Pure

5 Ihea e afea, mea faufaa anei?

MEA papu, te ite ra outou e ua haafaufaa rahi te rahiraa o te mau haapaoraa tumu i te hamaniraa i te mau fare pure nehenehe e ua faahepo ratou ia purehia i te mau taime taa maitai o te mahana. Te faaue ra anei te Bibilia ia pure i te mau vahi e taime taa maitai?

Te faaite ra iho â te Bibilia e te vai ra te mau taime tano no te reira. Ei hiˈoraa, hou oia a inu ai e a tamaa ˈi e ta ˈna mau pǐpǐ, ua haamaitai Iesu i te Atua na roto i te pure. (Luka 22:17) E i to ta ˈna mau pǐpǐ haaputuputuraa no te haamoriraa, ua pure amui ratou. E ua tamau noa ratou i te haapao i tera peu i roto i te mau sunago e i te hiero i Ierusalema. Ua faanaho te Atua ia riro te hiero ei “fare pureraa no te mau fenua atoa.”—Mareko 11:17.

Ia haaputuputu te mau tavini a te Atua e ia pure amui ratou, e pahonohia ta ratou mau aniraa. Mai te peu e ua hoê to ratou manaˈo e ua niu ratou i ta ratou pure i nia i te mau faaueraa tumu Bibilia, ua mauruuru ïa te Atua. E turai atoa paha te pure ia ˈna ia rave i te mea ta ˈna e ore e rave na roto i te tahi atu ravea. (Hebera 13:18, 19) Te pure tamau ra te mau Ite no Iehova i ta ratou mau putuputuraa. Te titau-manihini-hia ra outou ia haere atu i te Piha a te Basileia i pihai iho i ǒ outou e ia faaroo atu outou iho i tera mau pure.

Aita râ te Bibilia e faaue ra ia pure i te tahi taime aore ra vahi taa ê. Te faatia ra te mau Papai e ua pure te mau tavini a te Atua i te mau taime e vahi atoa. Ua parau Iesu: “Ia pure oe ra, e haere i roto i to piha, e opani maite i te opani a pure ai i to Metua; e na to Metua iho, tei ore roa i moe te hoê mea ia ˈna ra, ore noâ oia iho i te itea, e faautua faaite mai ia oe.”—Mataio 6:6.

E ere anei teie i te hoê aniraa anaanatae mau? E nehenehe iho â oe e haafatata ˈtu i te Arii o te ao taatoa i te mau taime atoa, o oe anaˈe e o ˈna, e e tiaturi e haapao mai oia ia oe. E ere ïa i te mea maere e ua imi pinepine Iesu i te faaea o ˈna anaˈe no te pure! I te hoê taime, ua pure oia i te hoê po taatoa no te imi i te tauturu a te Atua no nia i te hoê faaotiraa faufaa mau.—Luka 6:12, 13.

I roto i te Bibilia, ua pure te tahi mau tane e vahine e nafea ratou i mua i te mau faaotiraa peapea aore ra te mau fifi teimaha. I te tahi taime ua pure ratou ma te reo puai e i te tahi atu taime ma te mamû noa; ua pure amui ratou e ua pure ratou ratou anaˈe. Te mea faufaa, te pure ra ratou. Te ani atoa ra te Atua i ta ˈna mau tavini: “Eiaha e tuutuu i te pure.” (Tesalonia 1, 5:17) Ua ineine oia i te faaroo noa i te feia e rave ra i to ˈna hinaaro. E ere anei teie i te hoê aniraa î i te here?

Parau mau, no teie ao morare ore, te uiui ra paha e rave rahi no nia i te faufaaraa o te pure. Te uiui atoa ra paha oe, ‘E tauturu mau anei te reira ia ˈu?’

[Parau iti faaôhia i te api 9]

E nehenehe tatou e pure i te mau taime e vahi atoa