JUTUK mu skotoluk li mukʼtikil relijionetik ta sjunul balumile chalik ti oy yavil xchiʼuk ti oy yorail ta pasel li orasione. Pe, ¿mi jech van chal li Vivliae? Moʼoj.

Li kʼusi chal ta melele, jaʼ ti oy butik sta-o xichʼ pasel li orasione. Jaʼ yuʼun li Jesuse la stojbe ta vokol Dios kʼalal skʼan toʼox xveʼike (Lucas 22:17). Li yajtsʼaklomtak eke skotol velta tspasik orasion kʼalal tstsob sbaik sventa chichʼik ta mukʼ Diose. Pe taje mu jaʼuk to jech lik spasik. Nopem xa onoʼox xaʼiik spasel ta snailtak tsobobbail xchiʼuk ta chʼulna te ta Jerusalén, ti bu tskʼan Dios ti jaʼuk xkʼot ta jun na yoʼ bu chkʼoponat yuʼun skotol li krixchanoetike (Marcos 11:17).

Kʼalal jmoj tsobol tspasik orasion li yajtuneltak Diose xuʼ van mas chchikintabatik li s-orasionike. Mi jmoj snopbenik li buchʼutik te tsobolike xchiʼuk ti jech tspasik kʼuchaʼal chal li beiltaseletik ta Vivliae, xmuyubaj-o li Diose. Li orasionetik taje xuʼ stijbe yoʼonton Dios sventa tspas li kʼusitik tskʼan yajtuneltake (Hebreos 13:18, 19). Jaʼ yuʼun, li yajrextikotak Jeovae tspasik orasion ta skotol li tsobajeletik tspasike. Mi cha kʼan chavaʼi kʼuyelan tspasik orasion ti bu tstsob sbaike xuʼ xa bat li ta Salon sventa Tsobobbail ti bu mas nopol xavile.

Pe li Vivliae muʼyuk bu chal ti oyuk yorail o yavil bu chichʼ pasel li orasione. Moʼoj, chakʼ ta ilel ti kʼusuk noʼox ora xchiʼuk ti buyuk noʼox la spasik orasion li yajtuneltak Diose. Li Jesuse xi laj yale: «Cʼalal chacʼopanic Dios li voʼoxuque, ochan ta yut anaic, maquic li tiʼnae, cʼopanic li Jtotic Diose. Li Jtotique chil li cʼusi mucul chapasique, jech chayacʼboxuc amotonic» (Mateo 6:6).

¿Mi mu toj lekuk chavaʼi ti xuʼ jkʼopontik xchiʼuk chaʼi j-orasiontik li Mukʼul Jpas mantal ta vinajel-balumile, ti mu ventauk kʼusi ora xchiʼuk bu ta jpastik li orasione? Jech, jaʼ yuʼun mu labaluk sba ta aʼiel ti la sabe yorail sventa tspas orasion stuk li Jesuse. Jun veltae, la spas orasion sjunul akʼobal ta skoj ti oy kʼusi tsots skʼoplal tspase (Lucas 6:12, 13).

Jech noxtok, oy tukʼil viniketik xchiʼuk antsetik ti baʼyel la skʼoponik Dios kʼalal skʼan toʼox kʼusi tsots skʼoplal tspasike o kʼalal oy kʼusi tsots tsnuptanike. Mu ventauk mi tsots la skʼoponik o jaʼ noʼox ta yoʼontonik la skʼanbeik beiltasel li Diose o mi jaʼo la skʼanik kʼalal tsobolik o kʼalal stukike, li kʼusi mas tsots skʼoplale jaʼ ti la spasik orasione. Xi chalbutik stuk li Jeovae: «Cʼopanic Dios scotol cʼacʼal» (1 Tesalonicenses 5:17). ¿Mi mu toj lekuk chavaʼi ti xuʼ jkʼopontik li Dios ti lek chkʼanvane? Li Diose oy ta yoʼonton chaʼi skotol velta li orasionetik tspas yajtuneltake.

Akʼo mi jech, li buchʼutik mu kʼusi xchʼunojike tsjakʼbe sbaik mi melel xuʼ skoltautik li orasion avie. Yikʼaluk van jaʼ jech xa jakʼbe aba ek.