꞌ rü naicatama yiĩü̃ i guãétüwa nangemaü̃ i nhama i naanewa! Rü cuyumüẽ guü̃ i nguneü̃gu rü nüma ya Tupana aicuma cuü̃ naĩnüü̃, woo cuíca cuyumüẽgu. Rü Ngetchutchu naíca mueꞌpüꞌcüna Tupanacaꞌ nayumüẽ. Wüi i nguneü̃gu, Rü yeguma ga Ngetchutchu rü dautchitawa, wüi ga maꞌpǘnewa naũ na yéma yayumuẽü̃caꞌ. Rü guü̃ ga yema tchütaü̃gu rü yéma nayumüẽ na mea nüü̃ naunetaü̃ i norü ngueü̃gü. — Luca 6:12, 13.

Togü i yatügü rü ngeegü na Tupanaarü Ore nüü̃ niu natchiga ga yema duẽẽgü rü nayumüẽgü yeguma gutchaü̃gü nayemagügu rü ta na mea nüü̃ naunetagüü̃caꞌ. Rü nhuguãcü tagaãcü nayumüẽgü; rü nhuguãcü, i norü ĩnüwa nayumüẽ. Rü natücumüwa nayumüẽgü ga yema duü̃ü̃gü rü ta yeguma naíca nayemagu. Rü name ga nümagü rü nayumüẽgü. Rü Tupanatama tona nau na nacaꞌ ‘guü̃guma tayumüẽgüü̃caꞌ.’ (1 Techarónicacü̃ãꞌ 5:17) Tupana guü̃guma nüü̃ naĩnü teé norü ngútchaü̃ tanaügü. Ngema tüü̃ nawe na Tupana ngetchaü̃waꞌecü niĩ, aicaꞌ?

Nhumaü̃tchima naãnearütawa, muema ya duẽẽgü nagu inarüĩnüe na yumüẽ tama name. Bemana nagu curüĩnü i ngematchiga: ‘Rüeꞌna ngẽguma tchayumüẽgu aicuma tchoü̃ narüngü̃ẽẽ?’