5 Tu Sukila hẽ Oku Sokiya Owola Locitumãlo Poku

Likutilila?

CITAVA OKUTI wa limbuka ndomo onepa yalua yatavo va velisapo olonembele vina via kemãla, kuenda va sokiya owola leteke oco va linge olohutililo. Anga hẽ, Embimbiliya li lekisa okuti, tu sukila oku likutilila povitumãlo vimue, kuenda owola ya sokiyiwa vokuenda kueteke?

Embimbiliya li lekisa okuti, kuli apuluvi a sunguluka oku likutilila. Osimbu Yesu kumue lolondonge viaye ka valile handi, va eca olopandu ku Suku poku likutilila. (Luka 22:17) Eci olondonge viaye via liongolola oco vi fendele Suku, via likutilila kumosi. Ovio via amamako oku ci linga, momo kosimbu va enda oku likutilila volosunangonga via va Yudea, kuenda vonembele ko Yerusalãi. Suku wa yonguile okuti, onembele yi linga ‘onjo yolohutililo viomanu volofeka viosi.’—Marko 11:17.

Eci afendeli va Suku va liongolola kuenda va likutilila kumosi, olohutililo viaco vi pondola oku eca onima yiwa. Nda vana va likutilila kumosi va kuete ocisimĩlo cimuamue catiamẽla Kovisonehua, ci sanjuisa Suku. Olohutililo vi pondola oku kuatisa omunu oku linga ovina ka vi kasi vovisimĩlo viaye. (Va Heveru 13:18, 19) Olombangi Via Yehova via siata oku likutilila kolohongele viavo. Omo liaco, wa lalekiwa oku enda Vonjango Yusoma yi kasi ocipepi lonjo yove, oco o yevelele olohutililo viavo.

Embimbiliya ka li tukula owola locitumãlo ca sokiyiwa coku lingila olohutililo. Pole, ovolandu aco a lekisa okuti, afendeli va Yehova kosimbu, ka va kuatele owola, ndaño ocitumãlo coku likutilila. Yesu wa popia hati: “Eci o likutilila, iñila vohondo yove kuenje oku yila epito, likutilila ku So o kasi vuyombeki, kuenje So o lete covuyombeki o ku muisa onima.”—Mateo 6:6.

Ka tu sanjuka hẽ oku kũlĩha ovina viaco? Ove o pondola oku amela Kululiki wovina viosi, vapuluvi osi, eci o kala likaliove, loku kolela okuti, eye o yevelela olohutililo viove. Ka tu komoha poku kũlĩha okuti, olonjanja vimue Yesu wa enda oku sanda ocitumãlo cimue pokolika, oco a likutilile likaliaye! Onjanja yimue, wa pita uteke wosi loku likutilila ku Suku, oco a sange olonumbi viu kuatisa poku nõla onjila a sukilile oku kuama.—Luka 6:12, 13.

Alume lakãi vakuavo va tukuiwa Vembimbiliya, va enda oku likutilila poku nõla onjila va yonguile oku kuama, kuenda poku liyaka lovitangi. Olonjanja vimue, va enda oku likutilila lolukandi, ale oku linga ohutililo yo vutima. Va enda oku likutilila eci va kala pamosi, ale ceci va kala likaliavo. Pole, cavelapo ceci okuti, va enda oku likutilila. Suku o laleka afendeli vaye loku va vetiya hati: “Kali locituwa coku likutilila.” (1 Va Tesalonike 5:17) Eye o yongola oku yevelela vana va linga ocipango caye. Eci hẽ ka ci lekisa okuti, eye o tu kuetele ocisola?

Ocili okuti omanu valua ka va tava ku Suku, va siata oku tenda olohutililo ndocina cimue ka ci kuete esilivilo. Omo liaco, o pondola oku lipula ndoco: ‘Anga hẽ, ohutililo yi ndi kuatisa muẽle?’

[Etosi liavelapo kemẽla 9]

Tu sukila oku likutilila olowola viosi povitumãlo via litepa