‘OKU ‘ikai ha veiveiua kuó ke fakatokanga‘i ko e lahi taha ‘o e ngaahi lotú ‘oku tō ‘enau fakamamafá ki he ngaahi fale lalahi fai‘anga lotú mo e ngaahi taimi pau ‘i he ‘ahó ‘a ia ‘oku totonu ke fai ai ‘a e lotú. ‘Oku fakangatangata ‘e he Tohi Tapú ‘etau ngaahi lotú ki ha feitu‘u mo ha taimi pau?

‘Oku fakahaa‘i mai ‘e he Tohi Tapú ‘oku ‘i ai ‘a e ngaahi taimi totonu ki he lotú. Ko e fakatātaá, ki mu‘a ke kai ‘a Sīsū mo hono kau muimuí, na‘á ne fakamālō ki he ‘Otuá ‘i he lotu. (Luke 22:17) Pea ‘i he taimi na‘e fakatahataha ai ‘ene kau ākongá ke lotú, na‘a nau lotu fakataha. Ko ia na‘a nau hokohoko atu ‘i hono fai ‘a e me‘a na‘e ‘osi fuoloa pē hono fa‘a fakahoko ‘i he ngaahi sinakoke ‘o e kau Siú mo e temipale ‘i Selusalemá. Na‘e loto ‘a e ‘Otuá ke hoko ‘a e temipalé “ko e fale fai‘anga lotu ma‘á e ngaahi pule‘anga kotoa pē.”​​—Ma‘ake 11:17.

‘I he taimi ‘oku fakatahataha ai ‘a e kau sevāniti ‘a e ‘Otuá pea lotu fakatahá, ‘okú ne fanongo ki he‘enau ngaahi lotú. Kapau ‘oku fā‘ūtaha ‘a e kulupú pea tapua mai mei he‘enau ngaahi lotú ‘a e ngaahi tefito‘i mo‘oni Fakatohitapú, ‘oku fakahōifua ia ki he ‘Otuá. ‘E a‘u ‘o ue‘i nai ia ‘e he lotú ke ne fai ha me‘a na‘e ‘ikai ke ne mei fai. (Hepelū 13:18, 19) ‘Oku lotu ma‘u pē ‘a e Kau Fakamo‘oni ‘a Sihová ‘i he‘enau ngaahi fakatahá. ‘Oku fakaafe‘i loto-māfana koe ke ke ha‘u ki ha Fale Fakataha‘anga ofi atu kiate koe pea fanongo tonu ki he ngaahi lotu hangē ko iá.

Kae kehe, ‘oku ‘ikai ke fakangatangata ‘e he Tohi Tapú ‘a e lotú ki ha taimi pe feitu‘u pau. ‘I he Tohi Tapú, ‘oku tau ma‘u ai ha lēkooti ‘o e lotu ‘a e kau sevāniti ‘a Sihová ‘i ha fa‘ahinga taimi pē mo ha fa‘ahinga feitu‘u pē. Na‘e pehē ‘e Sīsū: “‘I ha‘o lotu, hū ki hao loki ‘oku lilo, pea ‘i he hili ho‘o tāpuni ‘a e matapaá, lotu ki ho‘o Tamai ‘a ia ‘oku ‘i he liló. Pea ko ho‘o Tamaí leva ‘a ia ‘okú ne vakai mai ki ai mei he liló te ne totongi kiate koe.”​—Mātiu 6:6.

‘Ikai ko ha fakaafe fakamānako ia? ‘E lava mo‘oni ke ke fakaofiofi ki he Hau ‘o e ‘univēsí ‘i ha fa‘ahinga taimi pē, ‘i he taimi ‘okú ke toko taha aí, pea tuipau te ne fanongo mai kiate koe. Tāne‘ine‘i ke fa‘a kumi ‘e Sīsū ha taimi ke ne nofo toko taha ai koe‘uhi ke lotu! ‘I ha taimi ‘e taha, na‘á ne lotu ki he ‘Otuá ‘i ha pō kakato ‘e taha, koe‘uhi na‘á ne fiema‘u ha tataki ki ha fili mātu‘aki mahu‘inga.​—Luke 6:​12, 13.

Ko e kau tangata mo e kau fefine ‘e ni‘ihi ‘i he Tohi Tapú na‘a nau lotu ‘i he taimi na‘a nau fehangahangai ai mo e ngaahi fili mahu‘ingá pe ngaahi pole mafatukitukí. Na‘a nau lotu le‘o-lahi ‘i he taimi ‘e ni‘ihi pea lotu fakalongolongo ‘i he taimi ‘e ni‘ihi; na‘a nau lotu ‘i he tokolahí mo e taimi na‘a nau toko taha aí. Ko e me‘a mahu‘ingá na‘a nau lotu. ‘Oku toe fakaafe‘i foki ‘e he ‘Otuá ‘ene kau sevānití ke: “Lotu ma‘u pē.” (1 Tesalonaika 5:17) ‘Okú ne loto-lelei ke fanongo ta‘emamotu ki he fa‘ahinga ‘oku nau fai hono finangaló. ‘Ikai ko ha fakaafe anga-‘ofa ia?

Ko e mo‘oni, ‘i he māmani siokita ko ení, ‘oku fifili ‘a e tokolahi fekau‘aki mo e mahu‘inga ‘o e lotú. Te ke ‘eke nai, ‘‘E tokoni‘i mo‘oni au ‘e he lotú?’