Mupailo

5 Sena Kuyandika Kapati Busena Naa Ciindi?

Cakutadooneka, mwalibonena zikombelo zinji zijisi maanda mapati akupailila alimwi babikka ziindi amazuba nobeelede kukomba. Sena Bbaibbele lilaamba ziindi abusena notweelede kupaila?

Bbaibbele lilatondezya kuti kuli ziindi notweelede kupaila. Mucikozyanyo, kabatanalya, Jesu wakalumba Leza kwiinda mumupailo antoomwe abasikwiiya bakwe. (Luka 22:17) Alimwi ciindi basikwiiya bakwe nobakabungana kuti bakombe, bakapaila antoomwe. Eelyo bakazumanana acilengwa eeci calo cakali kucitwa kaindi azikombelo zyaba ma Juda alimwi amu tempele ku Jelusalemu. Leza wakali kuyanda kuti tempele ibe “Ŋanda yakukombela yabantu bamisyobo yoonse.”—Maako 11:17.

Ciindi babelesi ba Leza nobaswaangana alimwi akupaila antoomwe, mipailo yabo ilakonzya kuba aampindu kapati. Kuti kabunga kalikamantene mukuyeeya alimwi kuti mupailo wapegwa kauyeeme anjiisyo zyamumagwalo, Jehova ulakkomana. Mupailo ulakonzya kupa muntu kuti ataciti cintu citeelede. (Bahebulayo 13:18, 19) Bakamboni ba Jehova balapaila lyoonse kumiswaangano yabo. Mwatambwa amaanza obilo kuboola Kuŋanda ya Bwami ilaafwaafwi ankomukkala kuti mukalimvwide mipailo eeyo nobeni.

Nokuba boobo, Ibbaibbele talipi milawo kujatikizya ciindi naa busena nkotunga twapailila. Mu Bbaibbele tulabala kujatikizya babelesi ba Jehova bakapaila muziindi ziindene-indene alimwi amasena andene-andene. Jesu wakati: “Pele nywebo ciindi nomupaila, amunjile muŋanda yanu, alimwi mwajala mulyango, amupaile kuli Uso uutalibonyi, Mpoonya Uso uutalibonyi uyoomupa bulumbu.”—Matayo 6:6.

Sena kutambwa ooku takumukkomanisyi? Mulakonzya kumusikila Mwami wa Bubumbo boonse kufwumbwa ciindi, mucimpetu, alimwi amusyome kuti uyooswiilila mipailo yanu. Nkakaambo kaako Jesu ncaakali kuyandila kuba alikke kutegwa apaile. Ciindi cimwi wakapaila kuli Leza busiku boonse, kulomba busolozi mumakani akali kuyandika kapati.—Luka 6:12, 13.

Mu Bbaibbele tulabala kujatikizya baalumi abanakazi bakapaila ciindi nobakali kuyandika kusala zyintu ziyandika kapati naa nobakajana buyumu-yumu. Zimwi ziindi bakali kupaila cakupozya alimwi zimwi ziindi cakaumu-umu, bakapaila mutubunga alimwi anobakali balikke. Kaambo kapati nkakuti, bakapaila. Leza ulabatamba babelesi bakwe kuti: “Amukombe cakutaleka.” (1 Batesalonika 5:17) Ulilisungwide lyoonse kuswiilila kuli baabo bacita kuyanda kwakwe. Sena kutamba ooku takutondezyi luyando ndwajisi Jehova kubantu?

Ee, munyika yamazuba aano, bantu banji tabasyomi kuti mupailo ulakonzya kubagwasya. Mulakonzya kulibuzya kuti, ‘Sena masimpe mupailo inga wandigwasya?’

[Majwi aakwelelezya sikubala aali apeeji 9]

Tulakonzya kupaila kufwumbwa ciindi alimwi abusena buli boonse