WE IYOL you kpa u nenge er iniongo i kwaghaôndo kpishi i hembe veren ishima u maan uzegembaayough mba eren msen ker, shi i ver ashighe a eren msen hanma iyange yô. Bibilo tese ajiir man ashighe a i doo u se er msen ga yôô?

Bibilo tese ér ashighe nga a i doo u se er msen yô. Ikyav i tesen yô, Yesu yange a er msen sha kwaghyan shin a sugh Aôndo cii, a mase yan vea mbadondon un ye. (Luka 22:17) Shi mbahenen nav yange vea kohol imôngo sha u civir Aôndo yô, ve er msen. Lu kwagh u i eren ken ushinagoge mba Mbayuda kua ken tempel u ken Yerusalem sha ikyov ikyov la je ve za hemen a mi u eren ye. Aôndo yange lu awashima ér tempel la a lu “iyou i msen sha ci u akuraior cii.”—Marku 11:17.

Mbacivir Aôndo yange vea kohol imôngo vea er msen yô, Aôndo a ungwa msen ve la. Mhen u mba ve kohol imôngo la yange una lu kwaghmôm, shi msen u i er sha ci ve la una zua sha akaawan a Ruamabera yô, Aôndo a lumun. Yange a lu kwagh u Aôndo ma a er ga je kpa, msen u i er la a na yô, a er kwagh shon. (Mbaheberu 13:18, 19) Mbashiada mba Yehova mba eren msen hanma shighe ken mbamkombo vev cii. Se mba lôhôn we ser va hen Iyou i Tar i i lu ikyua a we yô, va ungwa er ka ve er msen sha imba gbenda ne yô.

Nahan kpa, Bibilo tese ér gba u se ver a ver shighe man ijiir i eren msen ga. Bibilo ter mbamsen mba mbacivir Aôndo yange ve er hanma shighe man hanma ijiir i ve soo cii yô. Yesu kaa ér: “Zum u u lu eren msen yô, nyôr ken iyou you shin atô, wuhe hunda, maa er msen hen Teru u i nengen a na ga la. Nahan Teru u sha u a nengen akaa a ken myer la una na u injar.”—Mateu 6:6.

Kwagh ne ka kwagh u doon kpishi. Sha ci u, u ngu a ian i zan sha ishigh ki Tor u hemban sha won cii la hanma shighe cii, lamen a na, we vea na ne uhar tseegh, shi una kegh a ato a we u bunden ka ga. Kwagh ne tese wang er i hii ve Yesu yange a ker ijiir a za lu her tswen, sha er una er msen yô! Kwagen la er msen hen Aôndo tugh zan zan sev av. Ikyav tese ér lu keren kwaghwan u Aôndo sha kwagh u hange hange u gba u una er yô.—Luka 6:12, 13.

Nomso man kasev mbagenev kpa Bibilo ôr kwagh ve ér yange ve er msen shighe u gba u vea tsua kwagh u hange hange shin ve tagher a mbamzeyol mba vesen yô. Ashighe agen yange ve er msen ikyenge ve i due sha, gayô ve er ving ving; ve er msen shighe u ve kohol imôngo, man shighe u hanmô ve nan lu tswen yô. Kpa kwagh vesen yô, ka msen u yange ve er la. Aôndo iyol na kaa a mbacivir un ér: “Eren nen msen gbem.” (1 Mbatesalonika 5:17) Keghen ato a mba ve eren ishima na la hanma shighe cii. Kwagh ne tese ér se doo Yehova Aôndo ishima ga zee?

Nahan kpa, nyian u ior ve kera ne kwagh jighjigh ga ne, mbagenev kpishi ka i taver ve fan iwasen i msen. Alaghga u pine wer, ‘Me er msen nahan, a wasem je kpa?’